«ترە كرۋنۋر» تەگەۋرىن تانىتتى

مامىردىڭ 11-ءى كۇنى تۇندە رەسەيدە ءوتىپ جاتقان حوككەيدەن الەم چەمپيوناتى ىرىكتەۋ ءتۋرنيرىنىڭ كەزەكتى ماتچىندا قازاقستان قۇراماسى شۆەتسيا كومانداسىمەن كەزدەستى. الەمدەگى ەڭ تاڭداۋلى حوككەي جاساعىنىڭ ءبىرى بولىپ تابىلاتىن «ترە كرۋنۋرمەن» ويىننان پالەندەي وڭدى ناتيجە كۇتە قويعان جوقپىز. سوندىقتان, ءبىزدىڭ جاماعاتتىڭ ودان 3:7 بولىپ ۇتىلىپ قالعانىنا اسا قاتتى تاڭعالا دا قويمادىق. دەگەنمەن, ماتچتىڭ باسى بۇ­عان دەيىن تۋرنيردە وتكىزگەن ءۇش كەزدەسۋىندە دە تاباندىلىعىمەن, جانكەشتىلىگىمەن, تالپىنىسىمەن تانىلعان كوماندا بۇل جولى دا سول بەدەلىنە قىلاۋ تۇسىرمەيتىن سياقتى بولىپ كورىنگەن. قازاقستان مۇزدى ايدىن سەرىلەرى ويىندى جامان باستاعان جوق. الايدا, قارسى قاقپانىڭ قاراسىن قاراۋىلعا الۋدا كىبىرتىكتەي بەردى. مۇنىڭ ەسەسىنە, قانداي جاعدايدا دا وزىنە ءتيىمدى ءساتتى قالت جىبەرە قويماي­تىن قارسىلاستارىمىز ويلاماعان جەردەن ەسەپ اشىپ كەتتى. ءسويتىپ, 13-مينۋتتا ميكاەل باللۋند تالقانداۋدىڭ ىلكى قادامىن جاسادى. سول-اق ەكەن, قازاقستاندىقتاردىڭ قورعانىس قاتارى سەتىنەپ سالا بەردى. ارادا 3 مينۋت وتكەندە لينۋس كلاسەن ەسەپتى وسىرسە, تاعى 1 مينۋتتان سوڭ ادام لارسسون ونى 3:0-گە جەتكىزدى. ابىروي بولعاندا, بىزدەن داستين بويد كەزەڭنىڭ سوڭعى سەكۋندتارىندا ءبىر شايبانىڭ قارىمتاسىن قايتارا الدى. ەكىنشى كەزەڭدە شۆەدتەر باسىم­دىلىقتارىن تاعى ەكى شايباعا ارتتىردى. ولاردى 25 جانە 29-مينۋتتاردا گۋستاۆ نيۋكۆيست ءتۇسىردى. ال ءۇشىنشى كەزەڭنىڭ باس جاعىندا ءبىزدىڭ حوككەيشىلەرگە دە وسىلاي ءبىر مينۋتتىڭ اينالاسىندا قاتارىنان ەكى گول سالىپ كەتۋدىڭ ورايى كەلدى. ونىڭ ءبىرىنشىسىن 47-مينۋتتا ۆلاديمير ماركەلوۆ قارسى قاقپاعا اتتاندىرسا, ەكىن­شىسىن كەلەسى مينۋتتا رومان ساۆچەنكو ءوز ەسەبىنە جازدى. بۇدان ءارى ويىننىڭ سوڭعى نۇكتەسىن قويۋ مۇمكىندىگىن شۆەدتەر الدى. ونى 55-مينۋتتا سالعان نيۋكۆيست حەت-تريككە قول جەتكىزدى. ماتچ بارىسىندا قازاقستان قۇراماسى ەكى رەت ايدىندا ويىنشىلارى كوپ كەزىندە ءوز قاقپاسىنا شايبا سالدىرىپ الدى. مۇنىڭ ءوزى كوماندانىڭ قورعانىس شەبى كىلتيپاندى ەكەنىن كورسەتتى. ءايت­كەنمەن, سوعان قاراماستان, جىگىتتەر بۇل جولى دا ويىن اراسىندا شيەلەنىس تۋعىزىپ تۇرۋعا قابىلەتتى ەكەندەرىن بايقاتىپ قويدى. بۇرناعى كۇنى سونداي-اق شۆەي­تساريا لاتۆيانى 5:4, فينليانديا ۆەنگريانى 3:0 ەتىپ تىزە بۇكتىردى. بۇل كۇنى بەلورۋستار سلوۆاكتاردى 4:2 ەتىپ ۇتىپ, تاعى ءبىر سەنساتسيانى ومىرگە اكەلدى. ال كەشە چەحيا – نورۆەگيا, اقش – فرانتسيا, رەسەي – دانيا, كانادا – گەرمانيا قۇرامالارى كەزدەستى. بۇگىن قازاقستاندىقتار چەحتارمەن مۇز ايدىنىنا شىعادى. وسى كۇنى مۇنىمەن قاتار اقش – ۆەنگريا, دانيا – لاتۆيا, گەرما­نيا – بەلارۋس ۇشىراسادى. مامىردىڭ 11-ءى كۇنگى ويى­ن­داردىڭ قورىتىندىسى بويىنشا ا توبىندا چەحيا, شۆەتسيا (ەكەۋىندە دە – 8 ۇپاي), ۆ توبىندا فينليانديا (12) مەن كانادا (9) كوش باستاپ كەلەدى. رۋسلان يگىلىك