كاسىپكەر انا تۇيمەش ابدۋللاەۆانىڭ ەسىمى بۇگىندە ماڭعىستاۋلىقتارعا جاقسى تانىس. ارينە, تەك كاسىپكەر بولعاندىعى ءۇشىن ەمەس. الدىمەن, بەرەكەلى اۋلەتتىڭ كەلىنى, كەشەگى ۇلكەندەردىڭ ءتالىم-تاربيەسىن بۇگىنگە جالعاي العان انا – ونەگەلى وتباسىنىڭ ۇيىتقىسى بولعاندىعى ءۇشىن, بىرنەشە جۇمىس ورنىن اشىپ, اۋىلداستارىن كاسىپپەن قامتىعان ىسكەر بولعاندىعى ءۇشىن جانە «قارعا جەمىن باسىپ جەيدى, سۇڭقار جەمىن شاشىپ جەيدى» دەگەندەي, ءاردايىم جان-جاعىنداعى ءمۇجالسىز وتباسىلارعا, جاستارعا قولداۋ-كومەگىن اياماعان جومارتتىعى ءۇشىن.
ماڭعىستاۋدىڭ جەتىباي ءوڭىرىنەن مۇناي اتقىلاعان جىلى سول وڭىرگە قونىستانىپ, مۇناي سالاسىنا قىزمەتكە تۇرعان تۇيمەشتىڭ اتا-اناسى ءبىر ورىندا تۇراقتى جۇمىس جاساپ, زەينەتكەرلىككە شىقتى. «ءاۋ» دەمەيتىن قازاق جوق» دەمەكشى, دومبىرا تارتىپ, كۇي كۇمبىرلەتكەندى جانى قالايتىن اكەسى بازار كىشكەنتاي تۇيمەشكە ىرىم ەتىپ, دومبىرانىڭ قۇلاعىن تىستەتىپ وسىرگەن ەكەن. ىرىم تەككە كەتپەپتى, تۇيمەش ونەرگە جاقىن, اسىرەسە ءوز بەتىنشە دومبىرا ۇيرەنگەن تالانتتى قىز بولىپ ءوستى. الايدا, مەكتەپ بىتىرگەن سوڭ, بۇيىرعانى شىعار, ەڭبەك قىزىل تۋ وردەندى الماتى اۋىل شارۋاشىلىعى ينستيتۋتىن ينجەنەر-پەداگوگ ماماندىعى بويىنشا وقىپ, بىتىرەدى. تەحنيكالىق ماماندىق بويىنشا ءبىلىم الىپ جۇرسە دە, دومبىرادان قول ۇزە الماي, ستۋدەنت كەزىندە ينستيتۋتتىڭ 80 ادامدىق ا.جۇبانوۆ اتىنداعى وركەسترىنىڭ جەكە دومبىراشىسى بولىپ, ونداعى ءتۇرلى شارالاردا, ستۋدەنتتىك كوكتەم بايقاۋلارىندا, ستۋدەنتتىك ۇگىت بريگاداسىمەن ءماسكەۋ, كيەۆ, ۆولگوگراد, استراحان قالالارىن ارالاپ, كونتسەرتتەر قويعان ەكەن. ديپلومدى جاس مامان اۋىلعا كەلىپ, شەتپەدەگى №5 كاسىپتىك-تەحنيكالىق مەكتەپكە وقىتۋشى بولىپ جۇمىسقا تۇرىپ, 2000 جىلعا دەيىن وسى وقۋ ورداسىندا شاكىرت تاربيەلەيدى.
– جۇبايىم مارقۇم, جاۋلى ساۋاتتى, زامان لەبىن سەزىپ, زاماننىڭ قاجەتىنە قاراي ەڭبەك ەتۋدى ۇستانىم ەتتى. ەلىمىز نارىقتىق ەكونوميكاعا كوشكەن كەزەڭدە جول قۇرىلىسىمەن اينالىساتىن «ابات» جشس-ءىن قۇرىپ, اۋدان ەكونوميكاسىنىڭ دامۋىنا ءوز ۇلەسىن قوستى. مەنىڭ كاسىپكەرلىككە كەلۋىمنىڭ ءتۇپ باستاۋىندا سول ازاماتىم تۇر دەۋىمە بولادى. مەن 2000 جىلى العاش شاعىن 12 ادامدىق «گۇلشات» ءدامحاناسىن اشتىم, ودان سوڭ 2005 جىلى 60 ادامدىق «بەكزات» ءدامحاناسىن اشتىم, ال 2003 جىلدان باستاپ نان ونىمدەرىن شىعارۋمەن اينالىسىپ كەلەمىن. 2010 جىلى تۇركياداعى «كۋمكايا» فيرماسىمەن كەلىسىمشارتقا وتىرىپ, تالاپقا ساي زاماناۋي قۇرال-جابدىق ساتىپ اكەلدىك. 2011 جىلى تۇركيادان ارنايى ماماندار كەلىپ قۇرال-جابدىقتى قوسىپ بەرگەن سوڭ, بۇعان دەيىن شەتپەدە تەك فورماداعى نان (الەۋمەتتىك نان) عانا ساتىلسا, جاڭا ناۋبايحانا ىسكە قوسىلعاننان كەيىن ناننىڭ ءتۇر-ءتۇرىن شىعارا باستادىق, – دەيدى تۇيمەش بازارقىزى.
