ءبىر كەزدەرى «كازگيپروزەم» ينستيتۋتىنىڭ جامبىل فيليالى دەپ اتالعان بۇل مەكەمە ءوڭىردە جوبالاۋ-ىزدەستىرۋ جانە باقىلاۋ جۇمىستارىن ورىنداۋمەن اينالىسقان ەكەن. سول جىلدارى ءوزىنىڭ دەربەس زەرتحاناسى بولىپ, 1990 جىلداردىڭ باسىنا دەيىن جۇمىس جاساپتى. كەيىن توپىراق زەرتتەۋ جۇمىستارىنا مەملەكەتتىك تاپسىرىستار مولشەرىنىڭ كەمۋى مەن قارجىنىڭ بولماۋى سەبەپتى زەرتحانا جابىلعان.
ەندى مىنە, وتكەن اپتادا جەر رەسۋرستارىن باسقارۋ كوميتەتىنىڭ «جەر كاداسترى عىلىمي-وندىرىستىك ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنىنىڭ جامبىل فيليالىنىڭ ديرەكتورى ن.ارتاەۆتىڭ جانە «جەرعوو» رمك-نىڭ باس ديرەكتورى ع.قارقىنباەۆتىڭ قولداۋىمەن جاڭا توپىراق زەرتحاناسىنىڭ قۇرىلىسى اياقتالىپ, قازىرگى زامان تالاپتارىنا ساي جاڭا قۇرال-جابدىقتارمەن قامتاماسىز ەتىلىپ, ىسكە قوسىلدى. زەرتحانانىڭ تالاپتارىنا ساي ينجەنەر, اگروحيميكتەر, حيميكتەر جۇمىسقا قابىلداندى. زەرتحانادا توپىراقتىڭ حيميالىق قۇرامىن انىقتاپ, ساراپتاما جۇرگىزىلەدى. وسى ساراپتامالاردىڭ ناتيجەلەرىندە توپىراق ماتەريالدارى جاڭارتىلىپ قولدانىسقا پايدالانىلادى. توپىراقتىڭ قۇنارلىلىعىن, قۇرامىنىڭ وزگەرىستەرگە ۇشىراعانىن انىقتاۋعا جىل سايىن رەسپۋبليكالىق بيۋدجەتتەن قارجى ءبولىنىپ, كوپتەگەن جۇمىستار اتقارىلۋدا. بۇعان دەيىن زەرتحانالىق ساراپتامالار شىمكەنت قالاسىنداعى «جەرعوو» رمك وڭتۇستىك فيليالىندا دايىندالاتىن. ياعني, زەرتحانالىق ساراپتاما جۇرگىزۋگە جىلىنا 3-4 ملن. تەڭگە تولەنىپ وتىردى. ەندى وسى جۇمىستاردىڭ بارلىعى مەكەمەنىڭ ءوز زەرتحاناسىندا اتقارىلادى. ال, اعىمداعى جىلى رەسپۋبليكالىق بيۋدجەت قاراجاتى ەسەبىنەن ت.رىسقۇلوۆ, قورداي اۋداندارىنىڭ جەرلەرىنە مونيتورينگ جۇرگىزۋ جوسپارلانىپ, جۇمىستار باستالىپ تا كەتتى.
توپىراق زەرتتەۋ بارىسىندا الىنعان ماتەريالدار جەر كاداسترىن, جەر مونيتورينگىن جۇرگىزۋ بويىنشا جۇمىستاردى اتقارۋعا, جەرگە ورنالاستىرۋ جوبالارىن جاساۋ ءۇشىن, شارۋا قوجالىقتارىن پاسپورتتاۋ ءۇشىن, تابيعي مالازىقتىق القاپتاردىڭ جانە جەردىڭ جاي-كۇيىن ساپالىق باعالاۋ ءۇشىن, جەرگە تولەنەتىن قۇننىڭ مولشەرىن, جەرگە تولەنەتىن سالىق پەن جالعا بەرۋ قۇنىن انىقتاۋ ءۇشىن نەگىز بولىپ سانالادى. توپىراقتىڭ قاسيەتىن بىلە وتىرىپ, اۋىل شارۋاشىلىعىن قولداۋ ماقساتىندا مەملەكەتتىك باعدارلامالاردى اتقارۋعا, سۋلاندىرۋ جۇيەسىن قۇرۋعا جانە پايدالانۋعا بولادى. سونداي-اق, تىڭايتقىشتاردى, زاماناۋي تەحنيكانى پايدالانۋدى جوسپارلاۋعا, اۋىل شارۋاشىلىعىن جۇرگىزۋدەگى الدىڭعى قاتارلى ادىستەردى ەنگىزۋگە دە مۇمكىندىك اشىلادى.
ورالحان ءداۋىت,
«ەگەمەن قازاقستان»
جامبىل وبلىسى