كۇنى كەشەگە دەيىن شەتەلدەن تاسىمالدانىپ كەلگەن ليمون ءوڭتۇستىك جۇرتى ءۇشىن تاڭسىق بولۋدان قالدى. سارىاعاش, سايرام ديقاندارى ءوسىرىپ كەلگەن ءتسيترۋستى جەمىس بۇگىندە تاۋلى اۋدان سانالاتىن قازىعۇرتتا دا جەرسىنە باستادى.
قازىعۇرت اۋدانى, قاقپاق اۋىلىنىڭ تۇرعىنى ءوسپانالى تاقسىقباەۆ جىلىجايعا وتىرعىزعان 640 ءتۇپ ليمون اعاشىنىڭ ارقايسىسىنان 17-18 كيلو ارالىعىندا جەمىس جيناپ الدى.
اسا مىقتى دارۋمەندەر قاتارىنا جاتقىزىلاتىن ليموننىڭ باعاسى دا كوڭىلدەگىدەي. ديقان جيناپ العان ون ءبىر توننا ليموننان تۇسكەن تابىس ونى قاناتتاندىرىپ, جىلىجاي كولەمىن تاعى دا ارتتىرۋعا بەل بايلاتىپ وتىر.
سارىاعاشتاعى تاجىك ورتا مەكتەبىنىڭ ديرەكتورى ەككەن ليمون تۋرالى گازەتىمىزدە بۇرىنىراقتا جازعان ەدىك. اۋەلدە قان قىسىمىن تومەندەتۋ ماقساتىندا ەككەن وتباسى ليموننىڭ ۇلكەن پايدا كوزى ەكەندىگىنە كوز جەتكەن. بۇگىندە ولاردىڭ ءونىمىن جىل سايىن رەسەي كاسىپكەرلەرى كوتەرمە باعامەن الىپ كەتەدى.
وسىلايشا, ليمون جەمىسى اششى بولعانىمەن, تابىسى ءتاتتى بولىپ تۇر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى