پوەزيا پاتشايىمىنىڭ كوسەمسوز مۇراسى

كىتاپ وقۋدىڭ ۇلت بولاشاعى ءۇشىن ماڭىزى زور. ءبىلىمسىز قوعام ەشقاشان دا ورگە باسقان ەمەس. كىتاپ – ءبىلىم مەن عىلىم ايدىنى. مىنە, وسىنداي ايدىنىمىزعا تاياۋدا عانا تاعى ءبىر قۇندى ەڭبەك قوسىلعانىن جۇرتشىلىققا قۋانا جاريالاعالى وتىرمىز. ول – ديپلومات, جۋرناليست, پۋب­ليتسيست, فيلولوگيا عى­لىم­دارى­نىڭ كانديداتى, دوتسەنت گۇلسىم ەڭسەپوۆانىڭ «فو­ليانت» باسپاسىنان جارىققا شىق­قان «فاريزا – كوسەمسوز پات­شايىمى» اتتى عىلىمي مونو­گرافيالىق كىتابى.  بۇل مونوگرافيادا جۇرتشىلىققا دارابوز اقىن  رەتىندە كەڭىنەن تا­نىلعان قازاق­ستاننىڭ حالىق جازۋشىسى, مەم­لەكەتتىك سىيلىقتىڭ لاۋرەاتى فاريزا وڭعارسىنوۆانىڭ جۋرناليستىك, رەداكتورلىق, پۋب­ليتسيستىك قىرى جان-جاقتى تالدانادى. اتالعان تۋىندىنىڭ تاقى­­رىبى مەن يدەياسى, كوتەر­گەن جۇگى, ءمان-مازمۇنى, جانر­لىق الۋان تۇرلىلىگى جانە ستيل­دىك سيپاتىمەن قوسا,  سۋرەت­كەرلىك شەبەرلىگىن اۆتور عى­لىمي تۇرعىدان اشىق تا, جا­تىق تىلمەن شەبەر سۋرەتتەي بىلگەن. شىندىعىندا, ءبىز وسى ۋاقىتقا دەيىن اقىننىڭ الەمىن ءبىر قىرىنان عانا ءبىلىپ, ونى تەك ءسوز قۇدىرەتى – پوەزياعا عانا تەلىپ ءجۇرىپپىز. عالىم گۇل­سىمنىڭ ءبىر ارتىقشىلىعى سول, تىڭ تا­قىرىپتى ءبىرىنشى بولىپ كورە ءبىلدى جانە دەر كەزىندە وقىرمانعا ۇسىنىپ ۇلگەردى. مۇنىمەن بىرگە, مونوگرافيادا اقىننىڭ كوزى تىرىسىندە باس­پا بەتىن كورمەگەن شى­عارمالارى قامتىلعاندىقتان, عىلىمي تۋىن­دىنىڭ قۇنى مەن ءباسى ودان سايىن بيىكتەي تۇسەدى. كىتاپتا بۇل مونوگرافيالىق ەڭبەكتىڭ جازىلۋىنا فاريزا اپاي­دىڭ ءوز ءسوزى تۇرتكى بولعانى باياندالادى. «اپاي جايلى ايتار بولسام» اتتى ەسسەسىندە اۆتور: «باسقوسۋلاردىڭ بىرىندە اپاي: «ەلدىڭ ءبارى مەنى اقىن دەيدى دە, جۋرناليست بولعانىمدى ايتپايدى. العاشقى ماماندىعىم مۇعالىم بولسا دا, ەڭبەك جولىم جۋرناليست بولۋدان باستالعان. جۋرناليستيكانىڭ وتىمەن كىرىپ, ك ۇلىمەن شىققان, وسى سالادا تالماي ەڭبەك ەتكەندەردىڭ ءبىرى مەنمىن. مەنى حالىققا تانىمال قىلعان, ەڭ بىرىنشىدەن, اقىندىعىم ەمەس, جۋرناليستىك قىزمەتىم. بىراق, قازىرگى ۇلكەن جۋرناليستەردىڭ بىرەن-سارانى عانا بولماسا, جاستار جاعى مەنىڭ جۋرناليستىك قىزمەتىم جايلى مۇلدەم ەستىمەگەن», دەپ ايتىپ وتىراتىن» دەيدى. اقىن ف.وڭعارسىنوۆانىڭ جۋر­ناليستىك جولىنا, رەداكتورلىق قىزمەتىنە, پۋبليتسيستيكالىق شى­عارمالارىنا تۇتاس ءبىر شىعار­ماشىلىق جۇيە رەتىندە, كەشەندى تۇردە تولىق ءارى شىنايى باعا بەرۋ, ونىڭ پۋبليتسيستيكالىق مۇراسىن بۇگىنگى كۇن تۇرعىسىنان العاش رەت عىلىمي اينالىمعا ءتۇسىرۋ با­سىلىمنىڭ باستى جە­تىستىگى بولىپ تابىلادى. فاريزا وڭعارسىنوۆا – اقىن­دىق ونەر مەن جۋرناليستىك كاسىپتى قاتار الىپ جۇرگەن قالامگەر. ارينە, مۇنداي ءۇردىس دۇنيەجۇزىلىك تاجىريبەدە, ونىڭ ىشىندە قازاق ءباسپاسوزىنىڭ تاريحىندا دا بار. بىراق, سيرەك كەزدەسەتىن قۇبىلىس. سوندىقتان ونىڭ قىرى مەن سىرىنا قانىعۋ, باسقالارعا ۇلگى-ونەگە رەتىندە ۇسىنۋدىڭ پايداسى مول. وسى تۇرعىدان العاندا, بۇل كىتاپتىڭ جەتىستىگى مەن  قۇن­دىلىعى ەرەكشە. جاڭا تۋىندىنى پاراقتاپ وتىرىپ, اۆتوردىڭ بۇل ەڭبەكتە فاريزا اقىننىڭ تەك جۋرناليستىك قىزمەتىنە عانا عىلىمي تالداۋ جاساماعاندىعىن كورەمىز. بۇل تۋىندىنىڭ تاعى ءبىر قۇندى تۇسى – فاريزا اپايمەن جاقىن ارالاسقان ادام عانا بىلەتىن, جالپى جۇرتشىلىق ءۇشىن بەلگىسىز بولىپ كەلگەن كەيبىر قىرلارى مەن سىرلارى اشىلادى. سونىمەن قاتار, سىرتتاي قارا­عان ادامعا قاتال مىنەزدى بولىپ كورىنەتىن فاريزا اپايدىڭ ادام­گەرشىلىگى, ونىڭ قانداي بالاجان كىسى بولعاندىعى, قولىنىڭ جومارتتىعى, مارتتىگى سەكىلدى ءۇل­كەن ادامي قاسيەتتەرى پاش ەتىلىپ, اقىننىڭ ومىرىنەن كوپشىلىككە ۇلگى بولارلىق ىزگىلىك ىستەرىن بايانداي وتىرىپ, ونى  جاڭاشا قىرىنان تانىتا تۇسەدى. كىتاپ قالامگەر قاۋىمعا, جۋر­­­نا­ليستيكا سالاسىن زەرتتەۋ­شىلەرگە, ستۋدەنتتەرگە, ماگيس­ترانت­­­تارعا, دوكتورانتتارعا, باق قىز­­مەتكەرلەرىنە, جالپى وقىرمان قاۋىمعا ارنالعان. راۋشان تاۋىرحانقىزى, «ەگەمەن قازاقستان»