سوعىس ارداگەرلەرىن قۇتتىقتادى

ۇلى جەڭىس كۇنى قارساڭىندا شىمكەنت قالاسىنداعى س.راحىموۆ اتىنداعى «جاس ۇلان» رەسپۋبليكالىق اسكەري مەكتەپ-ينتەرناتىنىڭ تاربيەلەنۋشىلەرى ۇلى وتان سوعىسى ارداگەرلەرىنىڭ ۇيلەرىن ارالاپ, ولاردى وسىناۋ ايتۋلى مەرەكەلەرىمەن قۇتتىقتادى, سونداي-اق, تۇرمىس-تىرشىلىگىنە قولعابىس ەتتى. حاركوۆ پەن ۆوروشيلوۆ, پولشا, ليتۆا مەن لاتۆياداعى سوعىستى باسىنان كەشىرگەن, ءتىپتى, سوناۋ گەرمانيانىڭ وزىنە دەيىن بارعان ارداگەر ابىلاي قازىباەۆ بولاشاق اسكەري قىزمەتشىلەرگە اسكەري قىزمەتى تۋرالى تاريحپەن جانە باعا جەتپەس بىلىمىمەن ءبولىستى. سوعىس باتىرى ا.قازىباەۆ جاس ۇرپاققا ءوزىنىڭ مايدان تاريحىن اڭگىمەلەپ, ۇزاق جىلعى جاۋىنگەرلىك قىزمەتىنەن سىر شەرتتى. ارداگەر قارت مايدانداس دوستارىن, ولارمەن بىرگە وتكىزگەن سۇراپىل سوعىس جىلدارىنداعى قايعى-قاسىرەتتى ەسكە الدى. وزدەرىنە كەزەك كەلگەندە كۋرسانتتار ارداگەرگە مايدان جانە حالىق اندەرىن ورىنداپ, وزدەرى شىعارعان ولەڭدەردى وقىپ بەردى. بالالار ءار ارداگەرگە ارناپ ءوز قولدارىمەن اشىق حاتتار ازىرلەپ, ولاردى شىمكەنت قالاسىنان ۇلى وتان سوعىسىنا قاتىسقان بۇكىل ارداگەرگە تارتۋ ەتتى. «جاس ۇلان» رەسپۋبليكالىق مەكتەبىنىڭ كۋرسانتتارى ۇلى وتان سوعىسىنىڭ ارداگەرلەرىمەن ۇدايى كەزدەسۋلەر وتكىزىپ, ولاردىڭ شارۋاشىلىقتارىنا كومەك كورسەتەتىنىن ايتا كەتكەن ءجون. سونداي-اق, قارتتارمەن اڭگىمەلەسىپ, ءتۇرلى ءىس-شارالار ۇيىمداستىرادى. بۇل قۇندىلىقتار – ءجاسوسپىرىم كەزدەن بەرىلەتىن قاسيەتتەر. ويتكەنى, بولاشاق اسكەري قىزمەتشىلەر سوعىس باتىرلارىن, ولاردىڭ جاساعان ەرلىكتەرىن ەستە ساقتاپ, ءبىلىپ جۇرۋلەرى ءتيىس جانە وتكەننىڭ جاقسى ءداستۇرىن جالعاستىرۋلارى قاجەت. «ەگەمەن-اقپارات»