قوستاناي وڭىرىندە بالىقشىلار تورۋىلدايتىن كولدەر جەتكىلىكتى. التىنسارين اۋدانىنداعى تسىگان كولىنەن دە دەمالىستىڭ وسى ءتۇرىن ۇناتاتىندار ولجاسىز قايتپايدى. كانىگى بالىقشىلاردىڭ ءبىرى الەكساندر شيبانوۆ ولجاسىنا ءوزى تاڭعالدى. ونىڭ قارماعىنا تۇسكەن موڭكە بالىقتىڭ باسى بالىقتان گورى تورعايعا كوبىرەك ۇقسايدى.
– مەن بالا كەزىمنەن بالىق اۋلايمىن. الپىس جىلعا جاقىن ۋاقىت ىشىندە قارماعىما قانداي بالىق تۇسپەدى دەيسىز. 6 كيلوگرامم شورتان, 1,5 كيلوگرامم تارتاتىن موڭكە بالىق ۇستاعان كەزدەرىم بولدى. بىراق قارماعىما قانداي ءىرى بالىق ىلىنگەندە دە ءدال بۇلاي تاڭعالماعان ەدىم, – دەپ اعىنان جارىلدى بالىقشى ا.شيبانوۆ. الايدا ول بالىقتىڭ تورعايعا ۇقساعان تۇمسىعىن جاراتىلىستىڭ «قاتەلىگى» دەپ وتىرعان جوق.
– موڭكە بالىق بۇرىن قارماققا ءىلىنىپ قالىپ, جۇلقىنعاندا قايتا شىعىپ كەتكەن بولۋى كەرەك. سودان قارماق قاۋىپ, زاقىمدانعان اۋىزى قيسىق وسكەندە, تورعايدىڭ تۇمسىعىنا ۇقساپ كەتكەن عوي, – دەپ ءتۇسىندىردى بالىقشى.
وسى ساپارىندا بالىقشىنىڭ قارماعىنا «تورعاي» بالىقتان باسقا ەشتەڭە تۇسپەپتى. اۋا رايى قولايسىز كەزدە بالىق قارماق قاپپايدى. انشەيىندە شەلەكتەپ بالىق اۋلايتىن الەكساندر بۇل جولى وكىنگەن جوق, وعان «تورعاي» بالىقتىڭ قىزىعى دا جەتىپ-ارتىلدى. قوستانايعا كەلگەن سوڭ ول جاقىن تۋىستارى مەن دوستارىنا, كورشى-كولەمىنە كورسەتىپ, جۇرتتى دا ءماز قىلدى.
ءنازيرا جارىمبەتوۆا,
«ەگەمەن قازاقستان»
قوستاناي