قاراعاندىدا جاڭا ەنەرگوبلوك ىسكە قوسىلدى
«قاراعاندى ەنەرگيا ورتالىعى» قاراعاندى قالاسى مەن وبلىستى ەلەكتر ەنەرگياسىمەن جانە دە جىلۋمەن قامتاماسىز ەتىپ وتىرعان اسا ءىرى ءوندىرىس وشاعى. كومپانيانىڭ قۇرامىنا جەو-1 جانە جەو-3 سىندى ەكى بىردەي جىلۋ ەلەكتر ستانساسى ەنەدى. سوڭعىسى وڭىردەگى ءىرى ءوندىرىس ورىندارىنىڭ بىرىنەن سانالادى. ونىڭ ەنەرگەتيكالىق قۋاتى 560 مۆت بولسا, جىلۋ قۋاتى 1174 گكال/ساعاتتى قۇرايدى. جالپى العاندا, بۇل ەكى ستانسانىڭ وبلىس ورتالىعىن جىلۋ جانە ەلەكتر قۋاتىمەن تولىقتاي قامتاماسىز ەتۋگە كۇشى كۇنى كەشەگە دەيىن ەركىن جەتىپ كەلگەن. سونىمەن قاتار, بارلىق الەۋمەتتىك, مادەني, تۇرمىستىق نىساندار, بالاباقشالار, مەكتەپتەر مەن ءوندىرىس وشاقتارى دا وسى ستانسالاردان تىرشىلىك ءنارىن تارتادى.
نەگىزى قاراعاندىداعى №3 جىلۋ ەلەكتر ورتالىعىنا قاراستى جاڭا ەنەرگوبلوكتىڭ قۇرىلىسى وسىدان ءتورت جىل بۇرىن باستالعان بولاتىن. مۇنداي قادامعا ءوسىپ-وركەندەپ جاتقان وبلىستىڭ ەنەرگەتيكالىق قۋات كوزدەرىنە دەگەن تاپشىلىعى يتەرمەلەگەن ەدى. جوبانى ورىنداۋ بارىسىندا بىرقاتار وزىق قۇرىلىمدىق تەحنولوگيالىق شەشىمدەر جۇزەگە اسىرىلدى. مىنە, وسىنداي شارالاردىڭ ارقاسىندا «قاراعاندى ەلەكتر ورتالىعى» جشس بۇگىنگى كۇندە وبلىس ورتالىعىنا قوسىمشا 110 مەگاۆاتت ەلەكتر قۋاتى مەن 180 گكال/ساعات جىلۋ قۋاتىن بەرۋ مۇمكىندىگىنە يە بولىپ وتىر.
قاراعاندى جەو-3 ستانساسىنداعى جاڭا ەنەرگيالىق بلوكتى پايدالانۋعا بەرۋ سالتاناتىنا وبلىس اكىمى نۇرمۇحامبەت ابدىبەكوۆ تە قاتىستى. ءوزىنىڭ قۇتتىقتاۋ سوزىندە ءوڭىر باسشىسى جاڭا بلوك ىسكە قوسىلعاننان كەيىن ستانسانىڭ ەنەرگەتيكالىق تيىمدىلىگىنىڭ 25 پايىزعا ارتاتىنىن ەرەكشە اتاپ ءوتتى.
«ءبىزدىڭ ءوڭىر ءۇشىن جاڭا قۋات كوزدەرى ىلگەرى دامۋىمىزعا سەپتىگىن تيگىزەتىن قوسىمشا سەرپىن. ال جاڭا قوندىرعىنىڭ ىسكە قوسىلۋى وبلىس ءۇشىن جاڭا كاسىپورىنداردى پايدالانۋعا بەرۋ, تۇرعىن ۇيلەر سالۋ سىندى ماڭىزدى جوبالاردى جۇزەگە اسىرۋعا قاجەتتى اسا زور رەزەرۆ جانە قۋاتتى قور بولماق. بۇعان قوسا بۇل جوبا اياسىندا قاراعاندىلىقتار ءۇشىن جاڭا جۇمىس ورىندارىنىڭ پايدا بولاتىنىن دا ايتا كەتكەن ءجون», – دەدى وبلىس اكىمى.
اتالعان ءىرى جوبانىڭ باس مەردىگەرى جانە بارلىق قۇرال-جابدىعىن جەتكىزۋشى قىتايدىڭ ماشينا جاساۋ سالاسىنداعى سمەس دەپ اتالاتىن ۇلتتىق كومپانياسى. اتالعان جوبانىڭ ىسكە اسۋى ەنەرگەتيكا سالاسىنداعى ىنتىماقتاستىق قارىم-قاتىناستىڭ قانات جايىپ وتىرعانىن كورسەتەدى. بۇگىنگى كۇندە جوبالىق قۇنى 185 ميلليون دوللار بولاتىن ەنەرگوبلوك قۇرىلىسى مەن قۇراستىرۋ جۇمىستارى تولىق اياقتالعان. جاڭا نىساننىڭ قارجىلىق ارىپتەستەرى قازاقستان دامۋ بانكى مەن «سبەربانك» اق-تىڭ ەنشىلەس بانكى بولعانىن دا ايتا كەتكەن ءلازىم.
جالپى, 2009 جىلدان باستاپ ۇكىمەت ەنەرگيا كوزدەرىنە ارنالعان مولشەرلى تاريف ەنگىزگەلى كومپانيا ينۆەستيتسيالىق باعدارلامالاردى ىسكە اسىرا باستاعان بولاتىن. جىلۋ ەلەكتر ورتالىعىنىڭ قۋاتىن ارتتىرۋ, ونىڭ قۇرال-جابدىقتارىن جاڭارتۋ جانە قايتا قۇرۋ ماقساتىندا كاسىپورىنعا قوماقتى قارجى قۇيىلدى. مىسالى, مولشەرلى تاريفتەر باعدارلاماسى جۇمىس ىستەي باستاعان بەس جىلدىڭ ىشىندە بۇل شارالارعا جۇمسالعان قارجى 65 ميلليارد تەڭگەنى قۇرادى.
قۋاتتىلىعى 110 مەگاۆاتت بولاتىن جاڭا ءارى ءىرى ەنەرگەتيكالىق بلوكتىڭ قۇرىلىسى ستانسانى ۇلعايتۋ باعدارلاماسىنىڭ ەكىنشى كەزەڭىنە جاتادى. ال 2012 جىلى ىسكە قوسىلعان تۋربواگرەگات بۇگىنگى كۇندە قالىپتى جۇمىس ىستەپ تۇر.
قايرات ءابىلدينوۆ,
«ەگەمەن قازاقستان»
قاراعاندى