شارۋا ادامى بولعاندىقتان بۇگىندە جالپىحالىقتىق تالقىلاۋدى, وي قوسۋدى قاجەت ەتىپ وتىرعان جەر ءماسەلەسى مەنى دە قاتتى تولعانتۋدا. نەگىزى «نە ەكسەڭ سونى وراسىڭ» دەگەن ءسوز بەكەر ايتىلماعان. سوندىقتان ىقىلىم زاماننان بەرى ادامزاتتىڭ اسىراۋشىسى بولىپ كەلە جاتقان جەر-انانى ءوز كەزەگىمىزدە دۇرىس پايدالانىپ, كەلەر ۇرپاق وكىلىنە وتكىزۋ پەرزەنتتىك پارىزىمىز دەپ سانايمىن. ءبىز دالا توسىندە ەڭبەك ەتىپ ىستىققا دا, سۋىققا دا ءتوزىپ, جەل مەن جاۋىن-شاشىنعا شىداپ ماۋسىمدىق جۇمىسىمىزدى ۇزبەي جۇرگەن جاندارمىز. ناقتىلى جۇمىسىمىزدى ءبىلىپ, سول ەڭبەكتىڭ وتەۋىن كورىپ تە جۇرگەن جايىمىز بار. شارۋاشىلىعىمىزدا 39 مىڭ گەكتاردان استام جەر بار. جەتىسۋدىڭ ءتول داقىلى قانت قىزىلشاسىنان باستاپ, ەگىن شارۋاشىلىعىنىڭ جۇمىسىن دوڭگەلەتە جۇرگىزۋدە 5 بريگادا جۇمىس ىستەيدى. ونىڭ سىرتىندا 1,5 مىڭ باس ءىرى قارا, 7 مىڭ باس قوي, 300 باس جىلقى مالىن دا باعىپ وسىرۋدەمىز. قۇدايعا شۇكىر, جۇمىسشىلارىمىز ءتۇرلى ەتنوس وكىلدەرىنەن قۇرالسا دا ءبىر ءۇيدىڭ بالاسىنداي تاتۋ-ءتاتتى, ەڭ باستىسى, تۇسىنىستىكپەن ەڭبەك ەتۋدە. نەگىزى ايتايىن دەگەنىم, جەر قىرتىسىن جىرتىپ ءتۇرلى ءونىم ەكتىڭىز بە كۇتىمدەۋدى دە ۇمىتپاڭىز. بار ەكەن, كەڭ ەكەن دەپ جەردى بەي-بەرەكەت تىلگىلەي بەرۋگە بولمايدى. نە نارسەنىڭ بولسىن سۇراۋى بار ەكەندىگىن استە ۇمىتپاعان ءلازىم. سوندىقتان جايىلىمدىق جەردى بۇلدىرمەي ءتورت ت ۇلىكتى ەركىنە جىبەرىپ پايدالانۋدامىز. ال ءتاتتى ءتۇبىردى گەكتارلاپ ەككەن سوڭ سول جەردى كەلەسى جىلى تاعى دا پايدالانىپ, مول ءونىم الۋ ءۇشىن كۇتىپ, تىڭايتىپ وتىرامىز. بىلتىرعى جىلى جەتىسۋلىق قانت قىزىلشاسىن ءوسىرۋشى شارۋاشىلىقتار مول ونىمگە كەنەلدى. ولاردىڭ الدىنا 4 مىڭ گەكتار القاپتى 6,4 مىڭ گەكتار جەرگە جەتكىزىپ ءونىم تۇسىمدىلىگىن گەكتارىنا 350 تسەنتنەردەن الۋ تالابى قويىلدى. سوندا بارلىعى 220 مىڭ توننا قانت قىزىلشاسىن جيناۋ ءۇشىن اكىمدىك تاراپىنان تۇقىم جانە تىڭايتقىش الۋعا, سونداي-اق, ارنايى تەحنيكالارمەن دە كومەك كورسەتىلگەن ەدى. ال ءبىزدىڭ شارۋاشىلىعىمىزدا جىلدار بويى قالىپتاسقان جۇمىس ناتيجەسىن بەرىپ قۇنارلىلىعىن