فەستيۆالى حالىقارالىق سىيلىقپەن ماراپاتتالدى
ىستانبۇل قالاسىندا تۇركىتىلدى الەمدى دامىتۋعا قوسقان زور ۇلەسى ءۇشىن بەرىلەتىن «قىزىل الما» سىيلىعىن تاپسىرۋ ءراسىمى ءوتتى.
بۇل سىيلىقتى 2013 جىلى جىل سايىن تۇركىتىلدەس حالىقتار تۇراتىن بارلىق ەلدەر مەن ايماقتاردىڭ ساياساتكەرلەرى مەن قوعام قايراتكەرلەرىنىڭ باسىن قوساتىن تۇركى الەمى فورۋمى تاعايىنداعان. ونىمەن قوعامدىق ىسكە, عىلىم, سپورت, مادەنيەتكە ەرەكشە ۇلەس قوسقان تۇلعالار ماراپاتتالادى.
ماسەلەن, وسى جىلعى «قىزىل الما» سىيلىعىنا قىرعىزستان پرەزيدەنتى المازبەك اتامباەۆ پەن نوبەل سىيلىعىنىڭ لاۋرەاتى ءازيز سانجار يە بولعان. سونىمەن قاتار, بۇل ماراپاتقا بيىل تۇركى حالىقتارىنىڭ ءداستۇرلى مادەنيەتىن دامىتۋعا قوسقان ۇلكەن ۇلەسى ءۇشىن جىل سايىن استانادا وتكىزىلەتىن «استانا-ارقاۋ» ءداستۇرلى تۇركى مۋزىكاسىنىڭ فەستيۆالىن ۇيىمداستىرۋشى «EL production company» لايىق دەپ تانىلدى. سىيلىق اتالمىش كومپانيانىڭ باس ديرەكتورى ايگۇل بەيسەنباەۆاعا تاپسىرىلدى. «EL production company»-دەن باسقا, بۇل سىيلىقپەن تۇركى سپورتىن دامىتۋعا قوسقان ۇلكەن ۇلەسى ءۇشىن ءداستۇرلى قازاقشا كۇرەستەن xالىقارالىق «ەۋرازيا بارىسى» ءتۋرنيرىن ۇيىمداستىرۋشى, بەلگىلى جۋرناليست جانە پروديۋسەر ارمان شوراەۆ تا ماراپاتتالدى.
استانا قالاسى اكىمدىگىنىڭ قولداۋىمەن قازىرگە دەيىن 9 مارتە وتكىزىلىپ, وسى ۋاقىت ىشىندە بۇكىل تۇركى مۋزىكاسى وكىلدەرىنىڭ باسىن قوسىپ ۇلگەرگەن «استانا-ارقاۋ» – بۇگىندە تۇركى الەمىنىڭ ءداستۇرلى مۋزىكاسىنا ارنالعان ەڭ ءىرى فەستيۆالعا اينالدى. سوڭعى ونشاقتى جىل كولەمىندە فەستيۆالعا بارشا تۇركى حالىقتارىنىڭ مۋزىكالىق ءداستۇرىن ناسيحاتتاۋشى 700-گە تارتا مۋزىكانتتار مەن عالىمدار قاتىسقان ەكەن.
«استانا-ارقاۋ» تۇركى مۋزىكاسىنىڭ فەستيۆالى قازىرگى كەزدە تۇركى حالىقتارىنىڭ مادەني ينتەگراتسياسى ۇردىسىندە ەلەۋلى ورىن العان بەدەلدى مۋزىكالىق شاراعا اينالدى.
فەستيۆالدىڭ 10 جىلدىعىنا وراي, 2017 جىلى تۇركى الەمى مۋزىكاسىنىڭ انتولوگياسى شىعارىلماق.
«ەگەمەن اقپارات»
الماتى