ەلباسى نۇرسۇلتان نازارباەۆ اقمولا وبلىسىنىڭ اكىمى سەرگەي كۋلاگيندى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا س.كۋلاگين مەملەكەت باسشىسىنا ءوڭىردىڭ نەگىزگى الەۋمەتتىك-ەكونوميكالىق كورسەتكىشتەرى, مەملەكەتتىك باعدارلامالاردىڭ جۇزەگە اسىرىلۋ بارىسى, سونداي-اق, الداعى كەزەڭگە ارنالعان جوسپارلارى تۋرالى باياندادى.
نۇرسۇلتان نازارباەۆ ءوندىرىس كولەمىن ۇلعايتۋ جانە جاڭا جۇمىس ورىندارىن اشۋ ماقساتىمەن «نۇرلى جول» باعدارلاماسى اياسىندا شاعىن جانە ورتا بيزنەستى قولداۋ جۇمىستارىن جالعاستىرۋ قاجەتتىگىنە نازار اۋداردى. قازاقستان پرەزيدەنتى جىلۋ بەرۋ ماۋسىمىنا ۋاقتىلى ءارى ساپالى دايىندالۋدىڭ ماڭىزدىلىعىن دا اتاپ ءوتتى.
اقمولا وبلىسىنىڭ اكىمى بيىلعى ءبىرىنشى جارتىجىلدىقتىڭ قورىتىندىسى بويىنشا ناقتى سەكتور سالالارىندا ءوسىم كورسەتكىشى قامتاماسىز ەتىلگەنىن ايتتى. ايتالىق, ونەركاسىپ سالاسىندا ءوندىرىستىڭ ناقتى كولەم يندەكسى 106,5 پايىزعا جەتىپ, رەسپۋبليكا بويىنشا كوشباسشىلىق كورسەتكىشكە جەتتى.
س.كۋلاگيننىڭ ايتۋىنشا, يندۋستريالاندىرۋ كارتاسى اياسىندا جۇزەگە اسىرىلعان 62 جوبا 6 مىڭنان استام جۇمىس ورنىن اشۋعا مۇمكىندىك بەرگەن. جىل اياعىنا دەيىن تاعى 20 جاڭا جوبانى ىسكە قوسۋ جوسپارلانعان. اۋىل شارۋاشىلىعىندا مال باسى مەن قۇستىڭ ءوسىمى قامتاماسىز ەتىلىپ, مال شارۋاشىلىعى ءونىمدەرىنىڭ ءوندىرىسى ۇلعايدى. ءوڭىردەگى اۋىلشارۋاشىلىق داقىلدارىنىڭ ەگىس القابى 4,2 ميلليون گەكتار بولسا, سونىڭ 3,8 ميلليون گەكتارىنا استىق ەگىلگەن.
قازاقستان پرەزيدەنتىنە استانانىڭ اينالاسىندا «ازىق-ت ۇلىك بەلدەۋىن» دامىتۋ اياسىندا جۇرگىزىلىپ جاتقان جۇمىستار مەن ىسكە قوسۋ جوسپارلانىپ وتىرعان بىرقاتار جاڭا جوبالار تۋرالى دا باياندالدى.
مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرمالار بەردى.
سۋرەتتى تۇسىرگەندەر
س.بوندارەنكو, ب.وتارباەۆ