كاسىپكەرلىك – باسەكەلەستىك. قوعامدا ءوز ورنىڭ بولۋى كەرەك. ءوز ورنىڭ بولۋى ءۇشىن ورتادان تىس قالماي, ۇنەمى ىزدەنىس ۇستىندە, تانىم مەن كاسىپ كوكجيەگىن كەڭەيتە ءتۇسۋدىڭ ءمانى زور. ماڭعىستاۋ اۋداندىق ءماسليحاتى 5-ءشى شاقىرىلىمىنىڭ دەپۋتاتى بولعان ت.ابدۋللاەۆا اۋداننىڭ الەۋمەتتىك-ەكونوميكالىق دامۋىنا قاتىستى شەشىمدەرگە اتسالىسىپ, جاستار ساياساتى ورتالىعىمەن, ۇكىمەتتىك ەمەس ۇيىمدارمەن, ارداگەرلەر كەڭەسىمەن بىرگە ءبىراز شارالارعا قاتىسىپ, جاستاردى وتانسۇيگىشتىككە تاربيەلەۋدە, تۇرعىنداردى اۋىلدىڭ كوركەيۋىنە, تازالىعىنا شاقىراتىن شارالارعا بەلسەندى قاتىستى. ال, كاسىپكەرلىك باعىتىندا ورال قالاسىندا ءوتكەن «كەدەن وداعى اياسىنداعى كوشباسشى ايەلدەردىڭ باستامالارى» اتتى حالىقارالىق فورۋمىنا, V استانا ەكونوميكالىق فورۋمىنا, يسلام ەكونوميكالىق فورۋمىنا, استانادا وتكەن قازاقستاننىڭ ۇزدىك تاۋارى كورمەسىنە جانە IV ەۋرازيالىك ايەلدەر سامميتىنە قاتىسىپ, سونداي-اق, كاسىپكەرلەر پالاتاسىنىڭ ۇيىمداستىرۋىمەن ىسكەرلىك ساپارمەن يتالياعا بارىپ قايتتى. مۇنىڭ بارىندە كاسىپكەرلىكتى دامىتۋ, ەل ەكونوميكاسىنا ۇلەس قوسۋ, نارىقتىق بەيىمدىلىكتى ارتتىرا ءتۇسۋ باعىتىندا تاجىريبە الماسۋ جانە جيناقتاۋدى باستى ماقسات ەتتى.
ماڭعىستاۋ اۋداندىق جۇمىسپەن قامتۋ جانە الەۋمەتتىك باعدارلامالار شارتىنا سايكەس اۋىلداعى نىسانالى توپتان قىز-كەلىنشەكتەردى جۇمىسقا قابىلداپ, مۇمكىندىگى شەكتەۋلى جاندارعا ۇيىندە وتىرىپ جۇمىس جاساۋعا مۇمكىندىك بەرگەن ول قازىر 20 ادامدى جۇمىسپەن قامتىپ وتىر. ەڭبەگىنە, ەر ازاماتتىڭ كوتەرگەن جۇگىن كوتەرە بىلگەن قايراتىنا قاراي العان ماراپاتتارى دا جەتەرلىك. بۇگىندە «ابدۋللاەۆا» جك باسشىسى, 2016 جىلدان اقتاۋ قالاسى جانە ماڭعىستاۋ وبلىسى ىسكەر ايەلدەر قاۋىمداستىعىنىڭ ماڭعىستاۋ اۋدانى بويىنشا وكىلدىگىنىڭ جەتەكشىسى اتانعان تۇيمەش – ابات, بەكزات, داۋلەت اتتى ۇلدار مەن گۇلشات ەسىمدى قىزدىڭ, نەمەرە-جيەندەردىڭ اياۋلى اناسى, اسىل اجەسى. جۇبايى 44 جاسىندا باقيعا ەرتەرەك اتتانىپ كەتسە دە, مۇقالماي ءتورت بالاسىن جەتىلدىرىپ, كاسىبىن ۇرشىقشا ءيىردى. ماڭعىستاۋ اۋداندىق ءماسليحاتىنىڭ 6-شى شاقىرىلىمىنا دەپۋتات بولىپ سايلانعان ابات جول قۇرىلىسىمەن اينالىساتىن مەكەمەنى باسقارسا, بەكزات كىرىس باسقارماسىندا, گۇلشات «Ernst&Young» كومپانياسىندا قىزمەتتە. كىشى ۇلى داۋلەت بەيجىڭدە «China Unuversity of Petroleum, Beijing» مۇناي ينستيتۋتىندا وقىپ ءجۇر. ىڭ-شىڭسىز, تاتۋ-ءتاتتى اۋلەتتىڭ التىن قازىعى, ەل سىيلاعان كاسىپكەر-انا بۇگىنگى زەينەتتى تىرلىككە تەك ەرىنبەي جاساعان ەڭبەكتىڭ, نەبىر قيىندىقتارعا مويىماي قارسى تۇرا بىلگەن تاباندىلىقتىڭ ارقاسىندا جەتتىم دەپ وتىر. تۇيمەش بازارقىزىنىڭ بۇل قاسيەتتەرىنە قاراپ, قازاق قىزدارىنىڭ بويىنداعى جىگەردى تاني تۇسكەندەي بولاسىز جانە وسى قاسيەت بۇگىنگى, كەلەشەك قازاق قىزدارىنىڭ بويىنان جوعالماۋىن تىلەيمىز.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى