سۋداعى قاۋىپسىزدىكتىڭ الدىن الۋ جۇمىستارى باستالدى

قوستاناي. 13 مامىر. قوستاناي وبلىستىق توتەنشە جاعداي دەپارتامەنتىنىڭ ماماندارى سۋداعى قاۋىپسىزدىك ماسەلەلەرى جونىندە بريفينگ وتكىزدى. وندا وبلىس وڭىرىندەگى سۋ ايدىندارىن تازالاۋ جانە جاعاجايلاردى رەتكە كەلتىرۋ تۋرالى ايتىلدى. بۇل تۋرالى وبلىستىق توتەنشە جاعداي دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. بريفينگ جۇمىسىنا دەپارتامەنتتىڭ توتەنشە جاعدايلاردىڭ الدىن الۋ ءبولىمى باستىعى ازاماتتىق قورعاۋ پودپولكوۆنيگى و. مەڭدىباەۆا, دەپارتامەنتتىڭ توتەنشە جاعدايلاردى جويۋ ءبولىمى باس مامانى ازاماتتىق قورعاۋ پودپولكوۆنيگى م. لەۆچەنكو جانە «سولتۇستىك وڭىرلىك اەروۇتقىر جەدەل قۇتقارۋ جاساعى» باس قۇتقارۋشىسى ج. مۇرزابەكوۆا قاتىستى. ولار قوستاناي وبلىسىنىڭ سۋ ايدىندارىنداعى قاۋىپسىزدىكتى باقىلاۋ جانە ادامداردىڭ سۋدا قازا بولۋ سەبەپتەرى تۋرالى ايتىپ بەردى. 2015 جىلى وبلىستا 36 ادام سۋعا كەتكەن, ونىڭ 4-ءى بالالار. ال بيىل جىل باسىنان بەرى 3 ادامنىڭ اجالى سۋدان بولعان. ونىڭ بارلىعىنا نەگىزگى جەكە نەمقۇرايلىلىق, رۇقسات ەتىلمەگەن جەرلەردە ماس كۇيىندە شومىلۋ, سونداي-اق, ەرەسەكتەر جاعىنان بالالارعا باقىلاۋدىڭ بولماۋى سەبەپ بولعان. سۋعا شومىلۋ ماۋسىمى رەسمي تۇردە 1 ماۋسىمدا اشىلادى. الايدا, وبلىستاعى ادامدار مامىر ايىنداعى مەرەكەلەردە-اق سۋ ايدىندارىندا شومىلۋدى باستاپ كەتتى. ادامدار جاعاجايعا دەمالۋعا كەلگەندە ىشىمدىك ىشەدى, ماس كۇيىندە سۋعا تۇسەدى. ارنايى جاعاجايلاردا قۇرامىندا ءتورت ادامنان قۇتقارۋشى, مەدبيكە بار قۇتقارۋ بريگادالارى جۇرەدى. الايدا, ادامدار جابدىقتالماعان جەرلەردە, تەرەڭدىگى ءارى اعىسى بەلگىسىز, قۇتقارۋشىلارى جوق جەرلەردە شومىلۋدى قىزىق كورەدى. بريفينگكە قاتىسۋشىلار سۋ ايدىندارىنىڭ ماڭىندا دەمالاتىن ۋاقىتتارىن وتكىزەتىن ەرەسەكتەر ەرتىپ بارعان بالالارىن قاراۋسىز قالدىراتىنىنا ايىرىقشا توقتالدى. اتا-انالار ءبىرىنشى كەزەكتە جابدىقتالماعان جەرلەردە شومىلۋعا بولمايتىنىن, سۋ ايدىندارىنىڭ ماڭىندا قاۋىپسىزدىك ەرەجەلەرىن ساقتاماۋ, قايعىلى وقيعالارعا اكەلۋى مۇمكىن ەكەنى بالالارعا ءتۇسىندىرۋ قاجەت. دەپارتامەنت وكىلدەرى ازاماتتارعا مەكەمەنىڭ رەسمي سايتىندا قازاقستان رەسۋبليكاسىنىڭ سۋ ايدىندارىنداعى قاۋىپسىزدىك ەرەجەلەرىمەن تانىسۋ مۇمكىندىگى تۋرالى ەسكەرتتى. سايتتىڭ تۇرعىندارعا ارنالعان ساۋالماما بولىمىندە سۋ ايدىندارىنداعى قاۋىپسىزدىك ەرەجەلەرى تۋرالى ساۋالمانا ورنالاستىرىلعان. اركىم ونلاين رەجيمىندە وسى ەرەجەلەردى قانشالىقتى بىلەتىنى جايلى ءوزىن-ءوزى تەكسەرۋدەن وتكىزە الادى. ءنازيرا جارىمبەتوۆا. دەرەك, فوتو: قوستاناي وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.