قمگ كومپانيالارىنداعى ترانسفورماتسيالاۋ
مەملەكەت باسشىسى 2014 جىلدىڭ قازان ايىندا ەلىمىزدەگى كومپانيالار قىزمەتىنىڭ تيىمدىلىگىن ارتتىرۋ ماقساتىندا جۇرگىزىلىپ جاتقان رەفورمالارعا سايكەس «سامۇرىق-قازىنا» قورى كومپانيالار توبىن ترانسفورماتسيالاۋ باعدارلاماسىنىڭ تۇساۋىن كەستى. «قازمۇنايگاز» ۇك» اق وسى باعدارلامانى ىسكە اسىرۋعا العاشقىلاردىڭ ءبىرى بولىپ كىرىستى. قازىرگى تاڭدا كومپانيا بۇل ۇردىستە ايتارلىقتاي جەتىستىكتەرگە جەتتى.
ەكونوميكالىق يادروداعى مۇمكىندىكتەر كوزى
قازىرگى كەزەڭدەگى نارىقتىڭ قاتاڭ باسەكەلەستىك جاعدايىنداعى ىسكەرلىك تاجىريبەدە تيىمدىلىكتىڭ ستاندارتتارى مەن باسىمدىقتارى رىنوكتاعى ويىنشىلاردىڭ جاعدايى سياقتى جىلدام وزگەرەدى. مۇنداي جاعدايدا كۇشتىلەردىڭ نەمەسە از وندىرىستىك شىعىندارمەن ءتيىمدى جۇمىس ىستەيتىندەردىڭ عانا ايى وڭىنان تۋادى. كومپانيا بۇگىنگى رىنوكتىڭ تالاپتارىنا نەعۇرلىم جىلدام بەيىمدەلىپ جاڭا تەحنولوگيالاردى جەدەل يگەرەتىن بولسا, سوعۇرلىم ەكونوميكالىق ءوسۋ جولىندا ءوز «تولقىنىن» تاباتىن بولادى.
وسى جاڭعىرۋ ۇردىستەرىنىڭ قاق ورتاسىندا ۇلتتىق ەكونوميكانىڭ يادروسى – «سامۇرىق-قازىنا» قورى بار. قازىر ول كورپوراتيۆتىك دامۋ ۇردىستەرىن جالپى ترانسفورماتسيالاۋدى ودان ءارى جالعاستىرۋدا.
بۇگىندە قازاقستانداعى ءارتۇرلى دەڭگەيدە, ونىڭ ىشىندە ەكونوميكانىڭ يادروسىندا اتقارىلىپ جاتقان ەكونوميكالىق رەفورمالاردىڭ ماقساتى – ۇلتتىق ەكونوميكا قۇرىلىمىنداعى شيكىزاتتىق ەمەس سەكتورلاردىڭ ۇلەسىن ارتتىرۋ جانە ءداستۇرلى شيكىزاتقا تاۋەلدىلىكتەن شىعۋ. حالىقارالىق ساراپشىلار بۇل ماقساتقا جەتۋدەگى نەگىزگى ءۇردىسى رەتىندە ينكليۋزيۆتىك دامۋعا ەرەكشە باسىمدىق بەرەدى. بۇل دەگەنىمىز كومپانيانىڭ, سالانىڭ جانە تۇتاس ۇلتتىق ەكونوميكانىڭ ءوسىمى بارلىق الەۋمەتتىك توپتاردىڭ مۇشەلەرىنىڭ قاتىسۋىمەن جۇزەگە اسىرىلىپ, قوعامداعى الەۋمەتتىك قيىندىقتاردى جەڭىلدەتەدى جانە ۇزاق مەرزىمدىك اۋقىمدا گۇلدەنۋ جاعدايىن قامتاماسىز ەتەدى دەگەن ءسوز.
«قازمۇنايگاز» كومپانياسىن جاڭعىرتۋ ۇردىستەرىنە ارنالعان «ادام كاپيتالى – ترانسفورماتسيالاۋداعى جەتىستىك كەپىلى» HR-فورۋمىندا سويلەگەن سوزىندە «سامۇرىق-قازىنا» ۇاق باسقارماسىنىڭ توراعاسى ومىرزاق شوكەەۆ الەمدىك داعدارىس احۋالى تەرەڭدەپ وتىرعان جاعدايدا كومپانيا توبى جۇزەگە اسىرىپ جاتقان ترانسفورماتسيا شارالارى ءبىزدىڭ ەكونوميكامىزدىڭ يادروسىنداعى بارلىق بولىمشەلەردىڭ ءتيىمدى جۇمىس ىستەۋىنە نەگىز بولادى, دەپ اتاپ كورسەتتى. وسى ۇردىستەر شەڭبەرىندە باسقارۋ جۇيەسى جاڭارادى, وزدەرىنىڭ جەكە فۋنكتسيالارى مەن مىندەتتەرىن ورىنداۋعا جۇمىلعان قىزمەتكەرلەردىڭ مۇمكىندىگى ارتادى.