جويماي كۇتىمدە بولعان جەرىمىز ءونىمدى ەسەلەپ بەردى. سوندىقتان جەر كۇتىمدى قاجەت ەتەتىندىگىن تاعى دا قايتالاپ ايتقىم كەلەدى. ەگەر زامان تالابىنا ساي جەرلەستەرىمىزگە جالعا جەر تەلىمدەرى بەرىلدى مە زاڭناما شەڭبەرىندە السىن, پايدالانسىن, بىراق سول جەردى توزدىرماي كۇتە ءبىلسىن. سوندا ادىلدىك بولادى. جەر كۇتىمى تۋرالى ءسوز قوزعاردا ايتا كەتەرىم, مەنىڭ دە كىندىك قانىم جەتىسۋ جەرىنە تامعان. سوندىقتان بولار سۋىن ءىشىپ, اۋاسىن جۇتىپ, توپىراعىن باسىپ جۇرگەن بۇل ءوڭىر ماعان ىستىق. قاشاندا بۇيرەگىم بۇرىپ تۇرادى. جاناشىرلىقتى جاي سوزبەن سىدىرتا ايتىپ ءوتۋ وڭاي. ال ناقتى ىسىڭمەن ەل رازى بولاتىنداي ارەكەت ەتۋ پەرزەنتتىك پارىز. ءوزىم باسقارىپ وتىرعان «حيلنيچەنكو ي ك» كومانديتتىك سەرىكتەستىگى بىلتىر قانت قىزىلشاسىنىڭ ءار گەكتارىنان 730 تسەنتنەردەن, ونىڭ ىشىندە جەكەلەگەن جەر تەلىمدەرىنىڭ ءار گەكتارىنان 810 تسەنتنەردەن ءونىم جينادى. بۇل جەردى كۇتە بىلگەندىكتىڭ, توزدىرماي ساقتاي العاندىقتىڭ ناتيجەسى دەپ سانايمىن.
ەلباسى نۇرسۇلتان نازارباەۆ ءبىزدىڭ وبلىسىمىزعا كەلگەن سايىن اۋىل شارۋاشىلىعى سالاسى قىزمەتكەرلەرىمەن كەزدەسۋ وتكىزۋگە ۋاقىت تابا بىلەدى. ەڭ باستىسى, ەگىن ەگىپ, مال باعىپ جۇرگەن جانداردىڭ حال-جاعدايلارىن سۇراپ, جۇمىس بارىسى جايلى اڭگىمە وربىتەتىنى قۋانتادى. جۋىردا قازاقستان حالقى اسسامبلەياسىنىڭ كەزەكتى سەسسياسىندا «جەر ءبىزدىڭ اتا-بابامىزدان قالعان اسىل مۇرا. ول ءبىزدىڭ باستى بايلىعىمىز. جەردى شەتەلدىكتەرگە ساتايىن دەپ وتىرعان ەشكىم جوق. بۇل جەردە قوزعالعان اڭگىمە اۋىل شارۋاشىلىعى سالاسىنىڭ ەڭبەككەرلەرىنە جەردى ۇتىمدى پايدالانىپ, مول ءونىم الۋىنا مۇمكىندىك تۋدىرۋ بولىپ وتىر», دەگەن ءسوزى مەنىڭ دە كوكەيىمە قونادى. ولاي دەيتىنىم, سەرىكتەستىگىمىزدەگى 500 ادامنىڭ بارلىعى ەرتەڭگى كۇنگە سەنىممەن قارايدى. ويتكەنى, ولار جەردىڭ قادىرىن بىلەدى. سول جەردى جالعا العاندا جاۋاپكەرشىلىكتى جەتە سەزىنىپ, توزدىرماي كۇتىپ پايدالانا الاتىندىعىنا دا سەنىمدى.
ۆيكتور حيلنيچەنكو,
«حيلنيچەنكو ي ك» كومانديتتىك سەرىكتەستىگىنىڭ باسقارما توراعاسى,
«قۇرمەت» وردەنىنىڭ يەگەرى
الماتى وبلىسى