[caption id="attachment_48648" align="aligncenter" width="560"] فوتو: vk.com[/caption]
فۋتبولدان ەۋروپا چەمپيوناتىنىڭ 1/8 فينالىندا العاش بولىپ شىققان شۆەيتساريا مەن پولشا قۇراما كوماندالارى سەنت-ەتەن قالاسىندا كەزدەستى.
شۆەيتساريا – پولشا 1:1 (0:1) پەنالتي 4:5
ستاديون: «جوففرۋا گيشار».
تورەشى: مارك كلاتتەنبۋرگ.
شۆەيتساريا: زوممەر, ليحتشتاينەر, شيور, دجۋرۋ, رودريگەس, بەحرامي (فەرناندەش 77),دجاكا, شاكيري, دجەمايلي
(ەمبولو 58), مەحمەدي (دەرديوك 70), سەفەروۆيچ.
پولشا: فابيانسكي, پيششەك, گليك, پازدان, ەندجەيچيك, بلاششيكوۆسكي, كرىحوۆياك, مونچينسكي (يودلوۆەتس 101),
گروسيتسكي (پەشكو 104), ميليك, لەۆاندوۆسكي.
گول: شاكيري 82 – بلاششيكوۆسكي 39
پەنالتي سەرياسى: 1:0 – ليحشتاينەر, 1:1 – لەۆاندوۆسكي, 1:1 – دجاكا (قيسىق كەتتى), 1:2 – ميليك, 2:2 – شاكيري, 2:3 – گليك, 3:3 – شەر, 3:4 – بلاششيكوۆسكي, 4:4 – رودريگەس, 4:5 – كرىحوۆياك.
ەسكەرتۋ العاندار: شيور 55, دجۋرۋ 117 – ەندجەيچيك 58, پازدان 111
[caption id="attachment_48649" align="aligncenter" width="560"] فوتو: vk.com[/caption]
بۇگىن جانكۇيەرلەر تارتىسقا تولى ماتچتىڭ كۋاسى بولدى. ەكى كوماندانىڭ كەزەك-كەزەگىمەن ۇيىمداستىرعان شابۋىلدارى قاۋىپتى اياقتالىپ جاتتى. وسىنداي ساتتەردىڭ بىرىندە قاقپاشى لۋكاش فابيانسكيدىڭ دوپتى دەرەۋ ارىپتەسىنە لاقتىرىپ, كومانداسىنىڭ قارىمتا شابۋىلعا شىعۋىنا مۇمكىندىك جاساپ بەردى. وسىدان كەيىن اتويلاپ العا شىققان پولياكتار نەبارى ءۇش مارتە پاس الماسىپ بارىپ, ەسەپ باسىن اشتى. كاميل گروسيتسكيدىڭ بەرگەن دوبىن ياكۋب بلاششيكوۆسكي ويلانباستان قاقپاعا باعىتتاپ, العاشقى گولدىڭ اۆتورى اتاندى. ياكۋب وسىمەن ءوز كومانداسىنىڭ ءدۇبىرلى دوداداعى بەسىنشى دوبىنىڭ سوعىلۋىنا كومەكتەسكەن ەكەن.
شۆەيتسارلار بۇل قاتەلىكتەرىنەن كەيىن تارازى باسىن تەڭەستىرۋ ءۇشىن بارىن سالدى. نەگىزگى ۋاقىتتىڭ اياقتالۋىنا 8 مينۋت قالعاندا, ياعني 82-مينۋتتا دجوردان شاكيريدىڭ كەرەمەت سوققىسىنىڭ ارقاسىندا دەگەندەرىنە جەتتى. اياعىنا كەلە قالعان دوپتى ول ءبىر جاق يىعىنا قاراي قۇلاپ بارىپ تەپكەندە قاقپانىڭ تورىنان ءبىر-اق شىقتى. بۇل بيىلعى ەۋروپا چەمپيوناتىنداعى ۇزدىك گولداردىڭ ءبىرى بولۋى مۇمكىن.
ماتچتىڭ نەگىزگى 90 مينۋتى 1:1 ەسەبىمەن اياقتالعاندىقتان, قوس كوماندا ەكسترا-تايمدا باقتارىن سىنادى. الايدا, قوسىمشا بەرىلگەن 30 مينۋتتا دا ەسەپ وزگەرىسسىز قالدى. ال پەنالتي سەرياسىندا پولشا قۇراماسىنىڭ باعى جانىپ, العاش بولىپ ¼ فينالعا شىقتى. ءوزىنىڭ ەرەكشە ويىنىمەن كوزگە تۇسكەن دجوردان شاكيري ماتچتىڭ ۇزدىك ويىنشىسى اتاندى.
ايان ءابدۋالي.