– قوردىڭ باس وفيسىندە ءبىز ترانسفورماتسيالاۋ ءۇردىسىن باعدارلامانىڭ نەگىزگى باسىمدىقتارىن انىقتاۋعا ءجانە ستراتەگيانى بەلگىلەۋگە, سونىمەن بىرگە, باسقارۋ جۇيەسىنىڭ ۇتىمدى مودەلىن تابۋ ادىستەرىمەن باستادىق. بۇل رەتتە ءبىز وفيستىك قىزمەتكەرلەردىڭ قىزمەتىنە بەرىلگەندىگىن جانە ولاردىڭ ءوز جۇمىسىندا بارىنشا تيىمدىلىككە قول جەتكىزۋ سيپاتتامالارىن انىقتادىق, – دەدى «سامۇرىق-قازىنا» ۇاق باسشىسى.
سونىمەن بىرگە, قازىرگى ترانسفورماتسيا جاعدايىندا وڭتايلاندىرۋ ۇردىستەرىن جۇرگىزۋدىڭ تەك پروگرەسسيۆتى ءۇردىس قانا ەمەس, سونىمەن بىرگە قىزمەتكەرلەردىڭ الەۋمەتتىك جاعدايلارىنا ەرەكشە اسەرى بولاتىندىعىن ەسكەرۋ كەرەك. سوندىقتان بۇل جۇمىس وڭتايلاندىرۋدىڭ قادامدارى مەن باسىمدىقتارىن تاڭداۋ كەزىندە ادىلدىكتى جانە سەزىمتالدىقتى قاجەت ەتەدى, دەپ اتاپ كورسەتتى ومىرزاق شوكەەۆ.
وزگەرۋ بيىگىندە
«قازمۇنايگاز» ۇك اق ترانسفورماتسيا باعدارلاماسىن ءىس جۇزىنە اسىرۋعا كومپانيالار توبىندا العاشقىلاردىڭ ءبىرى بولىپ كىرىستى جانە قازىرگى كەزدە بۇل سالادا ايتارلىقتاي جەتىستىكتەرگە قول جەتكىزدى.
«قازمۇنايگاز» ۇك اق-تىڭ باسقارما توراعاسى ساۋات مىڭباەۆتىڭ ايتۋىنشا, كومپانيانىڭ جاڭا جاعدايدا جەمىستى قىزمەت اتقارۋى ءۇشىن جۇيەلى وزگەرىستەر جۇرگىزۋ كەرەك. اتاپ ايتقاندا, قمگ ديرەكتورلار كەڭەسى ارقىلى اكتيۆتەرگە باسشىلىق جاساۋدان, ينۆەستورلار پورتفەلى تۇجىرىمىنان باس تارتىپ, وندىرىستىك اكتيۆتەردى وپەراتيۆتىك باسقارۋ ۇردىسىنە كوشۋ كەرەك. ول ءۇشىن سۋبحولدينگتەردى كومپانيانىڭ كورپوراتيۆتىك ورتالىعىنا ينتەگراتسيالاۋ ەسەبىنەن باسقارۋ باسپالداقتارىنىڭ سانىن توعىزدان ەكىگە دەيىن ازايتۋ قاجەت. ءبىرىنشى كەزەكتە HR-قىزمەتتەرى, اقپاراتتىق تەحنولوگيا, بولاشاقتا بۋحگالتەريا جانە قازىناشىلىق كىرەتىن بىرىڭعاي قىزمەت كورسەتۋ ورتالىعىن قۇرۋ قاجەت.
قمگ باسشىسىنىڭ ايتۋىنشا, ءتيىمدىلىكتىڭ نەگىزگى پارامەترلەرى بويىنشا كومپانيا ەرەكشە ءبىر ءوسۋ ديناميكاسىن كورسەتكەن جوق. «قازمۇنايگاز» اق-تىڭ ءوسۋ كورسەتكىشتەرى رەسەيلىك كومپانيالاردىڭ وسىعان سايكەس كورسەتكىشتەرىنەن, ول, ول ما, جاھاندىق رىنوك كوشباسشىلارىنىڭ كورسەتكىشتەرىنەن كوپ الشاق قالۋدا.
