مۇگەدەك دەپ مۇقاتۋعا بولا ما؟

رەداكتسيامىزعا جانايقايىن جەتكىزگەن حات كەلىپ ءتۇستى. وندا ايشا مۇقانوۆا اتتى استانا تۇرعىنى جانىنىڭ جاپا شەگىپ جابىرلەنگەنىن ايتىپ, مۇڭىن شاعىپتى. وقيعا قالاي بولعان؟ وسى جىلدىڭ 8 قاڭتارىندا ايشانى تۋىسى مارينا تولەگەنوۆا قۇربىسى دانا­گۇل سەيىتبەكوۆامەن بىرگە تۋعان كۇنىنە شاقىرادى. كەنەسارى كوشەسىنەن ورىن تەپكەن «يمپەريال م» ويىن-ساۋىق ورتالى­عىن­دا تۋعان كۇن كەشىن وتكىزبەك بولىپ ۇيعارعان ولار اتالعان عيماراتتىڭ الدىنا كەلىپ توقتايدى. جالدانعان تاكسيمەن ور­تا­لىقتىڭ جانىنا توقتاپ, الدىمەن ويىن-ساۋىق ورتالىعىندا ورىن بارلىعىن بىلمەككە ايشانىڭ ءسىڭلىسى ءاليانى جۇم­سايدى. ىشكە كىرىپ ءمان- جايدى بىلگەن ءاليا ورىن بار ەكەنىن ايتقان سوڭ, كولىكتەن ءتۇسىپ عيماراتتىڭ ىشىنە كىرگەنى سول-اق ەكەن الدىنان كۇزەتشى كەس-كەستەپ زالعا وتۋگە بولمايتىنىن ايتادى. جانە كۇزەتشىلەر جالعىز ەمەس ولاردىڭ جانىنداعى اكىمشى– ۆيكتوريا ۋگەرت تە ولاردى قولدايدى. ۆيكتوريا الەكساندروۆنا «بىزدە مۇگەدەكتەرگە ارنالىپ جاسالعان جاعداي جوق, تىپتەن ورىن دا جوق»,–دەپ بەت باقتىرماعاننان كەيىن ورتالىقتىڭ مەڭگەرۋ­شىسى مارات ساليحوۆتى شاقىرتادى. مارات ءابىش ۇلىنا بۇرىن دا وسى ورتالىققا بىرنەشە رەت كەلگەنىمىزدى, ارقاشان مادەنيەتتى تۇردە دەمالىپ, كوڭىلىمىز كوتەرىلىپ قاي­تاتى­نىن ايتىپ, اكىمشىنىڭ ورەسكەل قىلىعى­نان اراشا سۇرادىق. بىراق بىزدەن گورى اكىمشىنىڭ ءسوزىن تىڭداعاندى ءجون كورگەن ول ەش شارا قولدان­بادى. وسىلايشا جارتى ساعات ايازدا تۇرىپ, ەڭسەمىز ءتۇسىپ ۇيىمىزگە قايتتىق. ءيا, ءبىز مۇگەدەكپىز. مەن جانە مەنىڭ قۇر­بىم داناگۇل سەيىتبەكوۆا ەكەۋمىز قولارباعا تاڭىلعان جانبىز. بۇل سىرتقى جايىمىز, ال ءبىزدىڭ جانىمىز مۇگەدەك ەمەس, ءبىز بىرەۋ­دىڭ مۇڭىنا مۇڭ جابۋدى ءوز باسىمىزعا ار سانار ەدىك. ال قول-اياعى بالعاداي جاندار­دىڭ بىزگە وسىنشالىق الىمجەتتىك كورسەتىپ, قورلاعانى نەسى؟!» – دەپ جازادى ادامگەرشىلىكتى اياققا تاپتاعان جانداردان جاپا شەككەن ايشا مۇقانوۆا. رەداكتسيا «يمپەريال م» ويىن-ساۋىق ورتالىعىنىڭ باسشىسىنا, ونىڭ قىزمەت­كەر­لەرىنە ءبىزدىڭ ەلىمىزدىڭ «مۇگەدەكتەردىڭ قۇقىعى جايىنداعى كونۆەنتسياعا» قول قوي­عاندىعىن جانە ەلىمىزدىڭ زاڭى بويىنشا بار­لىق كوپشىلىك مەكەمەلەرىندە, قوعام­دىق ورىن­د­اردا مۇگەدەكتەرگە ارنا­لىپ جاع­داي جاساۋدى (پاندۋستار) مىندەتتەيتىنىن ەسكە سا­لا­دى. ادام قۇقىعىن اياققا تاپتاۋدان يمەنبەگەن ورتالىق قىزمەتكەر­لەرىنىڭ ىسىنە پرو­كۋ­را­تۋرانىڭ دا نازار اۋدارعانىن ءجون سانايمىز. ءتىپتى, زاڭنان قورىقپاعاننىڭ وزىندە ەرتەڭگى كۇننەن ءۇمىتى بار ادام «قىساستىق قيامەتكە كەتپەيدى», «اتاڭا نە قىلساڭ, الدىڭا سول كەلەدى» دەگەن حالىق دانالى­عىن دا ەسىنەن شىعارماۋى ءتيىس. بۇگىن ساۋمىز, ال ەرتەڭدى كىم بىلەدى؟ ويلانايىق, اعايىن! انار تولەۋحانقىزى.