ءمارت مارات

كوپبالالى اناعا پاتەر سىيلادى ەلگە ەتەنە دەگەندە, ەسىمىزگە ەڭ اۋەلى بەلگىلى كاسىپكەر, قايىرىمدى ازامات, «اقشىڭ» كورپوراتسياسىنىڭ پرەزيدەنتى, شىعىس قازاقستان وبلىستىق ءماسليحاتىنىڭ دەپۋتاتى مارات قۇرمانبايدىڭ ەسىمى ورالادى. «ارىق اتقا قامشى, جىرتىق ۇيگە تامشى اۋىر» دەيتىن قازىرگى نارىقتىق قىسپاق زامانىندا زادى, الدى كەڭ, جۇرەگى جومارت جاندار كوڭىلگە نۇر قۇياتىنى بار. جۋىردا مارات سەرىكجان ۇلىنىڭ تامام جۇرتتى سۇيسىندىرگەن ءبىر كومەگى بولدى. «كاسىپ ءتۇبى – ءناسىپ» دەگەن ءسوز بار قازاقتا. ۇلتتىڭ ءناسىبى عوي. وزىڭە عانا ەمەس, وزگەگە دە بولسىن دەگەن تىلەك پەن نيەت قابىسسا, ۇلتتى ۇشپاققا شىعارماي ما؟! مارات سەرىكجان ۇلى جەتەكشىلىك ەتەتىن كاسىپورىن سەمەيدىڭ ورتاسىنان 128 پاتەرلى «اقشىڭ» تۇرعىن ءۇي كەشەنىن سالعان بولاتىن. كاسىپكەر وسى ءزاۋلىم ءارى زاماناۋي ۇيدەن مەيرامگۇل ابدۋاليەۆا ەسىمدى سەمەيلىك كوپبالالى اناعا ەكى بولمەلى پاتەر سىيلادى. سول ساتتە پاتەرگە قول جەتكىزگەن, التى بالانى جالعىز ءوزى اسىراپ, تاربيەلەپ وتىرعان انانىڭ قۋانىشىن كورسەڭىز! بۇل بارشاعا جىلىلىق سىيلاعان جاقسىلىق ەدى. كوپبالالى انا وسىعان دەيىن وبلىس اكىمى, «نۇر وتان» پارتياسى وبلىستىق فيليالىنىڭ توراعاسى دانيال احمەتوۆتىڭ قوعامدىق قابىلداۋىندا بولعان ەدى. انانىڭ احۋالى الاڭداتقان ازاماتتار قاراپ قالعان جوق. كومەكتىڭ كوكەسىن جاسادى. «اعاش كوركى – جەمىس, ادام كوركى – جاقسى ءىس» دەيدى التىن وردا زامانىنىڭ داڭقتى شايىرى سايف ساراي. امسە, جان جادىراتاتىن جاقسى ىستەر ارتا بەرسە دەيمىز عوي. مارات قۇرمانباي ءوزى تۋىپ-وسكەن ابىرالى وڭىرىندەگى سوعىس جانە ەڭبەك ارداگەرلەرىنە جىل سايىن ءداستۇرلى تۇردە كومەك كورسەتۋدى جولعا قويعان. بيىل دا جەڭىس كۇنى قارساڭىندا ابىرالىلىق 75 ارداگەرگە سىي-سىياپات كورسەتكەنىن ايتا كەتەلىك. ماماندىعى بويىنشا بىلىكتى ەكونوميست, زاڭگەر ماكەڭ ەلدىڭ كەلەشەگى – جاستارعا ۇلكەن دەمەۋ كورسەتىپ كەلەدى. الەۋمەتتىك تۇرعىدان از قامتىلعان وتباسىلاردىڭ بالالارىن اقىلى نەگىزدە وقىتۋعا قولداۋ كورسەتىپ ءجۇر. م.اۋەزوۆ اتىنداعى سەمەي پەداگوگيكالىق كوللەدجى, شاكارىم اتىنداعى سەمەي مەملەكەتتىك ۋنيۆەرسيتەتى سىندى ورتا جانە جوعارى وقۋ ورىندارىندا ءبىلىم الىپ جۇرگەن جاستاردىڭ الدىنان داڭعىل جول اشىلعانىن كورىپ, سۇيسىنبەسكە ءاددىڭ جوق. ءوزى قۇرىلتايشىسى بولىپ وتىرعان «ابىرالى-دەگەلەڭ» قوعامدىق قورى ارقىلى تاعايىنداعان شاكىرتاقى نەگىزىندە ەكى بىردەي جاس «قاينار» ۋنيۆەرسيتەتىن ءتامامدادى. بۇگىندە ولار ومىردەن ءوز ورنىن تاۋىپ, ەلگە قىزمەت ەتۋدە. كاسىپكەر وسىلايشا 6 بالانىڭ ءبىلىم الۋىنا جاعداي جاسادى. ول سونىمەن بىرگە «مەيىرىم» اكتسيا­سىنا بەلسەنە قاتىسۋشىلاردىڭ ءبىرى. بۇل اكتسيا نەگىزىندە بالالار ۇيىندە تاربيەلەنىپ جاتقان بۇلدىرشىندەر مەن جاسوسپىرىمدەردىڭ جەكە ەسەپشوتتارىنا «اقشىڭدىقتار» ءبىر كۇندىك ەڭبەكاقىلارىن اۋدارىپ وتىرادى. وسى قايىرىمدىلىق شاراسى ارقىلى اتالعان بالالاردىڭ كامەلەت جاسقا تولعاندارىندا ءۇي ساتىپ الۋىنا قاراجات جيناۋىنا قولداۋ كورسەتىپ وتىر. كورپوراتسيا پرەزيدەنتىنىڭ قوعامدىق قىزمەتكە قوسقان ۇلەسى ەلەۋسىز ەمەس. 2013 جىلى «جىلدىڭ ۇزدىك ادامى» تانىلدى. «ەر – تۋعان جەرىنە». مارات سەرىكجان ۇلى «تۋعان جەرگە – تاعزىم» شاراسى اياسىندا تۋىپ-وسكەن اۋىلىن كوركەيتۋگە, اتامەكەن تاريحىن جاڭعىرتۋعا قوماقتى ۇلەس قوسىپ ءجۇر. اتىمتاي ازامات تۋعان ابىرالى ءوڭىرى – سەمەي يادرولىق سىناعىنىڭ كىندىگىندە ورنالاسقان, اتوم اپاتىنان ايتارلىقتاي زارداپ شەككەن جەر. دەسە دە, ماراتتاي ءمارت ۇلدارى بار ەلدىڭ كوڭىلى جۇدەگەن ەمەس. كاسىپكەر ابىرالى ءوڭىرىنىڭ قاينار اۋىلىنا مادەني دەم­الىس ساياباعىن سالىپ بەرىپ, سەمەي يادرولىق سىناق الاڭىنىڭ جابىلعانىنا 20 جىل تولۋىنا ارنالعان ەسكەرتكىش پەن ۇلى جەڭىستىڭ 65 جىلدىعىنا وراي ابىرالىدان قان مايدانعا اتتانعان 1500 جاۋىنگەردىڭ ەسىمدەرى جازىلعان مەموريال ورناتتى جانە تاۋەلسىزدىكتىڭ 20 جىلدىعى مەن ابىرالى كوتەرىلىسىنىڭ 80 جىلدىعىنا وراي «بابالار ەرلىگى – تاۋەلسىزدىك تىرەگى» اتتى تاقتاتاس قويدى. سونداي-اق, ابىرالى توپىراعىندا تۋعان قازاقتىڭ كورنەكتى تۇلعالارى, ءانشى امىرە قاشاۋباەۆ, جازۋشى ساپارعالي بەگالين, اقىن تولەۋجان ىسمايىلوۆ جانە قازاقستاننىڭ تۇڭعىش قارجى ءمينيسترى رىمبەك بايسەيىتوۆكە كەۋدەمۇسىندەر قويسا, الداعى ۋاقىتتا كورنەكتى عالىم رىمعالي نۇرعاليەۆكە ەسكەرتكىش قويۋدى جوسپارلاپ وتىر. «ابىرالى-دەگەلەڭ» قوعامدىق قورى ارقىلى جاسالعان جۇمىستاردىڭ تاعى ءبىر پاراسى رەتىندە قايتارىمسىز گرانتتارمەن اقبۇلاق جانە ابىرالى اۋىلدىق وكرۋگتەرىندە ەكى بالاباقشانىڭ اشىلعانىن ايتۋعا بولادى. بۇل اۋىلدار – سەمەي يادرولىق پوليگونىنان ەڭ قاتتى زارداپ شەككەن ەلدى مەكەندەر. مارات سەرىكجان ۇلى وبلىستىق ءماسليحات دەپۋتاتتىعىنا سايلانعان №20 سايلاۋ وكرۋگى ابىرالى ءوڭىرى مەن جاڭا سەمەيدى قامتىعان, قۇرامىنا 16 اۋىلدىق وكرۋگ, 24 ەلدى مەكەن ەنەتىن ەڭ ءىرى وكرۋگتەردىڭ ءبىرى. ءشۇلبى كەنتىنەن العاباس, دوعالاڭ اۋىلىنا جانە ءبىر قابىرعاسى كۋرچاتوۆ قالاسىنا دەيىنگى اۋماقتى الىپ جاتقان وكرۋگ سايلاۋشىلارىنىڭ سەنىمىن ارقالاعان حالىق قالاۋلىسى ءماسليحات مىنبەرىنەن كوپتەگەن الەۋمەتتىك ماسەلەلەردىڭ وڭ شەشىمىن تابۋىنا ۇلەس قوستى. قازىرگى كەزدە جەرلەستەرىنىڭ اماناتى رەتىندە سەمەي سىناق پوليگونىنان زارداپ شەككەن اعايىنعا الەۋمەتتىك جەڭىلدىكتەر قاراستىرۋ قامىندا ءجۇر. دۋمان اناش, «ەگەمەن قازاقستان» سەمەي