ەلىمىزدە جەر ماسەلەسىنە قاتىستى كوميسسيا قۇرىلاتىن بولدى

استانا. 5 مامىر. قازاقستان پرەزيدەنتى نۇرسۇلتان نازارباەۆ جەر ماسەلەسىنە قاتىستى كوميسسيا قۇرۋدى تاپسىردى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «حالىققا ۇنامايتىن زاڭنىڭ كەرەگى جوق, بىراق ءتۇسىندىرۋ كەرەك, ونى الىپ تاستاعاننان كەيىن اۋىل شارۋاشىلىعىنا قانداي مۇشكىلدىك بولاتىنىن. ونى ديھاندار عانا بىلەدى دالادا وتىرعان, ەگىن ەگىپ, مال جايىپ وتىرعاندار. اسفالتتا ءجۇرىپ ايعايلاعاندار ەمەس. الدىمەن ۇكىمەت جانىنان ءبىرىنشى ۆيتسە-پرەمەر باقىتجان ساعىنتاەۆ جەتەكشىلىك ەتەتىن كوميسسيا قۇرۋدى تاپسىرامىن. ول كوميسسيا مەملەكەتتىك ورگاندار, قوعامدىق ورگاندارمەنەن مىنا شارۋانى تالقىلاپ, ناقتى ءتۇسىندىرىپ, جەر كودەكسىندەگى داۋلى ماسەلەلەردى ايقىنداپ, پارلامەنتكە ۇسىنىستاردى بەرىپ, پارلامەنتپەن بىرگە قايتادان قارايتىن بولامىز. تۇسىنبەي جۇرگەن ادامداردى شاقىرۋ كەرەك. بۇل جۇمىستى نۇر وتان پارتياسىمەن بىرگە, ونىڭ جانىنداعى دەموكراتيالىق كۇشتەردىڭ بىرىككەن كواليتسياسى بار, اۋقىمدى ءتۇسىندىرۋ جۇمىسىن جۇرگىزۋ كەرەك. وعان بارلىق پارتيا, قوعامدىق ۇيىم, باق تارتىلۋى كەرەك. ونى جاسىرىپ قىمتىراتىن ەشتەڭەسى جوق. بارلىق ەل ىستەپ وتىرعان ەكونوميكا عوي بۇل» – دەدى نۇرسۇلتان نازارباەۆ اقورداداعى جيىندا. ايتا كەتەيىك, وسىعان دەيىن پرەزيدەنت جەر كودەكسىندەگى تۇزەتۋلەرگە موراتوري جاريالاعان بولاتىن. تالعات رايىمبەك. دەرەك, فوتو: اقوردانىڭ ءباسپاسوز قىزمەتى.