كەشە ورتالىق كوممۋنيكاتسيالار قىزمەتىندە «استانا ەكسپو-2017» ۇلتتىق كومپانياسىنىڭ قولداۋ كورسەتۋىمەن «بولاشاققا كوزقاراس: وزەكتى مۇرا» اتتى كورمەنىڭ اشىلۋ سالتاناتىنا وراي ۇيىمداستىرىلعان ءباسپاسوز ءماسليحاتى ءوتتى. جيىنعا ۇلتتىق مۋزەيدىڭ زاماناۋي ونەر ورتالىعىنىڭ جەتەكشىسى روزا ابەنوۆا, تاۋەلسىز جەتەكشى, ارتسىنشى يۋليا سوروكينا, ساۋلەتشى ساكەن نارىنوۆ قاتىسىپ, ءوز ويلارىمەن ءبولىستى.
جوبانىڭ تۇپكى ماقساتى – كوكەيكەستى ونەر سالاسىندا جۇمىس جاسايتىن, ءوز وتانىنان گورى شەت مەملەكەتتەردە تانىمال بولعان وتاندىق سۋرەتشىلەردىڭ شىعارماشىلىعىن دارىپتەۋ جانە ولاردىڭ تىڭ تۋىندىلارىمەن جاقىنىراق تانىستىرۋ.
ال ءتۇس اۋا ەلورداداعى ۇلتتىق مۋزەيدە اتالعان كورمەنىڭ اشىلۋ ءراسىمى ءوتتى. كورمەگە ساكەن نارىنوۆ, راشيد نۇرەكەەۆ, يۋليا سوروكينا, ەلەنا ۆوروبەۆا جانە ساۋلە دۇيسەنبينانىڭ تۋىندىلارى قويىلدى. سۋرەتشىلەر ءارتۇرلى كوركەمونەر باعىتتارىندا جۇمىس جاسايدى جانە ولاردىڭ ارقايسىسىنىڭ ءوز ەلىنىڭ رۋحاني زەردەسىنىڭ قالىپتاسۋىنا قانداي دا ءبىر قوسقان ۇلەسى بار. سونىڭ ىشىندە «استرا نومادس» اتتى يۋليا سوروكينانىڭ ەرەن ەڭبەگى بار. ديگيتالدى, ساندىق مۇراعات ەسەبىندە جۇزەگە اسقان جوبا 30 جىلدان بەرى وسى ونەردى ۇستانعان ورتالىق ازيا سۋرەتشىلەرىنىڭ شىعارمالارىن جيناقتاعان. اتالعان رەسۋرس ۆيرتۋالدى توپتامالاردىڭ قۇرامىنا كىرەدى جانە ورتالىق ازياداعى ۆيرتۋالدى مۋزەيدىڭ سىناق جوباسى بولىپ تابىلادى.
ال سۋرەتشى, تۇرمىستىق زاتتار جىرشىسى راشيد نۇرەكەەۆتىڭ تۋىندىلارى جەرگىلىكتى جانە جاھاندىق الەۋمەتتىك-ساياسي, مادەني قۇبىلىستاردى قامتىپ كورسەتەدى جانە ءوز ەلىنىڭ بۇگىنى مەن كەلەشەگى تۋرالى تولعانىستارعا باعىتتالعان سىني پىكىرلەردەن تۇرادى.
ونەر مەن عىلىم ساكەن نارىنوۆتىڭ قىزىعۋشىلىعىنىڭ بولىنبەس سالالارىن قۇرايدى. ونىڭ «استەرويدتىڭ سوڭعى ۇشۋى: اۆتوپورترەت» اتتى ارت-نىسانى كوپتەگەن اسەم جانە «جەرگە ءتان ەمەس» نارسەلەردى جاساعان 70 جاستاعى سۋرەتشىنىڭ شىعارماشىلىق قورىتىندىسىنا ۇقسايدى. ونىڭ جۇمىستارىندا شىندىقتىڭ ءمانىن ءتۇسىنۋ, بۇكىل الەمدى جانە ونىڭ جۇمىس ىستەۋ زاڭدارىن تانۋ ءۇشىن ادام باستى قۇرال ءارى قوزعاۋشى كۇش بولىپ تابىلادى.
