بانگكوك قالاسىندا قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرجان اشىقباەۆ باستاعان قازاقستاندىق دەلەگاتسيا ازيا مەن تىنىق مۇحيتى ەلدەرىنە ارنالعان ەكونوميكالىق جانە الەۋمەتتىك كوميسسيانىڭ 72-ءشى سەسسياسىنا قاتىستى.
ءوڭىردىڭ 54 مەملەكەتىنىڭ سەسسياعا قاتىسقان وكىلدەرى 2015 جىلعى قىركۇيەكتە بۇۇ مەملەكەت باسشىلارى نيۋ-يوركتە قابىلداعان ورنىقتى دامۋ ماقساتتارىن ىسكە اسىرۋ اياسىندا وڭىردەگى ەكونوميكالىق ىنتىماقتاستىقتى نىعايتۋ, يننوۆاتسيالار جانە تەحنولوگيالارمەن الماسۋ, كليماتتىڭ وزگەرۋى سالدارىمەن كۇرەس ماسەلەلەرىن قاراستىردى.
سەسسيانىڭ ءبىرىنشى كۇنىندە ە.اشىقباەۆ جوعارى دەڭگەيدەگى پلەنارلىق وتىرىستا ءسوز سويلەپ, دەلەگاتسيالاردى قازاقستاننىڭ بۇۇ ماقساتتارىن جۇزەگە اسىرۋ بويىنشا اتقارىپ جاتقان جۇمىستارىمەن تانىستىردى. ول «قازاقستان-2050» ستراتەگياسى جاھاندىق ۇيىمنىڭ يندۋستريالاندىرۋ, جاڭا تەحنولوگيالاردى تارتۋ, جۇمىس ورىندارىن اشۋ مەن الەۋمەتتىك دامۋ سياقتى باسىمدىقتارعا قول جەتكىزۋ بويىنشا ءتاجىريبەلىك ەلەمەنتتەردەن تۇراتىنىن اتاپ ءوتتى. قازاقستان كولىك, ەنەرگەتيكا, ازىق-ت ۇلىك جانە سۋ سالالارىنداعى ىنتىماقتاستىقتى نىعايتا وتىرىپ, بۇۇ ماقساتتارىن وڭىرلىك دەڭگەيدە باسشىلىققا الاتىنى, كاسپي ءوڭىرى مەن وڭتۇستىك ازياداعى كوپجاقتى ءوزارا ءىس-قيمىلدى دامىتا وتىرىپ, ەۋرازياداعى ينتەگراتسيالىق ۇدەرىستەردى بەلسەندى قولدايتىنى اتاپ كورسەتىلدى.
ازيا مەن تىنىق مۇحيتى ەلدەرى ءۇشىن ەكسپو-2017 تاقىرىبىنىڭ جەكە ماڭىزى ايتىلدى. كورمە اياسىندا تەحنولوگيالىق الشاقتىق پەن كليماتتىڭ وزگەرۋىنە جاۋاپ قايتارۋ بويىنشا ءىرى حالىقارالىق ءىس-شارالار, ونىڭ ىشىندە يسلام ىنتىماقتاستىعى ۇيىمىنىڭ عىلىم جانە تەحنولوگيالار ءسامميتىن وتكىزۋ جوسپارلانعانىنا نازار اۋدارىلدى.
ە.اشىقباەۆ 2015 جىلدىڭ قىركۇيەك ايىندا بۇۇ باس اسسامبلەياسىنىڭ 70-ءشى سەسسياسى بارىسىندا پرەزيدەنت نۇرسۇلتان نازارباەۆ ايتقان 2045 جىلعا قاراي, ياعني ۇيىمنىڭ 100 جىلدىق مەرەيتويىنا ادىلەتتى جانە قاۋىپسىز الەم تارتىبىنە قول جەتكىزۋگە باعىتتالعان قازاقستاننىڭ باستامالارى تۇرعىسىندا قاتىسۋشىلاردى «الەم. XXI عاسىر» مانيفەسىنىڭ مازمۇنىمەن تانىستىرىپ, كوتەرىلگەن ماسەلەلەردىڭ وزەكتىلىگى بارلىق ەلدەرگە قاتىستى ەكەنىن ەرەكشە اتادى.
قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن ىلگەرىلەتۋ ۇدەرىسى شەڭبەرىندە قازاقستاندىق دەلەگاتسيا فيليپپين, نەپال, مارشال ارالدارى, كيريباتي, ساموا جانە سولومون ارالدارى وكىلدەرىمەن كەزدەسۋلەر وتكىزدى.