2016 جىلعى 16 تامىزدا استانادا ينۆەستيتسيالار جانە دامۋ ءمينيسترى جەڭىس قاسىمبەكتىڭ مەملەكەتتىك قىزمەت سالاسىنداعى ايماقتىق حابتىڭ استاناداعى باسقارۋشى كوميتەتىنىڭ توراعاسى ءاليحان بايمەنوۆپەن رەسمي كەزدەسۋى بولىپ ءوتتى.
كەزدەسۋ بارىسىندا مينيسترلىك پەن ايماقتىق حابتىڭ اراسىندا ءوزارا تۇسىنىستىك تۋرالى مەموراندۋمعا قول قويىلدى. قۇجات اياسىندا تاراپتاردىڭ جوبالىق مەنەدجمەنت, مەملەكەتتىك قىزمەت كورسەتۋدىڭ ساپاسىن ارتتىرۋ, ادام رەسۋرستارىن باسقارۋ جانە باسقا دا وزەكتى باعىتتارداعى ءبىلىم بەرۋ ءجانە عىلىمي-زەرتتەۋشىلىك سيپاتتاعى شارالارعا قاتىسۋى كوزدەلگەن.
ەكىجاقتى ارىپتەستىكتىڭ ماڭىزدىلىعىنا توقتالا كەلە, ءا.بايمەنوۆ وسى مەموراندۋمنىڭ ترانسفورماتسيا جانە كادرلىق الەۋەتتى ارتتىرۋ جونىندەگى مينيسترلىكتىڭ جۇمىسىنا ءوز سەپتىگىن تيگىزەتىنىنە سەنىم ءبىلدىردى.
ءوز سوزىندە ج.قاسىمبەك مەملەكەت باسشىسى نۇرسۇلتان نازارباەۆتىڭ ادامي كاپيتالدى جەتىلدىرۋگە قاتىستى ماسەلەلەرگە باسا نازار اۋداراتىنىن العا تارتتى. مينيستر, سونداي-اق, قىزمەتكەرلەردىڭ كاسىبي دەڭگەيىن ارتتىرۋ ماقساتىنداعى ەكىجاقتى ىنتىماقتاستىقتىڭ وزەكتىلىگىنە دە توقتالدى.
ايتا كەتەرلىگى, استانادا مەملەكەتتىك قىزمەت سالاسىنداعى ايماقتىق حاب قازاقستان ۇكىمەتى مەن بۇۇ دامۋ باعدارلاماسىنىڭ باستاماسىمەن 25 مەملەكەت پەن 5 حالىقارالىق ۇيىمنىڭ قاتىسۋىمەن 2013 جىلى وتكەن قۇرىلتاي كونفەرەنتسياسى بارىسىندا قۇرىلعان بولاتىن. حاب ميسسياسى وڭىردەگى مەملەكەتتىك قىزمەتتىڭ ءتيىمدى جۇيەلەرىن دامىتۋعا سەپتىگىن تيگىزۋ بولىپ تابىلادى. قازىرگى تاڭدا حابقا 34 مەملەكەت جانە 5 حالىقارالىق ۇيىم مۇشەلىك ەتەدى.
«ەگەمەن-اقپارات»