قازاق حاندىعىنىڭ 550 جىلدىعىنا ارنالعان «قازاق ەلى» اتتى قازاق مۋلتيپليكاتسياسى تاريحىنداعى تۇڭعىش تولىق مەتراجدى انيماتسيالىق ءفيلمىنىڭ تۇساۋكەسەرى ءوتتى. تۋىندىنى العاشقى كورەرمەندەرى رەتىندە استانا قالاسىنىڭ بالالار ءۇيى مەن از قامتىلعان وتباسىلاردىڭ بالالارى شاقىرىلعان.
جاستارعا پاتريوتتىق ءتاربيە بەرۋ مەن ولاردىڭ ازامات رەتىندە قالىپتاسۋىنا ىقپال ەتۋ – قازىرگى تاڭدا اسا وزەكتى مانگە يە. ءوز وتانىڭدى قاستەرلەۋ جانە وعان دەگەن كىرىكسىز, ادال سەزىم جەكە ادامنىڭ الەۋمەتتىك, رۋحاني, يماني جانە دەنە تاربيەسى تۇرعىسىنان دا دامۋىنا ۇلكەن سەرپىن بەرەدى. پاتريوتيزم ەگەمەندى قازاقستاننىڭ جالپىۇلتتىق مۇراتىندا ماڭىزدى ورىن الادى. وسى ماقساتتى ورىنداۋ ءۇشىن «ساق-دالا» كينوستۋدياسى مادەنيەت جانە سپورت مينيسترلىگىنىڭ تاپسىرىسى بويىنشا وسى تۋىندىنى جارىققا شىعارىپ وتىر.
ءوزىنىڭ ماڭىزدىلىعى جاعىنان ايرىقشا «قازاق ەلى» انيماتسيالىق ءفيلمى بولاشاق حاندار جانىبەك پەن كەرەيدىڭ بالالىق شاعى مەن ەسەيۋ جىلدارى تۋرالى باياندايدى. كارتينادا باس كەيىپكەرلەردىڭ شايقاستىڭ ايلا-تاسىلدەرىن, عىلىمدى قالاي مەڭگەرگەندەرى جانە بوستاندىق پەن تاۋەلسىزدىك ءۇشىن كۇرەس جولىندا قازاق ەلىنىڭ باسىن قالاي بىرىكتىرگەندىگى جايلى اڭگىمەلەنەدى. ءمۋلتفيلمنىڭ كادرلارىندا شەتسىز-شەكسىز قازاق دالاسى, زاڭعار تاۋلار جانە سىعاناق, وتىرار, تاراز بەن تۇركىستان سەكىلدى ەجەلگى قالالار بەينەلەنگەن.
جوباعا تانىمال وتاندىق عالىمدار مەن جازۋشىلار اتسالىسقاندىقتان, فيلم تاريحي ايعاقتارمەن ءورىلىپ, بالالارعا تۇسىنىكتى تىلدە جەڭىل ءارى قىزىقتى وقيعالار ارقىلى قامتىلىپ كورسەتىلەدى. انيماتسيالىق ءفيلمنىڭ باس كەڭەسشىسى ارىستانبەك مۇحامەدي ۇلى, تاريح عالىمدارىنىڭ دوكتورى, پروفەسسور جامبىل ارتىقباي جانە جازۋشى, كينودراماتۋرگ دۋلات يسابەكوۆ. باس كەيىپكەرلەردى ع.مۇسىرەپوۆ اتىنداعى قازاق مەملەكەتتىك اكادەميالىق بالالار جانە ءجاسوسپىرىمدەر تەاترىنىڭ, سونداي-اق ج. شانين اتىنداعى وڭتۇستىك قازاقستان وبلىستىق قازاق دراما تەاترىنىڭ ارتىستەرى دىبىستاعان. ءفيلمنىڭ ساۋندترەكتەرىن نۇرلان ابدۋللين, ساكەن مايعازيەۆ سىندى باسقا دا تانىمال قازاقستاندىق ءانشىلەر ورىنداعان.
كارتينانىڭ جاسالۋىندا 2D جانە 3D-تەحنولوگيالار پايدالانىلدى. اتالمىش جوباعا 60-تان اسا ادام جۇمىلدىرىلعان ەكەن. تۋىندىنىڭ باس پروديۋسەرى ءسابيت ابدىقالىقوۆتىڭ پىكىرىنشە, قازاقستاندىق ارتىستەر تاريحي تۇلعالارعا ءتان بەينەنى ءدۇنيەگە اكەلۋ ءۇشىن ايانباي ەڭبەك ەتتى.
«قازاق ەلى» اتتى تۇڭعىش تاريحي-انيماتسيالىق ءفيلمى جالپىۇلتتىق پروكاتقا شىقتى.
راۋان قايدار,
«ەگەمەن قازاقستان»