ەلىمىزدىڭ ساياسي ومىرىندەگى نەگىزگى كۇش بولىپ سانالاتىن «نۇر وتان» حالىقتىق-دەموكراتيالىق پارتياسىنىڭ ءحىىى قۇرىلتايىنا سىر ەلىنەن 50-گە تارتا ادام قاتىستىق. پارتيا سەزىندە اۋقىمدى ماسەلەلەر كوتەرىلدى. قۇرىلتاي باسقوسۋىنىڭ نەگىزگى وزەگى پارتيانىڭ بولاشاققا ارنالعان اۋقىمدى باعدارلاماسىن قابىلداۋ بولدى. بۇل ءبىزدىڭ 2020 جىلعا دەيىنگى دامۋىمىزدى ايقىندايتىن, بۇگىنگى كۇننىڭ جانە كەلەشەكتىڭ تالابىنا جاۋاپ بەرەتىن قۇجات دەپ قابىلداۋىمىز قاجەت. سونداي-اق پارتيانىڭ جاڭا ساياسي كەڭەسىنىڭ قۇرامى, رەۆيزيالىق كوميسسيانىڭ مۇشەلەرى سايلانىپ, بيىلعى جىلى وتەتىن سايلاۋعا تۇڭعىش پرەزيدەنتىمىز نۇرسۇلتان نازارباەۆتىڭ كانديداتۋراسىن ۇسىندىق. قازاقستاندىقتار مەن شەتەلدىك قوناقتاردىڭ پىكىرلەرى ءبىر ارنادا توعىستى. بۇل دەگەنىمىز – ەلباسىمىزدىڭ ساياسي تۇلعاسى, قايراتكەرلىك بولمىسى الەمدىك ساياساتتا ۇلكەن باعاعا يە بولعاندىعىنىڭ ايعاعى.
پرەزيدەنت نۇرسۇلتان نازارباەۆتىڭ سەزدە سويلەگەن ءسوزى وزىمە ۇلكەن اسەر قالدىردى. ماسەلەن, سوڭعى جىلدارى الەمدىك رىنوكتا ەتكە دەگەن سۇرانىس ارتتى. بۇۇ-نىڭ ازىق-ت ۇلىك جانە اۋىل شارۋاشىلىعى ۇيىمىنىڭ زەرتتەۋىنشە, جەر بەتىندە مال باسىنىڭ كەمۋى مەن استىق تاپشىلىعىنىڭ سالدارى ەت ءونىمىنىڭ ءوزىندىك قۇنىنىڭ كوتەرىلۋىنە اكەلىپ سوعۋدا. وسىعان وراي, مەملەكەت باسشىسى وسى سالاعا ۇلكەن مىندەتتەر جۇكتەدى. اۋىل شارۋاشىلىعىنداعى ەڭبەك ءونىمدىلىگى 2014 جىلعا قاراي 2 ەسە, 2020 جىلعا قاراي 4 ەسە وسەتىندىگىن باسا ايتتى. اگرارلىق سەكتوردا ەتتى مال شارۋاشىلىعىن دامىتۋ جونىندە بۇرىن-سوڭدى بولىپ كورمەگەن جوبالار جۇزەگە اسىرىلماق. مۇنىڭ قۇنى 4 ميلليون توننا بيداي ەكسپورتىنا تەڭ. مەملەكەت بۇل ماقساتقا 130 ميلليارد تەڭگەلىك نەسيە رەسۋرستارىن بولمەك.
جالپى, مال شارۋاشىلىعىن دامىتۋ – ول اۋىلدى دامىتۋ. ال اۋىلدىڭ وركەندەۋى – قازاقستاننىڭ قارىشتاۋى. بۇل – الەۋمەتتىك ماسەلەنى شەشۋ, جاستاردى, ارنايى مامانداردى اۋىلعا تارتۋ دەگەن ءسوز. ەلباسىنىڭ, سونىمەن قاتار, شاعىن جانە ورتا بيزنەسكە نەسيە بەرۋ تەتىكتەرىن جۇيەلەۋ, ءبىلىم بەرۋ, دەنساۋلىق ساقتاۋ سالالارىن جانداندىرۋ, دەموگرافيانىڭ ءوسۋىن قامتاماسىز ەتۋ تۋرالى ايتقان پىكىرلەرى وتە ورىندى.
ەلباسى نۇرسۇلتان نازارباەۆ – كورەگەن ساياساتكەر. بۇعان ەشكىمنىڭ تالاسى جوق. پرەزيدەنتىمىز – تەك ءوز ەلىمىزدە عانا ەمەس, حالىقارالىق ساحنادا ءوز ورنى ايقىندالعان تۇلعا. بۇل – قازاق ءۇشىن ۇلكەن مارتەبە. سوندىقتان ەلباسىنا حالىق ۇلكەن قولداۋ كورسەتەرىنە كامىل سەنەمىن.
ءناجمادين مۇساباەۆ, ارال اۋدانىنىڭ اكىمى.
قىزىلوردا وبلىسى.