فوتوكورمەسى ماسكەۋ تورىندە اشىلدى
ماسكەۋ ورتالىعىنداعى نيكولسكي كوشەسىندەگى «رەۆوليۋتسيا الاڭى» مەترو ستانساسىنىڭ ماڭىندا «قازاقستان – ۇلى دالا ەلى» تاقىرىبىندا فوتوكورمە اشىلدى. ونى قازاقستاننىڭ رەسەيدەگى ەلشىلىگى مەن «National Geographic روسسيا» جۋرنالى ۇيىمداستىردى.
ەكسپوزيتسياعا قازاقستاننىڭ تابيعاتىنا, سونداي-اق, الماتىدا وتەتىن قىسقى ۋنيۆەرسيادا-2017, استانادا ۇيىمداستىرىلاتىن ەكسپو-2017 حالىقارالىق كورمەسىنە ارنالعان 60-تان استام سۋرەت تۋىندىسى قويىلعان. اتالعان سۋرەتتەردىڭ اۆتورى, «National Geographic روسسيا» جۋرنالىنىڭ شەف-فوتوگرافى اندرەي كامەنەۆ وسى كورمە ءۇشىن قازاقستانعا بارىپ, ءبىر اي شاماسىندا ارنايى فوتوەكسپەديتسياعا قاتىسقان ەكەن.
شارانىڭ اشىلۋىندا ءسوز العان جۋرنالدىڭ باس رەداكتورى اندرەي پالامارچۋك «قازاقستان – ۇلى دالا ەلى» فوتوكورمەسىن ۇيىمداستىرۋ بيىل قازاق تىلىندە «National Geographic قازاقستان» جۋرنالىنىڭ جارىق كورۋىمەن بايلانىستى ەكەنىن ايتتى. سونىمەن قاتار, ول ەكسپوزيتسيانىڭ باستى تاقىرىپتارىنىڭ ءبىرى استانا تورىندە وتەتىن ەكسپو-2017 كورمەسى ەكەنىن اتاپ ءوتتى. «ەكسپو-2017 «بولاشاق ەنەرگياسى» تاقىرىبى – ادامزات ءۇشىن وتە وزەكتى, جۋرنالىمىز ءۇشىن دە وتە جاقىن. سەبەبى, ءبىزدىڭ ميسسيامىز – جەر شارىن قورعاۋ, سول ارقىلى وقىرماندارىمىزدى وسىعان تارتۋ ءارى قىزىقتىرۋ», – دەدى ا.پالامارچۋك.
قازاقستاننىڭ رەسەيدەگى ەلشىلىگىنىڭ كەڭەسشىسى مارات سىزدىقوۆ: «ەۋرازيا كەڭىستىگىنىڭ ورتاسىندا ورنالاسقان قازاقستاندا ەۋروپا مەن ازيانىڭ ءتۇرلى بوياۋمەن كوركەمدەلگەن لاندشافتى كەزدەسەدى», – دەي كەلە, كوپشىلىك اتالعان فوتوكورمە ارقىلى بۇعان كوز جەتكىزە الاتىنىن جەتكىزدى, سونىمەن بىرگە, جينالعان قاۋىمدى قوناقجاي قازاق ەلىنە بارىپ, ونىڭ تاڭعاجايىپ جەرلەرىن تاماشالاۋعا شاقىردى. ال «استانا ەكسپو-2017» ۇلتتىق كومپانياسى اق ماركەتينگ, ىلگەرىلەۋ جانە تۋريزم دەپارتامەنتى ديرەكتورىنىڭ ورىنباسارى ءجاميلا نۇرقاليەۆا «National Geographic روسسيا» جۋرنالىنا جانە قازاقستاننىڭ رەسەيدەگى ەلشىلىگىنە اتالعان فوتوكورمەنى ۇيىمداستىرعانى ءۇشىن العىسىن بىلدىرە كەلىپ, كەلەر جىلى ەلوردادا وتەتىن ەكسپو-2017-گە قاتىسۋعا شاقىردى جانە قازىردىڭ وزىندە حالىقارالىق كورمەنىڭ بيلەتتەرى ساتىلىمعا قويىلعانىنان حاباردار ەتتى.
فوتوكورمەنىڭ اشىلۋىنا ارنالعان سالتاناتتى شارانىڭ سوڭى ماسكەۋدىڭ قازاق ۇلتتىق-مادەني اۆتونومياسىنىڭ ءتورايىمى دامەلى تاسماعانبەتوۆانىڭ ۇيىتقى بولۋىمەن ءازىرلەنگەن كونتسەرتكە ۇلاستى. ال فوتوكورمەنىڭ ءوزى بيىلعى جىلدىڭ 24 تامىزىنا دەيىن جالعاسادى.
ءلايلا ەدىلقىزى,
«ەگەمەن قازاقستان»