قازىرگى قازاق قوعامى قىز اتاۋلىعا قىرىن قارايتىنداي ما, قالاي؟ بابالاردان جەتكەن قۇرمەت-سىيدىڭ كوكەسى قىزدارعا ارنالماۋشى ما ەدى! «قىز – جاتجۇرتتىق» دەپ تورگە وزدىراتىن قاشاندا. اقىن بىتكەننىڭ ادەبيەت الەمىنە باسقان قادامى دا, تىرناقالدى تۋىندىسى دا بويجەتكەندەر اۋىلىنان باستاۋ الاتىن.
وسى تۇستا ويىما اقىن توقاش بەردياروۆتىڭ قاناتقاقتى ولەڭى ءتۇسىپ وتىرعانى. اقىننان جۋرناليستەردىڭ ءبىرى: «تۇڭعىش جازعان ولەڭىڭىز ەسىڭىزدە مە؟» دەپ سۇرايدى. «ەسىمدە, ءتورتىنشى سىنىپتا وقىپ ءجۇرگەندە جوعارى سىنىپتىڭ بوزبالالارىنىڭ ءوتىنىشى بويىنشا بىلاي دەپ جازعانمىن.
قىز دەسە, قىزامىز,
قالامدى سىزامىز.
ءسىز – بولساڭ قىز جىبەك,
تولەگەن – ءبىز ناعىز».
توقاش اقىندى پوەزيا الەمىنە باستاعان العاشقى تۋىندىسى. كىرشىكسىز تازا سەزىم. قىز جىبەكتىڭ سىڭلىلەرىنە ارنالعان. قىز جىبەك دەمەكشى, قازىرگى سپورت جۋرناليستەرى قىز جىبەك قاندايدا ءبىر سايىستىڭ تۇرىنەن قۇراما ساپىندا ونەر كورسەتەتىن بولسا, الدەقاشان «ايەل» جىبەككە» اينالدىرىپ جىبەرۋى مۇمكىن-اۋ بۇگىنگى ءسوز ساپتاسىمەن...
ولاي دەيتىنىمىزدىڭ وزىندىك ءجونى بار. كۇنى كەشە عانا استانا تورىندە بوكستان قىزدار اراسىندا وتكەن الەم چەمپيوناتىندا ءتورت قىزىمىز التىن مەدالعا, ەكى قىزىمىز قولا مەدالعا قول جەتكىزىپ, ايدى اسپانعا ءبىر-اق شىعاردى. بۇرىن-سوڭدى بولماعان جەتىستىك قوي, ءبىراز اڭگىمەگە تۇزدىق بولدى. ماقتانۋعا كەلگەندە الدىنا جان سالمايتىن قازەكەڭ ءۇشىن مۇنداي مۇمكىندىكتى قۇر جىبەرۋگە بولا ما؟
الەم چەمپيوناتىندا الدىنا ەل سالماعان قازاقستان قۇراماسى تۋرالى تەڭەۋدىڭ نەشە اتاسى ايتىلدى. جەڭىستى دە, جەتىستىكتى دە قازاق جۋرناليستەرى جاپا-تارماعاي جەرىنە جەتكىزە جازدى, ەلدەن ءسۇيىنشى سۇرادى. قازاقستاننىڭ ايەلدەر قۇراماسى الەم چەمپيوناتىندا تولاعاي تابىسقا جەتتى دەپ. ءسۇيىنشى سۇراعانى, ماقتانعانى دۇرىس-اق, ال «ايەلدەرى» نەسى؟!
بارلىعى ءبىرىنىڭ اۋزىنا ءبىرى تۇكىرىپ قويعانداي, «قازاقستاننىڭ ايەلدەر قۇراماسى» دەپ تورتكىل دۇنيەگە جار سالعانىن قايتەرسىڭ. ەكى دۇركىن الەم چەمپيونى اتانعان نازىم قىزايباي, دينا جولامان, ۆالەنتينا حالزوۆا, ءلاززات كۇنگەيباەۆا سىندى ناعىز التىن قىزدارىمىزعا سپورت جۋرناليستەرى تىكەلەي بارىپ, «ايەل» دەپ ايتىپ كورسىنشى, بىردەن نوكاۋت الارى ءسوزسىز. ەسىن جيعاننان كەيىن الگى جۋرناليستەردىڭ ايەلدەردى دە «قىزدار» دەپ اتايتىنىنا كەپىلدىك بەرەمىز. ەندەشە, سوققى الماي تۇرعاندا قىزعا قاتىستى «ايەل» دەگەن ءدۇر ەتپە تۇسىنىكتى توقتاتقان دۇرىس.
كەڭەستىك يدەولوگيادان وڭباي تاياق جەسەك تە, ءالى دە سول جاققا قاراپ ەمىرەنەمىز دە تۇرامىز. «جەنششينانى» جەتەكتەپ اكەلىپ تىكەلەي ءتارجىمالاپ, التىن اسىقتاي قىزدارىمىزدى «ايەلدەرگە» تەلىپ ءجۇرگەنىمىز سونىڭ سالدارى. ءايتپەسە, «قازاقستاننىڭ قىزدار قۇراماسى» دەگەن اتاۋ ادەمى ەستىلەدى ەمەس پە! ايتپاقشى, الماتىداعى قىزدار پەداگوگيكالىق ۋنيۆەرسيتەتىن سپورت جۋرناليستەرىنىڭ قالىبىنا سالاتىن بولساق, ماسقارا بولمايمىز با؟!.
باسقاسىن ايتپاعاندا, سپورتتىق جانە كوركەم گيمناستيكادان قۇراما ساپىندا كوپ جاعدايدا مەكتەپ جاسىنداعىلار ونەر كورسەتەدى ەمەس پە؟! ال وعان دا «ايەلدەر قۇراماسى» دەپ ايدار تاعامىز. قىسقاسى, بۇگىندە قازاق جۋرناليستەرىنىڭ ارقاسىندا «ايەلدەردىڭ» داۋرەنى ءجۇرىپ تۇر؟!.
«قىزداردان» نەگە قاشامىز؟ ءوز باسىم وسىنى تۇسىنبەيمىن...
عابيت ىسكەندەر ۇلى,
«ەگەمەن قازاقستان»