چەحيادا قازاقستاندىق اسكەري تۇتقىنداردىڭ جەرلەنگەن ورىندارى تابىلدى
جاقىندا قازاقستاننىڭ چەحياداعى ەلشىسى سەرجان ابدىكارىموۆ وسى ەلدىڭ ولوموۋتس ايماعىنداعى يەسەنيتسە وڭىرىنە (گورنى ليپوۆە, دوماشوۆ, رۋدوحورجي ەلدى مەكەندەرى) بارىپ, جەرگىلىكتى وكىمەت پەن قوعامدىق ۇيىمدار وكىلدەرى جانە ەرىكتى-ىزدەۋشىلەرمەن بىرگە, كەڭەس اسكەري تۇتقىندارىنىڭ, ونىڭ ىشىندە قازاقستاننان تارتىلعان اسكەري جاۋىنگەرلەردىڭ زيراتىنا گۇل شوقتارىن قويدى.
ەكىنشى دۇنيەجۇزىلىك سوعىس جىلدارىندا يەسەنيتسە وڭىرىندە كەڭەس وداعى رەسپۋبليكالارىنان, ۇلىبريتانيا, فرانتسيا جانە پولشادان 6 مىڭعا جۋىق اسكەري تۇتقىن جۇمىس ىستەسە, ول جەرلەردە نەمىستىڭ 60-قا جۋىق ەڭبەك لاگەرلەرى ورنالاسقان ەكەن.
رەسەي جانە چەحيانىڭ قوعامدىق ۇيىمدارىمەن, ەرىكتى ىزدەۋشىلەرمەن سول لاگەرلەردە قازا بولعان 1300-گە جۋىق اسكەري تۇتقىننىڭ, ونىڭ ىشىندە 16 قازاقستاندىق جاۋىنگەردىڭ اتى-جوندەرى مەن ومىرباياندىق ءمالىمەتتەرى جيناقتالدى (اقپارات www.obd-memorial.ru پاراقشاسىندا ورنالاسقان). يەسەنيتسە ءوڭىرىنىڭ جەرگىلىكتى وكىمەتىمەن جانە ەرىكتى-ىزدەۋشىلەرمەن سول ماڭدا جەرلەنگەن باسقا دا وتانداستارىمىزدى ءىزدەستىرۋ جانە سايكەستەندىرۋ بويىنشا جۇمىستاردى جالعاستىرۋ ءجونىندە ۋاعدالاستىقتارعا قول جەتكىزىلدى.
قازاقستاننىڭ پراگاداعى ەلشىلىگى قازا بولعان وتانداستارىمىزدىڭ تۋعان-تۋىسقاندارىنا وزدەرىنىڭ اكە-اتالارىنىڭ جەرلەنگەن جەرلەرىن ىزدەپ انىقتاۋ ءۇشىن چەحيانىڭ جەرگىلىكتى وكىمەتىمەن بايلانىستار ورناتۋىنا قولعابىس كورسەتۋگە دايىن ەكەندىگىن ءبىلدىرىپ وتىر.
بۇل ماسەلە بويىنشا قازاقستاننىڭ چەحياداعى ەلشىلىگىنىڭ ءبىرىنشى حاتشىسى دامير ۋاجانوۆقا حابارلاسۋعا بولادى. ونىڭ جۇمىس تەلەفونى: +420 233 310 671, ۇيالى تەلەفونى: +420 739 341 414, ەل. پوشتاسى: d.uazhanov@mfa.kz.
قازاقستان ازاماتتارى ءۇشىن ەلشىلىك چەحيا جەرىندە جاتقان وتانداستارىمىزدىڭ اتى-جوندەرىن جاريالاپ وتىر:
جۇماعازى التىباەۆ, 1921 ج.ت., الماتى وبلىسى («13 مارت» اۋىلى); مولدىناموۆ, 1904 ج.ت., كيريللوۆكا اۋىلى; الۆيپ (البي, اليبي) تايلا, 1899 ج.ت., گۋرەۆ وبلىسى, ماڭعىستاۋ اۋدانى, اۋىرپا اۋىلى; سمايل بەيمينوۆ, 1906 ج.ت., اقتوبە وبلىسى (ىرعىز اۋىلى); تاش (تاجي, تاس) ۋتيۋگۋلوۆ, 1900 (1903) ج.ت., اقتوبە وبلىسى (شۇبارقۇدىق اۋىلى); سانتاي ىستىلەەۆ (يستەلەەۆ), 1915 ج.ت., قىزىلوردا وبلىسى (وكتيابر اۋىلى); بايەكى (Bajeki) كوسەلباەۆ (كاسەلباەۆ), 1912 ج.ت., قىزىلوردا وبلىسى (قازالى ق.); ناركاش كۇلجۇمانوۆ (كۇلشۋمانوۆ), 1904 ج.ت., جانگەلدى اۋدانى (بىرلىك اۋىلى); شاياحمەت (شەياحمەد) سۇلەمەنوۆ (سۇلەيمەنوۆ), 1921 ج.ت., شىعىس قازاقستان وبلىسى, تارباعاتاي اۋدانى (زايسان اۋىلى); بەلگىباي سۇلەيمەنوۆ, 1903 ج.ت., شىعىس قازاقستان وبلىسى, تارباعاتاي اۋدانى (زايسان اۋىلى); جۇماعۇل يسمۋرزين, 20 شىلدە 1897 ج.ت., قوستاناي وبلىسى, سەميوزەر اۋدانى (جاركول اۋىلى); ءمۋفتۋالي دوسمۇحامبەتوۆ, 1891 ج.ت., ساراتوۆ وبلىسى, بالاكوۆو اۋدانى (ناتالين اۋىلى); ساعي المانوۆ, 1898 ج.ت., ستالينگراد وبلىسى (حارابالي سەلوسى, كومسومولسكايا كوشەسى, 3. سىردالى ارساليەۆ, 1903 ج.ت., قىزىلوردا وبلىسى, ارال اۋدانى (كۇرتارال اۋىلى); قالمىرزا امالبەكوۆ, 1906 ج.ت., وڭتۇستىك قازاقستان وبلىسى, كيروۆ اۋدانى (ينتەرناتسيونال اۋىلى); ايسي دوسمىرزا, 1913 ج.ت., قازاق سسر, رۋزاەۆ اۋدانى (اقشىناق اۋىلى).
«ەگەمەن-اقپارات»