تاريحي وقيعاعا قايتا ويىسساق. سول جىلى مەكتەپ وقۋشىلارى اراسىندا جاس استانانىڭ سيمۆولى بولۋعا لايىق ارۋدى انىقتاۋ ءۇشىن كونكۋرس ۇيىمداستىرىلدى. 200 ۇمىتكەر سىنعا تۇسكەن سايىستا №31 مەكتەپتىڭ شاكىرتى ءمادينا زاكيروۆا لايىق دەپ تانىلدى.
– ارينە, بۇل استانا تاريحىنداعى ايتۋلى كۇن. وتاندىق ديزاينەرلەر ماعان ارناپ ادەمى كويلەك تىكتى. سول كەشتە ەلىمىزدىڭ تانىمال انشىلەرى باۋىرجان يساەۆ پەن ناعيما ەسقاليەۆا «استانانىڭ العاشقى تاڭى» ءانىن شىرقاعاندا, پرەزيدەنتكە گۇل شوقتارىن ۇسىندىم. قوبالجىعانىم راس. بىراق, «جاس استانانىڭ سيمۆولى», «ەۋرازيا ارۋى» دەپ حابارلاپ جاتقاندا بويىمدى تىكتەپ, تەك العا قاراي ۇمتىلدىم, – دەپ ەسكە الادى ءمادينا.
ءمادينانى العاش كورگەندە, تاڭدانىپ قالدىق. سول باياعى سۇلۋ قىز. استانامەن بىرگە قۇلپىرىپ, جىل وتكەن سايىن جاسارعانداي. ايتۋىنشا, مەكتەپ بىتىرگەن سوڭ زاڭگەر ماماندىعى بويىنشا جوعارى ءبىلىم العان. وقۋىن تامامداعاننان كەيىن ءتۇرلى ءسان اگەنتتىكتەرىنەن بىرلەسىپ جۇمىس ىستەۋگە شاقىرتۋ الىپتى. الايدا, بارىنەن باس تارتىپ, ۇلتتىق كومپانياعا جۇمىسقا ورنالاسادى. ماقساتى – ءوز سالاسىنىڭ مامانى بولۋ. كەيىننەن ومىرلىك جارىن جولىقتىرىپ, تۇرمىسقا شىعادى.
«قىزدىڭ باستى ماقساتى – كەلىن بولۋ. اتا-انامنان العان تاربيەم عوي, ءوز وتباسىمنىڭ, ءوز بالالارىمنىڭ بولعانىن قالادىم. ويتكەنى, ءسابيدى ومىرگە اكەلۋ بار, ال ونى ءتاربيەلەپ, ازامات قاتارىنا قوسۋ ۇلكەن جاۋاپكەرشىلىكتى قاجەت ەتەدى» دەيدى ول.
ءمادينا ينجەنەرلەر وتباسىنان شىققان. اكەسى قانات بازكەن ۇلى استاناعا ەڭبەگى سىڭگەن ينجەنەر. سوناۋ ەلوردا قۇرىلىسى قايناپ تۇرعان شاقتا ونىڭ جەتەكشىلىگىمەن بىرنەشە تۇرعىن ۇيلەر, زاۋىتتار, كومبيناتتار سالىنعان. ال, اناسى ءمارياش كوشەربايقىزى «تسەلينوگراد تياجستروي» كاسىپورىنىندا تالاي جىل جۇمىس ىستەگەن. قازىر جەكە كاسىپپەن اينالىسادى.
بۇگىندە ءمادينانىڭ ءوزى وسكەنباەۆتار اۋلەتىنىڭ كەلىنى. كوپبالالى انا. جولداسى الماز ەكەۋى ەكى ۇل, ەكى قىز تاربيەلەپ وتىر. ارينە, بالالارىنا باس-كوز بولىپ, ولاردى ەركەلەتەتىن اتا-ەنەسىنىڭ بارىنا شۇكىرشىلىك ايتادى.
– ءبىر اۋلەتكە جاڭادان كەلىن بولىپ تۇسكەننەن كەيىن, ءسىڭىسىپ كەتۋىڭ كەرەك. بۇل رەتتە انام ءمارياش پەن دۇنيەدەن وتكەن اكەم قاناتقا قارىزدارمىن. ولاردىڭ ءومىر بويى بەرگەن ءبىلىمى, ءتالىم-تاربيەسىنىڭ ارقاسىندا سۇيىكتى كەلىن اتاندىم. اللاعا شۇكىر, اتا-ەنەم دە جاقسى ادامدار. مەنى ءوز قىزدارىنداي باۋىرىنا باستى. بىلمەگەنىمدى ءۇيرەتتى. ەڭ باستىسى وتباسىمىزدا بەرەكە بار, – دەيدى ول.
نەگىزىندە, وسكەنباەۆتار ءاۋلەتى استانالىقتارعا ەتەنە تانىس. اۋلەتتىڭ اكەسى بولات ايتپاي ۇلى وسكەنباەۆ زەينەت دەمالىسىنا شىققانشا قۇقىق قورعاۋ ورگاندارى سالاسىندا ەڭبەك ەتكەن. استانا قالاسى جول پوليتسياسى باسقارماسىنىڭ باستىعى بولعان. ەلوردانىڭ گۇلدەنۋىنە, جولداعى ءتارتىپتى قاداعالاۋعا ۇلەس قوسقان ازامات. زايىبى مانشۇك سەرىكپايقىزى بىلىكتى دارىگەر, بار عۇمىرىن مەديتسينا سالاسىنا ارناپ كەلەدى.