جالپى العاندا, بۇل سالاداعى پروبلەمالار «قازمۇنايگاز» كومپانيالارى توبىندا ادام رەسۋرستارىن باسقارۋ قۇرىلىمى مەن ۇردىستەرى ستاندارتتارعا سايكەستەندىرىلمەگەن. ءىس جۇزىندە ءاربىر كومپانيا ادىستەمەلىك تۇرعىدا ءوز ساياساتىن جۇرگىزگەن. كوپتەگەن ۇيىمداردا قىزمەتكەرلەردىڭ كاسىبي بىلىكتىلىگىن جەتىلدىرۋگە باعىتتالعان شارالار جۇزەگە اسىرىلماعان. وسى ماسەلەلەردى ەسكەرە كەلىپ, بۇگىندە قمگ-دە جۇكتەلگەن مىندەتتەردى اتقارۋدا ءبىر-ءبىرىن قايتالاۋشىلىقتى جويۋ, قابىلدانعان شەشىمدەردىڭ وڭتايلىلىعىن جانە جەدەلدىلىگىن ارتتىرۋ ەسەبىنەن كومپانيانىڭ تيىمدىلىگىن كوتەرۋگە مۇمكىندىك بەرەتىن جاڭا وپەراتيۆتىك مودەلدەر وندىرىسكە ەنگىزىلۋدە.
بىلىكتىلىكتىڭ جاڭا ۇلگىسى
قمگ-نىڭ ادام رەسۋرستارىن باسقارۋ جانە ەڭبەكاقى جونىندەگى باسقارۋشى ديرەكتورى سەرىك ابدەنوۆتىڭ بەرگەن دەرەكتەرى بويىنشا, كومپانيادا ءجۇرگىزىلىپ جاتقان كاسىبي مىندەتتەردى ستاندارتتاۋ ءادىسى بارلىق قىزمەتكەرلەردىڭ اتقاراتىن مىندەتتەرىنىڭ كولەمىن انىقتاۋعا مۇمكىندىك بەرەدى. ەگەر بۇرىن قىزمەتكەرلەردىڭ مىندەتتەرىن ايقىنداۋدا ناقتىلىق جانە جۇيەلىلىك جەتىسپەي جاتاتىن بولسا, ەندى ءاربىر قىزمەتكەر جالپى وندىرىستىك ۇردىستەردەگى ءوزىنىڭ مىندەتىن بارىنشا جەتە ءتۇسىنىپ, ماقساتتى, ەڭ باستىسى ناتيجەلى جۇمىس ىستەيتىن بولادى.
مۇنداي وزگەرىستەر الدىمەن باسقارۋ ۆەرتيكالىنىڭ جوعارى دەڭگەيىندە باستالدى. اتاپ ايتقاندا, كورپوراتيۆتىك ورتالىقتا ادام رەسۋرستارىن جانە ەڭبەكاقى تولەۋدى باسقارۋ تەتىكتەرى قايتا قارالدى, قىزمەتكەرلەر سانىن قىسقارتا وتىرىپ دەپارتامەنتتىڭ قۇرىلىمى وزگەرتىلدى. سونىمەن بىرگە, «سامۇرىق-قازىنا» اق-تىڭ كورپوراتيۆتىك ۋنيۆەرسيتەتى بازاسىندا ادام رەسۋرستارىن باسقارۋعا بىرىككەن قىزمەت كورسەتۋ ورتالىعىن قۇرۋ قولعا الىندى.
سونىمەن بىرگە, دياگنوستيكا ءناتيجەلەرىنە سايكەس كادرلاردى ىرىكتەۋدىڭ بۇرىنعى جۇيەسىندە بىرقاتار ءالسىز قىرلارى مەن وتكىر پروبلەمالارى بولعاندىعى انىقتالدى. بۇل ەڭ الدىمەن, مامانداردى ىرىكتەۋ تاجىريبەسىندە جۇيەلىلىكتىڭ جانە اشىقتىقتىڭ بولماۋىنا, بۇل سالاداعى جۇمىستى ۇيىمداستىرۋدىڭ مۇلدە جەتىلدىرىلمەۋىنە قاتىستى.
ادام رەسۋرستارىن باسقارۋ مىندەتتەرىنىڭ جاڭا مودەلى HR-قىزمەتى قۇرىلىمىنا فۋنكتسيالىق قىزمەتتىڭ كورسەتكىشتەرىنە جانە ۇردىستەرىنە ستاندارتتى كوزقاراستى قالىپتاستىرۋدى تالاپ ەتەدى. جالپى, قىزمەت كورسەتۋ ورتالىعى جوباسىن ءىس جۇزىنە اسىرۋ بۇگىندە ءوزىنىڭ شەشۋشى ساتىنە جەتتى. كادرلاردى ىرىكتەۋدە اشىق كونكۋرستىق ءتاسىلدى ەنگىزۋ, ادام رەسۋرستارىن باسقارۋ قۇرىلىمىن بىرەگەيلەندىرۋ سياقتى ءبىرشاما باستامالار كورپوراتيۆتىك ورتالىقتا جانە حولدينگتىڭ بىرقاتار جەتەكشى كومپانيالارىندا ءىس جۇزىنە اسىرىلا باستادى.