ەلەنا ۆوروبەۆا مەن ۆيكتور ۆوروبەۆ اتاقتى شىعارماشىلىق جۇپ بولىپ سانالادى. كورمەدە ەلەنانىڭ شىعارماشىلىعى كەسكىندەمە جانرى ارقىلى تانىستىرىلادى. ءبىر قاراعاندا, ونىڭ كارتينالارىنىڭ سيۋجەتتەرى – كوفە شاينەگى, مايىسقان شانىشقى, جالعىز رومكە, كىشكەنتاي اق ءشاينەك سياقتى كۇندەلىكتى تىرشىلىكتىڭ زاتتارىن بەينەلەيتىن تۇرمىستىق قاراپايىم كومپوزيتسيالار. دەگەنمەن, ءۇڭىلىپ قاراۋ ارقىلى ءسىز فيلوسوف-سۋرەتشى بوياۋدى بەينەلى جاعۋ, تۇستەردى مينيمالدى ءۇيلەستىرۋ جانە كومپوزيتسيالىق شەشىمىنىڭ قيسىنسىزدىعىمەن قول جەتكىزەتىن جان تولعانىسىنىڭ تولقىنىن, ۇرەيدى جانە تولقۋدى سەزىنەسىز.
ساۋلە دۇيسەنبينا ءوزىنىڭ گرافيكالىق تۋىندىلارىنىڭ كوللاجىنان تۇراتىن «جادى كارتاسى» دەپ اتالاتىن جۇمىستار توپتاماسىن جانە ءبىر كەزدەرى بەلگىلى «كوشپەلىلەر» ءفيلمىنىڭ جۇمىس ماتەريالى بولعان ەسكى فوتوسۋرەتتەردى ۇسىنعان. سۋرەتشى ءوزىن وسى تۇلعالاردان تابۋعا, ءوزىنىڭ ولارعا ۇقساستىعىن سەزىنۋگە تىرىسادى, وتكەننىڭ تۇسىنىگىنىڭ ورنىن تولتىرۋعا, ءوزىڭنىڭ كىم ەكەنىڭدى ۇمىتپاس ءۇشىن مادەني جادىنى قايتارۋعا تىرىسادى.
كوكەيكەستى ونەردى ءتۇسىنۋ پوستكەڭەستىك ايماق كەڭىستىگىنە قايتا قۇرۋمەن بىرگە 1990-جىلداردىڭ ورتاسىندا كەلدى. وسى كەزەڭدە سۋرەتشىلەر وزدەرىندەگى دە, كورەرمەندەردەگى دە ونەردى قابىلداۋ تاپتاۋرىندارىن بۇزا وتىرىپ, زاماناۋي ونەردىڭ «باتىستىق» ءتۇرىن شابىتپەن مەڭگەردى. ولار وزدەرىن جاڭا ەلدىڭ جاڭا تاريحىن جاساۋشىلار رەتىندە سەزىنىپ, ساياسي-قوعامدىق, الەۋمەتتىك جانە مادەني ومىردەگى قارقىندى وزگەرىستەردى تەرەڭ سەزىندى. الايدا, ولاردىڭ شىعارماشىلىعى كوپشىلىككە تۇسىنىكسىز بولدى. سۋرەتشىلەردىڭ جاساعاندارىنىڭ بارلىعى جەكە قۇلشىنىس پەن قازاقستاندىق زاماناۋي ونەردىڭ حالىقارالىق مادەني كەڭىستىكپەن بىرىگۋىنىڭ قاجەتتىلىگىنە دەگەن شىنايى سەنىمگە نەگىزدەلدى.
ايتا كەتەيىك, اتالعان كورمە 23 تامىزعا دەيىن جالعاساتىن بولادى.
راۋشان تاۋىرحانقىزى,
جۋرناليست