ەل تاۋەلسىزدىگى جىلدارىندا رەسپۋبليكامىزدىڭ قولجەتكەن جەتىستىكتەرى مەن تابىستارىنا مەملەكەتىمىزدەگى ءار وتباسىنىڭ قوسقان ۇلەسى مول. حالقىمىز «وتان – قۋات, وتباسى – شۋاق» دەپ تەگىن ايتپاعان. ويتكەنى, شاعىن وتباسىلاردان مەملەكەت قۇرالادى. مىنە, تاراز قالاسىنىڭ تورىنەن اشىلعان «شاڭىراق» اللەياسى – ءار ەلدىڭ, ءار مەملەكەتتىڭ مىزعىماس بەرىكتىگى ءار وتباسىنىڭ مىقتىلىعىندا ەكەنىن ايعاقتاپ تۇراتىنى انىق.
– وتباسىلىق قاتىناستاردى, مورالدىق-ەتيكالىق جانە رۋحاني-ادامگەرشىلىك قۇندىلىقتاردى نىعايتۋدىڭ 2015-2020 جىلدارعا ارنالعان جالپىۇلتتىق ءىس-شارالار جوسپارىندا وبلىستىق, قالالىق ەلدى مەكەندەردە «وتباسى اللەياسىن» قۇرۋ تاپسىرىلعان بولاتىن, – دەيدى بۇل جونىندە تاراز قالاسى اكىمىنىڭ ورىنباسارى ماقسات احاەۆ. – بۇل – تاۋەلسىزدىكتىڭ 25 جىلدىعى اياسىندا جالپىۇلتتىق ءىس-شارالاردىڭ جۇزەگە اسۋىنىڭ كورىنىسى.
جىل باسىنان بەرى تارازدا 1607 وتباسى شاڭىراق كوتەرىپ, 5415 ءسابي دۇنيەگە كەلدى. بولاشاقتا جاڭادان وتاۋ قۇرعان جاستار, وسكەلەڭ ۇرپاق وسى اللەيانى مادەني جانە رۋحاني ورىنعا اينالدىراتىنىنا سەنىمىم مول.
ءيا, جاس بالانى وتباسىمىزدا وتانسۇيگىشتىككە, ءوز حالقىنىڭ ءتىلى مەن سالت-ءداستۇرىن قاستەرلەيتىن ۇلتجاندىلىققا, تاريحى مەن مادەنيەتىن بىلۋگە ۇيرەتكەنىمىز ابزال. شىندىقتى بۇكپەي ايتۋىمىز كەرەك, قازىرگى جاستار باتىسقا كوپ ەلىكتەيدى. بىراق, ءار نارسەنىڭ ءوز ورنى بار, ءار حالىقتىڭ ەرتەدەن كەلە جاتقان اتا ءداستۇرى, جۇزدەگەن جىلدار بويى قالىپتاسقان ۇلتتىق مىنەز-قۇلقى, مادەنيەتى بار ەكەنىن ەستەن شىعارۋعا بولمايدى. ەندەشە, بايىرعى قۇندىلىعىمىزدان اجىراپ قالماۋ ءۇشىن جانە ءار وتباسىنىڭ بەرىكتىگى ءۇشىن وسىن-داي اسەم اللەيانىڭ اشىلىپ, كوپشىلىكتى ىزگىلىك پەن قامقورلىققا شاقىرا ءبىلۋ دە ونەگەلى ءىس ەكەنى انىق.
ورالحان ءداۋىت,
«ەگەمەن قازاقستان»
جامبىل وبلىسى
سۋرەتتى تۇسىرگەن
التىنبەك قارتاباي