كەشە پارلامەنت سەناتىنىڭ توراعاسى قاسىم-جومارت توقاەۆ اقش-تىڭ يسلام كونفەرەنتسياسى ۇيىمىنىڭ (يكۇ) ماسەلەلەرى بويىنشا ارنايى وكىلى راشاد حۋسسەيندى قابىلدادى, دەپ حابارلادى پارلامەنت سەناتىنىڭ ءباسپاسوز قىزمەتى.
كەزدەسۋ بارىسىندا الەمدەگى تۇراقتىلىق پەن قاۋىپسىزدىكتى قامتاماسىز ەتۋدىڭ وزەكتى ماسەلەلەرى جونىندە پىكىر الماسىلدى.
يسلام كونفەرەنتسياسى ۇيىمى سىرتقى ىستەر مينيسترلەرى كەڭەسىندە قازاقستاننىڭ توراعالىق ەتۋى قارساڭىنداعى بۇل ساپاردىڭ ماڭىزدىلىعىن اتاپ وتە كەلىپ, توراعا ءبىزدىڭ ەلىمىز يكۇ-داعى جوعارى لاۋازىمدا ۇلتارالىق جانە كونفەسسياارالىق كەلىسىمدى ساقتاۋدا جيناقتاعان ءتاجىريبەسىمەن بولىسۋگە ءازىر ەكەنىن ءمالىمدەدى. «قازاقستان بۇل ەرەكشە تاجىريبەنى ءوزىنىڭ حالىقارالىق دىنارالىق باستامالارى ارقىلى, ونىڭ ىشىندە الەمدىك جانە ءداستۇرلى دىندەر ليدەرلەرىنىڭ سەزدەرى اياسىندا الەمگە ۇسىنىپ وتىر», دەدى ق.توقاەۆ.
ر.حۋسسەين مادەنيەتارالىق جانە كونفەسسياارالىق ۇنقاتىسۋدى ىلگەرىلەتۋدەگى قازاقستاننىڭ ۇلەسىن جوعارى باعالادى جانە ءبىزدىڭ ەلىمىزدىڭ يسلام كونفەرەنتسياسى ۇيىمىنا تابىستى توراعالىق ەتەتىنىنە سەنىم ءبىلدىردى.