قازاق گەوگرافيالىق قوعامى Shejire DNA جوباسىمەن جانە نورۆەگيالىق عالىمدارمەن بىرلەسە وتىرىپ, قازاقستان مەن سكانديناۆيا اراسىنداعى ەتنوگرافيالىق جانە مادەني بايلانىستار زەرتتەلەتىن عىلىمي جوبانى جۇزەگە اسىرۋدا.
الماتى قالاسىندا قازاقستاننىڭ تاريحى مەن مادەنيەتى تۋرالى دەرەكتى فيلم تۇسىرۋمەن, سونداي-اق ەل تۇرعىندارىنىڭ ەتنوگەنەتيكالىق سايكەستىكتەرىن عىلىمي تۇرعىدا زەرتتەپ جۇرگەن نورۆەگيالىق عالىمدار دەلەگاتسياسى ءوز ەڭبەكتەرىنىڭ ەسەبىمەن تىلشىلەر قاۋىمىن تانىستىردى.
حالىقارالىق عالىمدار توبى «ەجەلدە ورتالىق ازيا ءۇندىەۋروپالىق تىلدەردىڭ ورتالىعى بولعان» دەگەن بولجامعا ساي, قازاقستان مەن سكانديناۆيا حالىقتارىنىڭ ەتنوگرافيالىق جانە مادەني بايلانىستارى تۋرالى گيپوتەزانى بىرنەشە جىلدار بويى زەرتتەپ كەلەدى. وسى عىلىمي جوبا الەم عالىمدارىنىڭ نازارىن وزىنە اۋدارىپ, ەلىمىزدە نورۆەگيالىق «NRK» تەلەارناسى ءتۇسىرىپ جۇرگەن عىلىمي-تانىمدىق باعدارلامانىڭ باستى ەپيزودىنا اينالىپ وتىر.
قازاق گەوگرافيالىق قوعامىنىڭ نەگىزگى باعىتتارىنىڭ ءبىرى – بۇكىل الەمگە قازاق ەلىنىڭ ءمادەنيەتىن, تاريحىن تانىستىرۋ بولعاندىقتان, اتالمىش جوبا وتاندىق گەوگرافيالىق قوعام تاراپىنان دا زور قولداۋعا يە بولۋدا.
قازاقستان حالقى اسسامبلەياسىنىڭ قولداۋىمەن وتكىزىلگەن بۇل باسقوسۋدا نورۆەگيالىق عالىم ءارى «NRK» تەلەارناسىنىڭ ءجۋرناليستى دجو روسليەن جۋرناليستەرگە ارنالعان شەبەرلىك-سىنىپ وتكىزىپ, تاريحشى-عالىم سترۋلا ەللينگۆاگ, «قازاق گەوگرافيالىق قوعامى» توراعاسىنىڭ ورىنباسارى, Shejire DNA project ديرەكتورى نۇربول بايمۇحانوۆ ءتۇرلى عىلىمي تۇجىرىمدامالارىمەن ءبولىستى.
قانات ەسكەندىر,
«ەگەمەن قازاقستان»
الماتى