قازىرگى تاڭدا ترانسفورماتسيالاۋدىڭ وتە ماڭىزدى ۇدەرىستەرىنىڭ ءبىرى ءىس جۇزىنە اسىرىلۋ ۇستىندە. وسى جۇمىس شەڭبەرىندە ءبىرىنشى كەزەكتە ءىس جۇزىنە اسىرىلاتىن جوبالاردىڭ ماڭىزى انىقتالادى, پايدالىلىعى ەسەپتەلىنەدى جانە ءىس جۇزىندە ول قالاي جۇمىس ىستەيتىندىگى سارالانادى. ءسويتىپ, جاقىن ارادا «قازمۇنايگاز» ۇق اق-تىڭ بارلىق كومپانيالار توبىندا ادام رەسۋرستارىن باسقارۋ مىندەتتەرىنىڭ جاڭا مودەلىن ناقتى ءىس جۇزىنە اسىرۋ جۇمىستارى باستالادى.
جوسپارلانعان وزگەرىستەردى ىسكە اسىرۋ HR-قىزمەتىنىڭ وندىرىستىك ءبولىمدەرمەن سەرىكتەستىگى, مەريتوكراتيا, سونىمەن بىرگە, بارلىق قىزمەتكەرلەردى ستراتەگيالىق ماقساتتارعا جەتۋگە جۇمىلدىرۋ سياقتى بازالىق ۇردىستەر نەگىزىندە جۇرگىزىلەتىن بولادى. جوبانى ءىس جۇزىنە اسىرۋعا كومپانيانىڭ ترانسفورماتسيالاۋ جونىندەگى بارلىق بولىمدەرىنىڭ, كورپوراتيۆتىك ورتالىقتىڭ جانە باسقا قۇرىلىمداردىڭ وكىلدەرى تۇگەل جۇمىلدىرىلاتىن بولادى.
ترانسفورماتسيالاۋداعى HR-ءدىڭ ءرولى
الدا تۇرعان وزگەرىستەردىڭ اۋقىمىن ەسكەرە كەلگەندە, العا قويعان ماقساتقا جەتۋدىڭ باستى تالابى كومپانياداعى ادام كاپيتالىن ءتيىمدى باسقارۋ بولىپ تابىلادى. تەك قابىلەتتى, تالاپتى دۇرىس تۇسىنە بىلەتىن قىزمەتكەرلەر عانا جالپى كومپانيانىڭ تيىمدىلىگىن ارتتىرۋعا قول جەتكىزە الادى. وسىعان بايلانىستى جاڭا كورپوراتيۆتىك مادەنيەت قۇرۋعا باعىتتالعان HR-قىزمەتىنە ايرىقشا ءرول جۇكتەلەدى.
كومپانيانى ترانسفورماتسيالاۋداعى بارلىق باستامالاردى ءىس جۇزىنە اسىرۋدا تەك وسى قۇرىلىمعا كوشباسشى بولۋ جاۋاپكەرشىلىگى جۇكتەلگەن. جۇمىس بەرۋشى جانە جۇمىسشى اراسىنداعى ىشكى كوممۋنيكاتسيا قۇرۋدا بىرىڭعاي كوزقاراستى قالىپتاستىرۋ ماقساتىندا «قازمۇنايگاز» ۇك» اق كومپانيالار توبى بويىنشا بىرىڭعاي ىشكى كوممۋنيكاتسيالار جۇيەسىن قۇرۋدىڭ تيپتىك ەرەجەسى بەلگىلەندى جانە بەكىتىلدى.
