استانا. 21 مامىر. كەشە قازاقستان باس پروكۋرورى جاقىپ اسانوۆتىڭ توراعالىق ەتۋىمەن باس پروكۋراتۋرا جانىنداعى زاڭدىلىقتى قامتاماسىز ەتۋ جونىندەگى كونسۋلتاتيۆتى كەڭەستىڭ وتىرىسى بولىپ ءوتتى. بۇل تۋرالى باس پروكۋراتۋرانىڭ ءباسپاسوز قىزمەتى دەرەگىنە سۇيەنگەن egemen.kz ءتىلشىسى حابارلادى.
كەڭەس بارىسىندا باس پروكۋرور جەر ماسەلەسى جونىندە رەسمي ۇندەۋ جاريالادى.
جاقىپ اسانوۆ ءوز سوزىندە كوپشىلىكتى ارانداتۋشىلاردىڭ ارانىنا ءتۇسىپ قالماۋعا شاقىردى, رۇقساتسىز كوشەگە شىققانداردىڭ قىلمىستىق جاۋاپكەرشىلىككە دەيىن تارتىلاتىنىن ەسكەرتتى.
باس پروكۋرور جەر داۋىن كوشەدە ەمەس, ۇستەل باسىندا شەشۋگە مەملەكەت بار جاعدايدى جاساپ وتىرعانىن اتاپ ءوتتى. ۇكىمەت جانىنان ارنايى كوميسسيا قۇرىلىپ, ول قازىرگى كۇندەرى جەر كودەكسىنىڭ ولقى جاقتارىن جان-جاقتى تالقىعا سالىپ جاتىر. بىراق, سوعان قاراماستان, تۇرعىنداردى قارسىلىق اكتسياسىنا شاقىرىپ, ارانداتىپ جۇرگەندەر كوپ. سوندىقتان, ىشكى ىستەر مينيسترلىگى الەۋمەتتىك جەلىلەردەگى كۇدىكتى دەگەن ازاماتتاردى ۇدايى باقىلاۋعا العان. جۇرتقا كەزەكتى رەت ۇندەۋىن ارناعان باس پروكۋرور شەرۋ ۇيىمداستىرعاندار مەن وعان قاتىسقانداردىڭ جاۋاپقا تارتىلاتىنىن, ءتىپتى قىلمىستىق ءىس قوزعالۋى مۇمكىن ەكەنىن ەسكەرتتى.
«قازاقستان رەسپۋبليكاسى پرەزيدەنتىنىڭ 2016 جىلعى 6 مامىرداعى جارلىعىمەن جەر كودەكسىنىڭ كەيبىر نورمالارىن قولدانۋعا موراتوري جاريالاندى, - دەدى باس پروكۋرور ءوز سوزىندە. - مەملەكەت باسشىسىنىڭ تاپسىرماسىمەن جەر رەفورماسى بويىنشا كوميسسيا قۇرىلدى. ونىڭ قۇرامىنا ازاماتتىق قوعام ينستيتۋتتارىنىڭ باسشىلارى مەن بەلسەندىلەرى كىردى. ازاماتتار كوميسسيا جۇمىسىنا وڭىرلەردە قۇرىلعان قوعامدىق كەڭەستەر ارقىلى دا قاتىسا الادى. كوميسسيا وتىرىسىندا پىكىر الماسۋ بارىنشا اشىق. ونىڭ قىزمەتى اقپارات قۇرالدارىندا تۇراقتى جاريالانۋدا. ارنايى اشىلعان jerturaly.kz سايتىندا قازاقستاندىقتار ءوز سۇراقتارىن كوميسسياعا قويىپ, ۇسىنىس-تىلەكتەرىن بەرە الادى».
باس پروكۋرور جەر ماسەلەسى بويىنشا كەز-كەلگەن پىكىر ءبىلدىرۋ ءۇشىن بارلىق جاعداي جاسالعانىن اتاپ ءوتتى. الايدا, كەيبىر ادامدار وسىنداي جاعداي مەن زاڭ تالاپتارىن ەلەمەي, ورتاق ديالوگتان قاشىپ, حالىقتى زاڭسىز قارسىلىق اكتسيالارىنا شاقىرعانىن قوياتىن ەمەس. الەۋمەتتىك, ۇلتارالىق ارازدىقتى قوزدىرۋ ءۇشىن جالعان اقپارات ادەيى تاراتىلۋدا. مۇنداي ارەكەتتەر قازاقستان رەسپۋبليكاسىنىڭ زاڭدارىنا قايشى كەلەدى.
«وسىعان بايلانىستى قوعامدىق تۇراقتىلىقتى ساقتاۋ ءۇشىن ەل ازاماتتارىن مۇنداي ارانداتۋعا بوي بەرمەۋگە, ازاماتتىق ۇستانىم مەن جاۋاپكەرشىلىك تانىتۋعا شاقىرامىن. «پروكۋراتۋرا تۋرالى» زاڭنىڭ 25-2 بابىن باسشىلىققا الىپ, زاڭسىز ميتينگكە شاقىرۋ, ونى ۇيىمداستىرۋ, ءتىپتى وعان قاتىسۋدىڭ ءوزى اكىمشىلىك نەمەسە قىلمىستىق جاۋاپكەرشىلىككە اكەپ سوعاتىنىن ەسكەرتەمىن», - دەدى باس پروكۋرور.
تالعات رايىمبەك.
دەرەك, فوتو: قازاقستان رەسپۋبليكاسى باس پروكۋراتۋراسىنىڭ ءباسپاسوز قىزمەتى.