اقش-تا ءوتىپ جاتقان امەريكا كۋبوگى تۋرنيرىندە D گرۋپپاسىنىڭ كوماندالارى كەزدەستى. ارگەنتينا قۇراماسى پاناما كومانداسىنا بەس گول سوعىپ, 5:0 ەسەبىمەن جەڭىسكە جەتتى. ال چيلي مەن بوليۆيا اراسىنداعى ويىن 2:1 ەسەبىمەن اياقتالدى.
ارگەنتينا – پاناما 5:0
گولدار: نيكولاس وتامەندي 7, ليونەل مەسسي 68, 78, 87, كۋن اگۋەرو 90
ارگەنتينا قۇراماسى بۇل ويىندا كەزەكتى ءۇش ۇپايىن يەلەنىپ, D توبىندا ءبىرىنشى بولىپ كەلەدى. كەزدەسۋ بارىسىندا «مانچەستەر سيتي» كلۋبىنىڭ قورعاۋشىسى نيكولاس وتامەندي 7-مينۋتتا گول سوعىپ, ەسەپ باسىن اشتى. ال ەكىنشى تايمدا الاڭعا شىققان كوماندا كاپيتانى, بەس دۇركىن «التىن دوپ» يەگەرى ليونەل مەسسي نەبارى 20 مينۋتتىڭ ىشىندە بىرىنەن كەيىن ءبىرىن سوعىپ, ءۇش دوپتىڭ يەسى اتاندى. ماتچ اياقتالار تۇستا شابۋىل شەبىندە ونەر كورسەتەتىن كۋن اگۋەرو ءبىر گولىمەن كوزگە تۇسە ءبىلدى. پاناما ءوز كەزەگىندە بىرنەشە رەت شابۋىلداعانىمەن «البيسەلەستە» ويىنشىلارىنا دارىتىپ ەشنارسە ىستەي المادى.
چيلي – بوليۆيا 2:1
گولدار: ارتۋرو ۆيدال 46, 90+10 (پەنالتي) – ماتياس كامپوس 61
بۇل ماتچتا «باۆاريا» فۋتبول كلۋبىنىڭ ويىنشىسى ارتۋرو ۆيدالدىڭ سوققان ەكى گولىنىڭ ارقاسىندا چيلي جەڭىسكە جەتتى. ول 46 مينۋتتا قاقپانى ءدال كوزدەسە, كەزدەسۋ اياقتالار تۇستا پەنالتيدىڭ ارقاسىندا جەڭىستى ج ۇلىپ الدى. ال بوليۆيا كومانداسى 61 مينۋتتا ماتياس كامپوس سوققان دوپپەن تارازى باسىن تەڭەستىرە ءبىلدى. الايدا, بۇل گول تەڭ ەسەپتى ۇستاپ تۇرۋ ءۇشىن جەتكىلىكسىز بولدى.
ايان ءابدۋالي.
دەرەك, فوتو: vk.com.