ىشكى كوممۋنيكاتسيا مىندەتى – ۇيىمداعى جۇمىس بەرۋشى جانە جۇمىسشى اراسىنداعى تىكەلەي بايلانىس ورناتۋ جانە قولداۋ, ءارتۇرلى شارالاردىڭ ماقساتتارى مەن مىندەتتەرى تۋرالى قىزمەتكەرلەردى دەر كەزىندە حاباردار ەتۋ, سونىمەن بىرگە, كاسىپورىنداعى الەۋمەتتىك-پسيحولوگيالىق احۋالدى باقىلاۋدا ۇستاۋ بولىپ تابىلادى. تاعى ءبىر ايتا كەتەتىن ماسەلە, ىشكى كوممۋنيكاتسيا جۇيەسى الەۋمەتتىك, تۇرمىستىق, وندىرىستىك جانە باسقا ماسەلەلەردى تالقىلاۋ ءۇشىن ەڭبەك ۇجىمى مەن باسشىلاردىڭ جوسپارلى جانە جوسپاردان تىس كەزدەسۋلەرىن ۇيىمداستىرۋدى كوزدەيدى. سونىمەن بىرگە, توقسان سايىن ءبىر رەت كۇن تارتىبىندەگى ەڭ وتكىر ماسەلەلەر بويىنشا كاسىپوداق وكىلدەرىمەن كەزدەسۋلەر وتكىزىلۋى قاجەت. اتاپ ايتقاندا, بۇل ۇجىمدىق شارتتىڭ ورىندالۋ جاعدايلارى, ەڭبەك ءتارتىبىنىڭ جاعدايى, ەڭبەك ۇجىمىنىڭ ءوتىنىش-شاعىمدارى, ەڭبەكتى قورعاۋ جانە ونىڭ قاۋىپسىزدىگى, الەۋمەتتىك جەڭىلدىكتەر مەن وتەماقىلار بەرۋ ماسەلەلەرى بولۋى مۇمكىن.
قازىرگى كەزدە «قازمۇنايگاز» ۇك» اق-تىڭ كوپتەگەن كومپانيالارى بارىنشا تولىق اقپارات الماسۋ ماقساتىندا كورپوراتيۆتىك, اقپاراتتىق سايتتار قۇرۋ, بەينەجارنامالار ءۇشىن مونيتورينگتەر جاساۋ, كورپوراتيۆتىك گازەت ۇيىمداستىرۋ, قىزمەتكەرلەردىڭ ءوتىنىش-شاعىمدارىن جيناۋ ءۇشىن اقپاراتتىق قابىرعا گازەتتەرىن جانە جاشىكتەردى ۇيىمداستىرۋ جۇمىسىن جالعاستىرۋدا. قىزمەتكەرلەردىڭ بارلىق ءوتىنىش-شاعىمدارى جان-جاقتى ساراپتاۋدان وتكىزىلەدى. ولاردىڭ ىشىندەگى ەڭ ماڭىزدى دەگەن ماسەلەلەر بىرىككەن شەشىمدەر قابىلداۋ ءۇشىن ەڭبەك ۇجىمى مەن باسشىلاردىڭ كەزدەسۋلەرىنىڭ كۇن تارتىبىنە شىعارىلادى. بۇگىندە ىشكى كوممۋنيكاتسيا جۇيەسى الەۋمەتتىك ماڭىزدى ماسەلەلەردى شەشۋ ءۇشىن جانە پىكىر الماسۋ ءۇشىن, سونىمەن بىرگە «قازمۇنايگاز» ۇك اق كومپانيالار توبىنداعى وندىرىستىك ۇردىستەردى ودان ءارى دامىتۋ ماقساتىنداعى ۇسىنىس-پىكىرلەردى قابىلداۋ ءۇشىن دە كەڭىنەن پايدالانىلادى.
قىزمەتكەرلەردى باعالاۋ جۇيەسى
ترانسفورماتسيالاۋ شەڭبەرىندە قمگ-عا ەنگىزىلگەن ءوسىمنىڭ جاڭا مودەلى رەتىندە اكىمشىلىك, اقپاراتتىق, ىنتالاندىرۋ ماقساتتارىن كوزدەيتىن باعالاۋ جۇيەسىن ەنگىزۋ بولىپ تابىلادى. بۇل رەتتە ۇزاق مەرزىم ىشىندە قىزمەتكەرلەردىڭ ەڭبەگىنە باعا بەرۋ ناتيجەسى قاناعاتتانعىسىز بولىپ كەلگەن جاعدايدا قىزمەتكەرلەردى اتتەستاتسيالاۋ جۇيەسى پايدالانىلاتىن بولادى.
