كەشە ماسكەۋ قالاسىندا تاۋەلسىز مەملەكەتتەر دوستاستىعىنا قاتىسۋشى مەملەكەتتەر قورعانىس مينيسترلەرى كەڭەسىنىڭ وتىرىسى ءوتتى. وتىرىسقا قورعانىس ءمينيسترى يمانعالي تاسماعامبەتوۆ باستاعان قازاقستاندىق دەلەگاتسيا قاتىستى.
باسقوسۋ بارىسىندا تاراپتار 18 ماسەلەنى تالقىلادى. ونىڭ ىشىندەگى بەس ماسەلە تمد اۋە شابۋىلىنا قارسى قورعانىستىڭ بىرىكتىرىلگەن جۇيەسىن دامىتۋ جانە ونى قامتاماسىز ەتۋ توڭىرەگىندە بولدى.
سونداي-اق, كۇن تارتىبىنە بيىلعى جىلدىڭ 30 شىلدەسى مەن 13 تامىزى ارالىعىندا وتەتىن 2016 جىلعى حالىقارالىق ارميا ويىندارىندا تمد-عا قاتىسۋشى مەملەكەتتەردىڭ قارۋلى كۇشتەرىنەن قاتىساتىن كوماندالار جونىندە ماسەلە ەنگىزىلدى. الدىن الا بەلگىلى بولعان دەرەكتەرگە سۇيەنسەك, ارميا ويىندارىنا 47 مەملەكەتتەن 114 كوماندا قاتىسادى. حالىقارالىق سايىستا 23 ءتۇرلى بايقاۋ وتكىزىلمەك, ولاردىڭ ىشىندە ەكى بايقاۋ – «ارتيللەريا الاۋىنىڭ شەبەرى» جانە «مەرگەن شەبى» سايىستارى العاش رەت قازاقستان رەسپۋبليكاسى اۋماعىنداعى پوليگونداردا وتكىزىلەدى. ايتا كەتەيىك, قازاقستاندىق اسكەري قىزمەتشىلەر بايقاۋدىڭ بارلىق ءتۇرى بويىنشا قاتىسادى.
قورعانىس ۆەدومستۆولارىنىڭ باسشىلارى تمد-عا مۇشە مەملەكەتتەردىڭ اۋە-عارىشتىق قورعانىسى تۋرالى تۇجىرىمداماسىن ماقۇلدادى. اتالعان تۇجىرىمداما تمد-عا مۇشە مەملەكەتتەردىڭ اۋە شابۋىلىنا قارسى قورعانىسىنىڭ بىرىكتىرىلگەن جۇيەسىن بىرلەسكەن قورعانىستى تەك اۋەدە عانا ەمەس, اۋە-عارىشتىق دەڭگەيىندە قامتاماسىز ەتۋدى ءارى قاراي جەتىلدىرۋ قاجەتتىلىگىمەن بايلانىستى.
قورعانىس مينيسترلەرىنىڭ كەزدەسۋى بارىسىندا تمد قورعانىس مينيسترلەرى كەڭەسىنىڭ جانىنداعى ۇيلەستىرۋ كوميتەتىنىڭ اسكەري ءبىلىم ماسەلەسى بويىنشا قىزمەتى مەن دوستاستىق ەلدەرىنىڭ قارۋلى كۇشتەرىندەگى مەملەكەتتىك قۇپيالاردى قورعاۋ قىزمەتتەرىنىڭ ءوزارا ءىس-قيمىلى تالقىلاندى.
وتىرىس بارىسىندا ءبىرنەشە بايانداما تىڭدالدى. قازاقستاندىق دەلەگاتسيانىڭ اتىنان ەلىمىز قارۋلى كۇشتەرىنىڭ مەملەكەتتىك قۇپيالاردى قورعاۋ جانە اقپارات قاۋىپسىزدىگى باس باسقارماسىنىڭ باستىعى پولكوۆنيك قايناربەك قوجاحمەتوۆ بايانداما جاسادى. ول اسكەري ىنتىماقتاستىق توڭىرەگىندەگى مەملەكەتارالىق قۇپيالاردىڭ ساقتالۋىن قامتاماسىز ەتۋدەگى قىزمەتتىڭ ءوزارا ءىس-قيمىلى تۋرالى باياندادى.
بۇدان باسقا, 2015 جىلى قارۋلى كۇشتەردەگى اسكەري سالانىڭ ىنتىماقتاستىعى جانە اۆياتسيالىق ۇشۋلاردىڭ قاۋىپسىزدىك جاعدايى بويىنشا تمد-نىڭ شارتتى-قۇقىقتىق بازاسىنا باعا بەرىلدى. قورعانىس ۆەدومستۆولارىنىڭ باسشىلارى كەڭەسىنىڭ سوڭىندا تمد-عا مۇشە مەملەكەتتەردىڭ قارۋلى كۇشتەرىندەگى شتابتار باستىقتارى كوميتەتىنىڭ قىزمەتتەرىن جانە 2020 جىلعا دەيىن قارۋلى كۇشتەردە اسكەري قولدانبالى سپورت تۇرلەرىن دامىتۋدى رەتتەيتىن قۇجاتتار قابىلداندى.
«ەگەمەن-اقپارات»