بەرەكەنى ەسەلى ەڭبەكتەن تىلە

وڭتۇستىكتە اگرارلىق سالانىڭ دامۋ دەڭگەيى جوعارى. بۇگىندە وسى سالادا 70 مىڭنان استام شارۋا قوجالىقتارى بولسا, وبلىستىڭ وڭىرلىك جالپى ءونىمىنىڭ ون ءۇش پايىزىن سولار قۇراپ وتىر. ال ەگىن شارۋاشىلىعىنىڭ ۇلەس سالماعى 54 پايىزعا جەتەدى. وڭتۇستىكتىڭ شارۋالارى مال شارۋاشىلىعىنا ابدەن بەيىم­دەلىپ الدى. بەيىمدەلگەنى قالاي, ءتورت ت ۇلىك اتا-بابامىزدىڭ كاسىبى ەمەس پە دەرسىز, كەلىسەمىز. بىراق, ايتار داتىمىز بار. بۇگىندە اۋىل شارۋاشىلىعى مينيسترلىگىنە قاراستى سۋ رەسۋرس­تارى كوميتەتىنىڭ تىزگىنىن ۇستاپ وتىرعان يسلام ابىشەۆ كەزىندە وڭتۇستىكتەگى ورداباسى اۋدانىن­دا اكىم بولعان. قازىر شارۋا قو­جا­لىقتارىنا اۋدان, قالالاردا اشىلعان نەسيە سەرىكتەستىكتەرى 6-7 پايىزبەن قاراجات بەرىپ وتىرسا, وسى جۇيەنىڭ ومىرگە ەنۋىنە ۇيىتقى بولعان, جوباسىن ازىرلەگەن وسى ازامات. يسلام ءال­ماحان ۇلى بادام اۋى­لىندا جيىن وتكىزدى. قاتىستىق. اۋىل شارۋاشىلىعىنداعى كۇر­مەۋلى ماسەلەلەر ءسوز بولدى. «سىزدەر الدارىڭىزداعى بەس-ال­تى سيىر, ونداعان جاندىق­تا­رىڭىزدى ورىسكە ايداپ تاس­تاپ قاراپ وتىراسىزدار. جەم جەمە­گەن سيىردىڭ ءبۇيىرى قابى­سىپ نە ءسۇت, نە ەت بەرمەيدى. اناۋ ساي­­رامداعى قارابۇلاق اۋى­لىنداعى مال بورداقىلاپ وتىر­عان وزبەك اعايىندارعا قارا­ڭىز­دار. جايىلىمدىق جەر جوق. بىراق, ولار باققان ءبىر قارا مال سىزدەردىڭ ەكى سيىرىڭىزدىڭ ەتىن بەرەدى. سيىرلارى دا ءسۇتتى. الىپ بارايىن, تاجىريبەسىن ۇيرەنىڭىزدەر», دەگەن. ياعني, مالدى ورىسكە ايداپ تاس­تاپ, كەشكە قورالاپ الۋدىڭ زامانى ءوتىپ بارادى. قۇراماجەم جەمەگەن مالدىڭ ءبۇيىرى مايلان­بايدى, سۋ تەگىنگە كەتەدى. يسلام ءابىشوۆتىڭ سول اڭعارتقانى شا­رۋالارعا ساباق بولدى. بۇگىندە ءىرى قارا بورداقىلاپ, اقشانى كۇرەپ تاۋىپ وتىرعان قازاق شارۋا­لا­رى كوپ. سونىڭ ءبىرى – تولە بي اۋ­دانىنداعى سايلىباي ساحوۆ اقساقال. ونىڭ شارۋا قوجا­لى­عى اۋدانداعى بەتكە ۇستار شارۋا­شىلىققا اينالعان. «ءومىرباي اتا» سەرىكتەستىگىنىڭ قوراسىندا بۇگىندە اسىل تۇقىمدى جۇزدەن استام ءىرى قارا باعىمدا. العاشقىدا بيە بايلاپ, ساۋمال, قىمىز دايىنداپ ساۋداعا شى­عارعان سايلىباي ساحوۆ سۇ­رانىسى كوپ ءسۇتتى باعىتتاعى شا­­­­ر­ۋاشىلىقتى جولعا قويعان. سەرىكتەستىكتەگى 60 سيىردان كۇ­نىنە 500 ليتردەن استام ءسۇت ساۋى­لادى. وتكىزەتىن جەر قايدا دەي­تىندەي ەمەس, اتاقتى «فۋد ماس­تەردىڭ» فيليالى ىرگەدە. بۇل شارۋاشىلىقتا اۋىلدىڭ ون ءتورت ازاماتى ناپاقاسىن ايىرىپ وتىر. – كاسىپكەرلىكتى اشۋعا تاۋەكەل كەرەك, – دەيدى سايلىباي ساحوۆ. – جۇمىس جوق دەپ اۋىزىڭدى قۇر شوپپەن سۇرتە بەرسەڭ ەش­كىم دۇنيەسىمەن بولىسپەيدى. قازاقتىڭ دالاسى كەڭ-بايتاق. جايىلىمدىق جەر دە, جەم قورى دا جەتكىلىكتى. سوندىقتان, كاسىبىن اشۋعا جۇرەكسىنىپ ءجۇر­گەندەرگە بەرەر كەڭەسىم, ءوز شا­رۋا­شىلىعىڭنىڭ قازىعىن قاق. باستاپقىدا اۋىر بولار, بىراق, بەينەت ءبارىن جەڭەدى. كەيىن زەينەتىن كورەسىڭ. اۋىل شارۋاشىلىعىندا جاق­سى تابىسقا جەتىپ وتىرعان سە­رىك­­تەس­تىك باسشىسىنىڭ بايلامى وسى.  باقتيار تايجان, «ەگەمەن قازاقستان» وڭتۇستىك قازاقستان وبلىسى