قىزمەتكەرلەرگە باعا بەرۋدىڭ جاڭا ادىستەمەسى ءۇش كومپونەنتەن تۇرادى: ماقساتقا جەتۋدىڭ ناتيجەلىلىگىن باعالاۋ, كاسىبي ءبىلىمى مەن بىلىكتىلىگىن باعالاۋ, سونىمەن بىرگە قابىلەتتىلىگىن باعالاۋ. وسى ورايدا قۇزىرەتتىلىك مودەلىنىڭ بەلسەندىلىگىن ارتتىرۋعا ەرەكشە كوڭىل بولىنەدى. قۇزىرەتتىلىك مودەلى – كورپوراتيۆتىك جانە مەنەدجەرلىك ەكى بلوكتان تۇرادى. ءوز كەزەگىندە بۇل بىلىكتىلىكتىڭ ارقايسىسى ءتورت ساتىلى ينديكاتورلاردان قۇرالعان. جاڭا ۇيىمداستىرۋشىلىق مودەلى اياسىندا قۇزىرەتتىلىك بىرىڭعاي بولىپ كەلەدى. لاۋازىمدىق ءوسۋ, كاسىبي دامۋ, ىنتالاندىرۋ دەڭگەيى بويىنشا اكىمشىلىك شەشىمدەر 9-كلەتكالى ماتريتسالار نەگىزىندە قۇرىلاتىن بولادى. قازىرگى كەزدە كومپانيادا 9-كلەتكالى ماتريتسا سىنالاتىن ەكى ءىرى جوبا جۇزەگە اسىرىلۋدا. ءبىرىنشى – بۇل قمگ كومپانيالار توبىنىڭ بىرىڭعاي كادرلىق رەزەرۆىن ىرىكتەۋ. بۇل رەتتە 30 رەزەرۆيسكە وندىرىستىك باعىت بويىنشا تاعى 30 ادام قوسىلادى. جىل اياعىنا دەيىن قمگ كومپانيالار توبىنىڭ بىرىڭعاي كادرلىق رەزەرۆىنىڭ سانى 60 ادامنان قۇرالاتىن بولادى. ەكىنشى جوبا – مەنەدجەرلىك قۇرامدى باعالاۋ. بۇگىندە وسى جوبا اياسىندا قمگ كورپوراتيۆتىك ورتالىعىنان 105 باسشى جانە ەنشىلەس جانە تاۋەلدى كاسىپورىنداردان 11 باسشى ىسكەرلىك قۇزىرەتتىلىگى دارەجەسىن انىقتاۋ جونىندەگى ونلاين تەستىلەۋدەن ءوتتى. وسى جۇمىستىڭ قورىتىندىسى دا كومپانيا بويىنشا انىقتالعان ناتيجەلەر نەگىزىندە بۋىن الماسۋىنىڭ جوسپارى بەلگىلەنەتىن بولادى. «قازمۇنايگاز» كورپوراتيۆتىك ورتالىعى مەريتوكراتيا قاعيدالارىن ءىس جۇزىنە اسىرۋ شەڭبەرىندە بوس اكىمشىلىك ورىندارعا ۇمىتكەرلەر ىرىكتەۋدە تولىعىمەن اشىق كونكۋرستىق جۇيەگە كوشتى. بوس ورىندار بويىنشا اقپاراتتار مىندەتتى تۇردە كومپانيانىڭ كورپوراتيۆتىك سايتىندا, الەۋمەتتىك جەلىلەردە جاريالانادى. سەرىك ابدەنوۆتىڭ ايتۋىنشا, سوڭعى ەكى جىل ىشىندە 119 بوس ورىن تۋرالى حابارلاندىرۋ جاريالانعان. ۇمىتكەرلەردىڭ ءوتىنىشى ءىس جۇزىندە قازاقستاننىڭ بارلىق وڭىرلەرى بويىنشا كەلىپ تۇسەدى. قازىرگە دەيىن ولاردىڭ سانى 6000-عا جەتتى. الايدا, ولاردىڭ ىشىندە 300-ءى عانا قمگ-نىڭ كاسىبي تالاپتارىنا سايكەس كەلەدى.
قمگ كادرلار ىرىكتەۋدە دۇرىس كورسەتكىشتەرگە قول جەتكىزۋ ءۇشىن بارلىق ءتيىمدى تاسىلدەردى قولدانادى. نارىقتىق تالاپتارعا سايكەس جالاقى جۇيەسىن قالىپتاستىرۋ, سونىمەن بىرگە, جاڭا ءبىرىڭعاي كادرلىق رەزەرۆ جۇيەسىن قولدانۋ تيىمدىلىگىن ارتتىرۋ ماسەلەلەرى بويىنشا وسكەلەڭ تالاپتاردى قولدانىسقا ەنگىزۋ كوزدەلۋدە.
HR ۇردىستەرىن اۆتوماتتاندىرۋ
HR ۇردىستەرىن اۆتوماتتاندىرۋ ماقساتىنا قاعازباستىلىقتان قۇتىلىپ, HR قۇرىلىمى جۇمىسىن اۆتوماتتاندىرۋ فورماتىنا ەنگىزۋ ماسەلەلەرى جاتادى. وسى باعىت بويىنشا بۇگىندە بىرىڭعاي ەڭبەكاقى جۇيەسىن, كادرلىق ءىس جۇرگىزۋ, جۇمىس ۋاقىتىن ەسەپتەۋ, ەڭبەكاقى قورىن جوسپارلاۋ, الەۋمەتتىك احۋالدى مونيتورينگىلەۋ جۇيەلەرىن اۆتوماتتاندىرۋ بويىنشا جۇمىستار جۇرگىزىلۋدە.
