تامىزدىڭ 6-سى كۇنى تۇندە ريو-دە-جانەيروداعى وليمپيالىق ويىنداردا بوكسشىلاردىڭ 1/16 فينالدىق باسەكەسى باستالدى. وندا قازاقستاندىقتار ساپىنان شارشى الاڭعا ءبىرىنشى بولىپ شىققان 60 كيلوعا دەيىنگى سالماقتاعى بەرىك ءابدىراحمانوۆ اقش-تىڭ جاس بىلعارى قولعاپ شەبەرى كارلوس زەنون بالدەراستان 0:3 ەسەبىمەن ۇتىلىپ, جارىس جولىنان شىعىپ قالدى.
قاپتالداعى تورەشىلەر 19 جاسار كارلوستىڭ 30 جاستاعى بەرىكتى ءۇش راۋندتا دا 29:28 ەتىپ ۇتىپ شىققانىن كورسەتتى. تەك ءبىرىنشى رەفەري عانا ءبىزدىڭ بوكسشىعا العاشقى ەكى راۋندتا 10:9 دەگەن ۇتىس بەردى. قالعان قازىلار تۇگەل جەڭىستى امەريكالىق بوزبالاعا ۇستاتتى.
وسى كۇنى ونىمەن ءبىر سالماقتا رينگكە شىققان وزبەك حۋرشيد تاجيباەۆ كاتارلىق حاكان ەرسەكەردى, تاجىك انۆار يۋنۋسوۆ قىتايلىق شاح جۋندى 3:0 ەسەبىمەن تىزە بۇكتىردى. ال قىرعىز ەلىنىڭ بۇل تۋرنيردەگى جالعىز وكىلى – 81 كگ سالماقتاعى ەركين ابدىلبەكۋلى كولۋمبيالىق حۋان كارريللودان 0:3 بولىپ ۇتىلدى.
بۇل كۇنى 1/16 فينالدىق شايقاستى 49, 60 جانە 81 كيلوعا دەيىنگى سالماقتاعىلار وتكىزدى. ءبىزدىڭ ءبىرجان جاقىپوۆ (49 كگ) ءتۋرنيردى 1/8 فينالدان باستايدى. ونىڭ ءبىرىنشى قارسىلاسى كەشە ازەربايجان رۋفات گۋسەينوۆتى 3:0 ەتىپ ۇتقان ناميبيالىق ماتياس حامۋنيەلا بولىپ شىقتى.
بۇگىن تۇندە 60, 69, 81 كگ سالماقتارداعى اتلەتتەر 1/16 فينالدىق شايقاستار وتكىزەدى. ءبىزدىڭ 69 جانە 81 كيلوعا دەيىنگى سالماقتارداعى بوكسشىلارىمىز دانيار ەلەۋسىنوۆ پەن ادىلبەك نيازىمبەتوۆ بۇل جولى ۇرىستارعا قاتىسپايدى, ولار ويىنعا 1/8 فينالدان قوسىلادى.
تامىزدىڭ 8-ىندە – 69, 9-ىندا – 75 جانە 91-دەن اۋىر, 10-ى مەن 11-ىندە – 56 جانە 64, 13-ىندە 52 كگ سالماق دارەجەلەرىندەگى بوكسشىلار ءبىرىنشى اينالىم شايقاستارىن وتكىزەدى.
دامير قوجامقۇل
تەحنيكالىق مالىمەتتەر
بوكس. 6 تامىز. 49 كگ. گالاي يافاي ( ۇلىبريتانيا) – سيمپليك فوتچالا (كامەرۋن) 3:0, يۋبەرگەن مارتينەس (كولۋمبيا) – پاتريك لوۋرەنسو (برازيليا) 3:0, سامۋەل كارمونا (يسپانيا) – ارتۋر وۆاننەسيان (ارمەنيا) 3:0, يوسەليتو ۆەلاسكۋەس (مەكسيكا) – لەاندرو بلانك (ارگەنتينا) 3:0, ماتياس حامۋنيەلا (ناميبيا) – رۋفات گۋسەينوۆ (ازەربايجان) 3:0, نيكو ەرناندەس (اقش) – مانۋەل كاپپاي (يتاليا) 3:0.
60 كگ. كارمينە تومماسون (يتاليا) – ليندولفو دەلگادو (مەكسيكا) 3:0, دايسۋكە ناريماتسۋ (جاپونيا) – لۋيس كابرەرا (ۆەنەسۋەلا) 2:1, كارلوس بالدەراس (اقش) – بەرىك ءابدىراحمانوۆ (قازاقستان) 3:0, حۋرشيد تاجيباەۆ (وزبەكستان) – حاكان ەرسەكەر (قاتار) 3:0, دجوزەف كوردينا ( ۇلىبريتانيا) – چارل سۋارەس (فيليپپين) 2:1, انۆار يۋنۋسوۆ (تاجىكستان) – شاح جۋن (قىتاي) 3:0).
81 كگ. نادير مەحمەت ۋنال (تۇركيا) – حاسسان ساادا (ماروككو) WO., حرۆويە سەپ (حورۆاتيا) – ابدەرراحمان سالاح ارابي (ەگيپەت) 2:1, ميچەل بورگەس (برازيليا) – حاسسان ن`دام ن`جيكام (كامەرۋن) 3:0, حۋان كارريللو (كولۋمبيا) – ەركين ابدىلبەكۋلى (قىرعىزستان) 3:0.
91 كگ. حۋان نوگۋەيرا (برازيليا) – دجەيسون ۋاتالەي (اۆستراليا) 3:0, لوۋرەنس وكوليە – يگور ياكۋبوۆسكي (پولشا) 3:0.