وتان ءۇشىن كۇرەس – ەرگە تيگەن ۇلەس
نۇراسىل مۇباراكوۆ قىزىلوردا وبلىسى, جاڭاقورعان اۋدانىنداعى تومەنارىق اۋىلىندا 1994 جىلى دۇنيەگە كەلدى. وسى اۋىلداعى ا.رومانوۆ اتىنداعى №53 ورتا مەكتەپتى جاقسى دەگەن باعالارمەن ءتامامدادى. 2013 جىلى اسكەر قاتارىنا شاقىرىلىپ, الماتىداعى 7552 اسكەري بولىمىندە وتان الدىنداعى بورىشىن وتەدى. كوپ ساربازدىڭ ءبىرى ەدى. ءومىر مەن ءولىم ارپالىسقان سول كۇنگى وقيعا ونىڭ تاعدىرىنا ۇلكەن بەتبۇرىس جاسادى.
2013 جىلدىڭ 5 جەلتوقسانى جاس سارباز نۇراسىل ءمۇباراكوۆتىڭ ەسىندە ءماڭگىگە قالدى. الماتىدان سەمەيگە باعىت العان پويىزدىڭ قۇرامىنداعى سوتتالعاندار تيەلگەن ارنايى ۆاگوندا توتەنشە وقيعا بولدى. دارەتقاناعا بارۋدى سىلتاۋ قىلعان سوتتالۋشىنىڭ ءبىرى ۆاگون ءدالىزىنىڭ تارلىعىن پايدالانىپ, سارباز مۇباراكوۆكە تۇتقيىلدان شابۋىل جاساپ, ونىڭ تاپانشاسىن تارتىپ الىپ, وزىنە وق جۇمسادى. قاتەرلى ساتتە قاراۋىل باسشىسىنىڭ كومەكشىسى, سەرجانت جاندوس بايانباەۆ كومەككە كەلىپ ۇلگەردى. بىراق كانىگى قىلمىسكەر وعان دا تاپانشادان وق اتتى. جارالانعاندارىنا قاراماستان, قوس سارباز قىلمىسكەرمەن الىسىپ, ونىڭ قاشىپ كەتۋىنە بوگەت جاسادى. سونىڭ اراسىندا قوسىمشا كومەك كەلىپ ۇلگەردى.
قوس جاۋىنگەردىڭ ەرلىكتەرى ەسكەرۋسىز قالعان جوق. كىشى سەرجانت جاندوس بايانباەۆ قازاقستان رەسپۋبليكاسى پرەزيدەنتىنىڭ جارلىعىمەن ءىى دارەجەلى «ايبىن» وردەنىمەن, كۇزەتشى-ەفرەيتور نۇراسىل مۇباراكوۆ «جاۋىنگەرلىك ەرلىگى ءۇشىن» مەدالىمەن ناگرادتالدى.
ۇزاق مەرزىمدى ەمدەۋ-ساۋىقتىرۋ كۋرسىنان كەيىن نۇراسىل مۇباراكوۆ جاۋىنگەرلىك ساپقا قايتا تۇردى. اسكەري قىزمەتىنە قايتا كەلىپ, بورىشىن ابىرويمەن وتەدى. ارمانى اسكەري قىزمەت بولعان ول ءوزىنىڭ قۇجاتتارىن پەتروپاۆل قالاسىنداعى ۇلتتىق ۇلان اسكەري ينستيتۋتىنا تاپسىردى. ن.مۇباراكوۆ ءبۇگىنگى كۇنى وسى ينستيتۋتتىڭ ەكىنشى كۋرسىندا وقيدى.
شارافاددين ءامىروۆ,
«ەگەمەن قازاقستان»
الماتى