ترانسفورماتسيالاۋ جانە اۆتوماتتاندىرۋ بويىنشا ساراپشى سايات قايگەلدينوۆ اتاپ كورسەتكەندەي, اۆتوماتتاندىرۋ ءۇشىن بازا رەتىندە بيزنەس باعىت بويىنشا كومپانياعا تاۋەلدى جانە سەرىكتەس «مۇناي جانە گازدى بارلاۋ جانە يگەرۋ», «نەفتسەرۆيس» كومپانيالارىندا 2014 جىلى بىرىڭعاي ەڭبەكاقى جۇيەسىن كىرگىزۋ جونىندەگى ادىستەمە قولدانىلاتىن بولادى. بۇل جۇيە شتات كەستەسىن, شتاتتىق ورنالاستىرۋلاردى لاۋازىم جانە كاسىپتىڭ تيپتىك انىقتامالارى نەگىزىندە قۇرىلىمدى ۇيىمداستىرۋ تاريفتىك سەتكالار مەن لاۋازىمدىق جالاقىلاردىڭ كەستەسىن قۇرۋ ۇردىستەرىن اۆتوماتتاندىرۋعا مۇمكىندىك بەردى. ساراپتاۋ ءمودۋلى اۆتوماتتىق رەجىمدە قمگ باسشىلارىنا, سونداي-اق تاۋەلدى جانە ەنشىلەس كومپانيالاردىڭ باسشىلارىنا قىزمەتكەرلەر جونىندە ءتيىستى شەشىمدەر قابىلداۋ ءۇشىن قاجەتتى ساراپتامالىق اقپاراتتار قالىپتاستىرۋعا مۇمكىندىك بەرەدى.
قازىرگى كەزدە اتالمىش ءمودۋلدى ايشىقتاۋ جانە تەستىلەۋ شاراسى قمگ-گە تاۋەلدى جانە ەنشىلەس 6 كومپانيادا وتكىزىلدى. بىرىڭعاي ەڭبەكاقى ءجۇيەسى ءمودۋلى نەگىزىندە «ەڭبەكاقى قورىن جوسپارلاۋ» ءمودۋلى جاسالدى. بۇل قىزمەتكەرلەردىڭ كاسىبي جارنالارى, ەڭبەك دەمالىسىنا تولەنەتىن اقى, سىياقى, وتەماقى, جالاقىعا قوسىمشا اقى, ۇستەماقى بويىنشا ەسەپتەۋلەردى قوسقانداعى جوسپارلانعان شىعىندار ەسەبىن اۆتوماتتاندىرۋدى كوزدەيدى. ونىڭ ماقساتى – جۇمىس ۋاقىتىن ۇنەمدەۋ, جوسپارلاۋ ۇدەرىسىنىڭ تيىمدىلىگىن جانە اشىقتىعىن قامتاماسىز ەتۋ بولىپ تابىلادى.
ۇستىمىزدەگى جىلدىڭ ءۇشىنشى توقسانىندا «ماڭعىستاۋمۇنايگاز» اق ءجانە ونىڭ مۇنايسەرۆيستىك كومپانيالارىنداعى ەڭبەكاقى قورىن جوسپارلاۋدى تەستىلەۋ بەلگىلەندى. سونىمەن بىرگە, قىزمەتكەرلەر بويىنشا جوسپارلى شىعىنداردى سۇرىپتاۋ جانە ىرىكتەۋ جاعدايلارى بويىنشا ەسەپتىڭ جۇيەلىلىگىن ارتتىرۋعا مۇمكىندىك بەرۋ, جالاقى قورىنىڭ جوسپارلى شىعىندارى بويىنشا ەسەپتى اۆتوماتتاندىرۋدى قامتاماسىز ەتۋ مىندەتتەرى دە ءبىزدىڭ جوسپارىمىزدا تۇر, دەيدى جقكو HR دەپارتامەنتىنىڭ ديرەكتورى ءاليا وماروۆا.
الەۋمەتتىك احۋالدى مونيتورينگىلەۋ ماسەلەسىنىڭ ماڭىزدىلىعىن ەسكەرە كەلىپ, قازىرگى كەزدە بىرقاتار كاسىپورىنداردا الەۋمەتتىك جانجالداردىڭ الدىن الۋ جانە ولارعا كۇنى بۇرىن ۇنقاتۋ ءۇشىن قاناتقاقتى رەجيمدە «الەۋمەتتىك احۋال مونيتورينگى» ءمودۋلى ەنگىزىلەدى. الەۋمەتتىك احۋالدىڭ بارلىق دەڭگەيىن ەسەپكە الۋ ءۇشىن ارنايى ادىستەمە بەلگىلەنىپ, بۇل جۇيەنى اۆتوماتتاندىرۋ جۇمىسى قولعا الىندى.
