ءال-فارابي اتىنداعى قازۇۋ عالىمدارى مەن بۇۇ, يۋنەسكو وكىلدەرىنىڭ بىرلەسكەن ءماجىلىسىندە ۋنيۆەرسيتەت رەكتورى عالىمقايىر مۇتانوۆ يۋنەسكو-نىڭ باس ديرەكتورى يرينا بوكوۆانىڭ قولى قويىلعان, ۋنيۆەرسيتەتتە تۇراقتى دامۋ بويىنشا يۋنەسكو حالىقارالىق كافەدراسىنىڭ اشىلۋىن رەسمي تۇردە راستايتىن قۇجاتتى سالتاناتتى تۇردە رەسىمدەدى.
ءىس-شارادا قازاقستان, قىرعىزستان, تاجىكستان جانە وزبەكستان بويىنشا يۋنەسكو كلاستەر بيۋروسىنىڭ الماتىداعى ديرەكتورى اندرەي شەۆەلەۆ جاڭا يۋنەسكو كافەدراسىنىڭ ساپالى ءبىلىم بەرۋ, گەندەرلىك تەڭدىك, لايىقتى جۇمىس پەن ەكونوميكالىق دامۋ, تۇراقتى قالالار, كليمات وزگەرىسىمەن كۇرەس, ەكوجۇيەلەردىڭ ساقتالۋى, بىرلىك پەن ىنتىماقتاستىقتى العا تارتۋ سىندى تۇراقتى دامۋ ماقساتتارىنا جەتۋدە ماڭىزدى ءرول اتقاراتىنىن اتاپ ءوتتى.
سونداي-اق, قازاقستان كوميسسياسىنىڭ يۋنەسكو جانە يسەكو جۇمىستارى بويىنشا باس حاتشىسى اسەل وتەگەنوۆا ۋنيۆەرسيتەتتىڭ تۇراقتى دامۋ شەشىمىنە قوسقان ۇلەسىن اتاپ وتسە, يرينا بوكوۆا حانىم: «تۇراقتى دامۋ بويىنشا ماقساتتاردى تابىستى ىسكە اسىرۋ تەك كوشباسشىلاردىڭ موينىنداعى جۇمىس ەمەس, ەڭ الدىمەن ازاماتتىق قوعامنىڭ جۇمىسى» ەكەندىگىن اتاپ كورسەتتى.
بۇۇ-نىڭ الماتى بويىنشا قوعامدىق اقپارات دەپارتامەنتىنىڭ ديرەكتورى ۆلاستيميل سامەك ۋنيۆەرسيتەتتى اتالمىش كافەدرانىڭ اشىلۋىمەن قۇتتىقتاي وتىرىپ, بۇل قادامنىڭ جاستاردىڭ مۇمكىندىكتەرىن ارتتىرىپ, الەۋمەتتىك يننوۆاتسيالار مەن وزگەرىستەرگە, الەمدىك مادەنيەتتىڭ قالىپتاسۋىنا ءوز سەپتىگىن تيگىزەتىنىنە سەنىم ءبىلدىردى.
گۇلزەينەپ سادىرقىزى,
«ەگەمەن قازاقستان»
ۋنيۆەرسيتەت رەكتورى اتالمىش كافەدرا دەموكراتيالىق قۇندىلىقتار, سونىڭ ىشىندە, تولەرانتتىلىق, پليۋراليزم, ادام قۇقىعىن قۇرمەتتەۋ, بوستاندىق ۇعىمدارى العا قويىلاتىن پىكىرتالاس الاڭى بولاتىنىن راستادى. يۋنەسكو كافەدراسى قىزمەتى شەڭبەرىندەگى جوبالاردى ىسكە اسىرۋ تۇراقتى دامۋ اينالاسىندا مەملەكەت پەن اۋدان الەۋەتىن ارتتىرۋعا قولداۋ كورسەتۋ باعىتىنداعى باستامالارعا جاڭا سەرپىن بولارى انىق.
الماتى