– «ادام ۇرپاعىمەن جاسايدى», ءتاپ-ءتاتتى نەمەرەلەرىمىزدىڭ قۇلدىراڭداپ جۇگىرگەنى قۋانتادى. ءاربىر جەتىستىگىنە ءماز بولامىز. بالام مەن كەلىنىمنىڭ ۇلكەن قىزى ايدانا 6-سىنىپقا ءوتتى. اتقا مىنگەندى ۇناتادى. تىگىن تىگىپ, اناسىنا تاعامدار دايىنداۋعا كومەكتەسەدى. ودان كەيىنگى نەمەرەم ءالمانسۇر 3-سىنىپقا كوشەدى. ءوزى فۋتبولمەن اۋەستەنەدى. بيىل 1-سىنىپقا باراتىن ابدۋلمالىك تە سپورتقا قۇمار, ونىڭ ىشىندە كاراتە جانە حوككەي ۇيىرمەلەرىنە بارىپ ءجۇر. ال, ەكى جاستاعى كىشكەنتاي ەركە ءامينامىز كوز-قۋانىشىمىز. يناباتتى كەلىن – ۇلتتىڭ ۇيىتقىسى, دەپ جاتامىز عوي. ءبىزدىڭ ءاۋلەتتىڭ شىن جاناشىرى, جاسى كەلگەن كىسىنى سىيلاپ, جان-جاعىنا ىزەتتىلىك تانىتا بىلگەن ءمادينانى ءبىز دە ماقتان تۇتامىز, – دەيدى مانشۇك اپاي.
اڭگىمە اراسىندا, ءمادينا ەلوردانى جانىنداي جاقسى كورەتىنىن ايتتى. قالامىزدىڭ جەتكەن ءاربىر جەتىستىگىنە شىن قۋانا بىلەتىن پاتريوت جانداردىڭ قاتارىندا ەكەنىن جاسىرمادى.
– استانا كوز الدىمىزدا كوركەيۋدە. حالىقارالىق جيىنداردىڭ ورتالىعىنا اينالىپ ۇلگەردى. تۇرعىنداردىڭ جايلى ءومىر سۇرۋىنە بارىنشا جاعداي جاسالۋدا. اسىرەسە, بالالارىمىزدىڭ بولاشاعى زور بولادى دەپ ويلايمىن. ەلوردانىڭ ءاربىر تۇرعىنى باقىتتى بولسا ەكەن دەپ تە ارماندايمىن. ەلىمە تەك بەيبىتشىلىك, جاقسىلىق تىلەيمىن, – دەيدى اعىنان جارىلا.
استانانىڭ تۇساۋكەسەر راسىمىندە ءمادينا كيگەن كويلەكتىڭ ەرەكشەلىگى – ماتادان تىگىلمەگەندىگى. قولمەن توقىلعان. كرينولين, ءمولدىر مونشاق, ءتۇرلى-ءتۇستى ۇساق تاستارمەن اشەكەيلەنگەن. ءارى جىبەك كەستەمەن ورنەكتەلگەن. 36 تۇستەن تۇراتىن كويلەك پايەتكا جانە ۆەنەتسيالىق بيسەرمەن توقىلعاندىقتان ەرەكشە جارقىرايدى. سالماعى – 9 كەلى.
قازاقستاندا ەڭ العاشقى اشىلعان «ءوحى» ءسان ءۇيىنىڭ بۇل كويلەگى تاريحي ەكسپونات دەپ تانىلعان. «استانا-ەۋرازيا ارۋى» كومپوزيتسياسى رەتىندە كۇنى كەشەگە دەيىن پرەزيدەنت مادەنيەت ورتالىعىنا كەلۋشىلەردىڭ نازارىن اۋدارتتى. ءبىر قىزىعى, قازاقستاندىق ون شەبەردىڭ قولىنان شىققان تۋىندى جۇمىسىنا سەگىز اي ۋاقىت كەتكەن كورىنەدى. قۇنى سول جىلدارى استاناداعى ءۇش بولمەلى پاتەردىڭ باعاسىنا تەڭ تۇسكەن. اۆتورى ءارى باس ديزاينەرى – وكسانا كوربي-شامينا.
2000 جىلى ماسكەۋدە وتكەن «ءححى عاسىر – جاڭا رەسەي» اتتى حالىقارالىق كورمەدە «قازىرگى زامانعى قازاقستان تاريحى» ءسان كوللەكتسياسىنا ەنگەن اتالمىش كويلەك جوعارى باعالانعان. فرانتسۋز ءسان قاۋىمداستىعىنىڭ پرەزيدەنتى شارل دە كوستەل-باجاكا فەستيۆالدىڭ ارناۋلى جۇلدەسىمەن ماراپاتتاعان. وسى بايقاۋدان كەيىن تاريحي ءساتتىڭ كۋاسىنە اينالعان كويلەك بۇرىنعى پرەزيدەنت مادەنيەت ورتالىعىنا تاپسىرىلعان ەكەن.
گۇلميرا ايماعانبەت,
جۋرناليست