الەۋمەتتىك احۋالدى مونيتورينگىلەۋ جونىندەگى مودۋل الەۋمەتتىك قيىندىقتاردىڭ الدىن الىپ, الەۋمەتتىك جانجالداردى بولدىرماۋعا جانە بۇل پروبلەمالاردى شەشۋ شارالارىن بەلگىلەۋگە مۇمكىندىك بەرەدى. بۇل رەتتە قىزمەتكەرلەر ءۇشىن شاعىمدانۋعا ءجانە اقپارات الۋعا قولايلى بارلىق جاعدايلار جاسالعان, – دەپ اتاپ كورسەتتى فورۋم بارىسىندا قمگ الەۋمەتتىك ساياسات دەپارتامەنتىنىڭ ديرەكتورى ەركىن راحىمبەرگەنوۆ.
جۇمىس رەسۋرستارىنىڭ قوزعالىسىن, جۇمىس ۋاقىتىن جانە كادرلاردى ەسەپتەۋ جۇيەسىن تولىق اۆتوماتتاندىرۋ كومپانيانىڭ باسقارۋ جۇيەسىنىڭ جەكەلەگەن سالالارىنداعى جۇمىسباستىلىقتى جويىپ, بۇل ۇدەرىستەردە جوعارى ءناتيجەلەرگە قول جەتكىزۋگە جاعداي جاسايدى.
بيزنەس-ۇردىستەردى اۋتسورسينگىلەۋ
كومپانيانىڭ باسەكەلەستىككە قابىلەتتىلىگىن ارتتىرۋدىڭ باستى باعىتتارىنىڭ ءبىرى – شىعىنداردى بارىنشا ازايتۋ, سوعان سايكەس ونىڭ تيىمدىلىگىن ارتتىرۋ بولىپ تابىلادى. كومپانيالاردىڭ تيىمدىلىگىن ارتتىرۋدىڭ بالامالى ءتاسىلى رەتىندە قمگ-دە ۇدەرىستەردى كەشەندى وڭتايلاندىرۋ تۋرالى شەشىم قابىلداندى. وسىعان بايلانىستى اۋتسورسينگ قىزمەتىنىڭ ءتيىمدى مودەلىن قۇرۋ مىندەتى تۋىندادى. قمگ-ءنىڭ HR باعىتى – بۇل «سامۇرىق-قازىنا» قورىنىڭ ەنشىلەس كومپانيالارىندا ترانسفورماتسيالاۋ باعدارلاماسىن ءىس جۇزىنە اسىرۋ شەڭبەرىندە «جالپى قىزمەت كورسەتۋ ورتالىعىن» (جقكو) قۇرۋ جونىندەگى جوبا. بۇل ورتالىقتىڭ باستى ماقساتى – كومپانيانىڭ تيىمدىلىگىن ارتتىرۋ, ءبىرىن-ءبىرى قايتالايتىن قىزمەتتەردى بولدىرماۋ ەسەبىنەن شىعىنداردى قىسقارتۋ, ءبىرىنشى كەزەكتە كومپانيانىڭ بيزنەس-ۇردىستەرىن ستاندارتتاۋ بولىپ تابىلادى.
– ءبىزدىڭ كومپانياداعى HR ءۇردىسى بويىنشا جقكو «سامۇرىق-قازىنا» كورپوراتيۆتىك ۋنيۆەرسيتەتىنىڭ بازاسىندا قۇرىلۋدا. اتالمىش كەزەڭدە HR ۇردىسىنە ەڭبەك قاتىناستارىن باسقارۋ, سىياقىلاردى باسقارۋ كومپانيانىڭ الەۋمەتتىك باعدارلامالارى جانە اكىمشىلىك وقىتۋ جۇيەلەرىن باسقارۋ مىندەتتەرى بەرىلەدى. بىرقاتار ۇردىستەر 2016 جىلدىڭ سوڭىندا-اق قمگ-دەن كورپوراتيۆتىك ۋنيۆەرسيتەتكە بەرىلەدى, ال 2017 جىلى قمگ بۇل جۇمىستاردى ەنشىلەس كومپانيالاردا اتقاراتىن بولادى, – دەپ اتاپ كورسەتتى «سامۇرىق-قازىنا» كورپوراتيۆتىك ۋنيۆەرسيتەتى» ديرەكتورى گۇلميرا رايىسوۆا.
بۇل كەشەندى شارالار «قازمۇنايگاز» كومپانيالارىنا جاڭا ۋاقىت تالاپتارىنا سايكەس ەكونوميكالىق تيىمدىلىككە قول جەتكىزۋ ءۇشىن ناقتى مۇمكىندىكتەر بەرەتىن بولادى.