«ەلىمنىڭ قورعانى بولۋدى كوزدەدىم»

– دەيدى سەرجانت مۇحتار ءوربىسىنوۆ مۇحتار ءوربىسىنوۆتىڭ قارۋلى كۇشتەر قاتارىندا قىزمەت ەتكەنىنە 4 جىلعا تايادى. بۇل سالاعا ءوز ەركىمەن كەلىسىمشارت نەگىزىندە قىزمەت ەتۋگە كەلىپتى. شەنى – سەرجانت. بولىمشەگە جەتەكشىلىك ەتەدى. ونىڭ ەسىمى ءوزى قىزمەت ەتەتىن اسكەري بولىمدە عانا بولماسا, جالپاق جۇرتقا جاريا ەمەس ەدى. دەگەنمەن, بيىلعى جىل باسىنداعى ءبىر وقيعادان كەيىن ونى تانيتىندار كوبەيە ءتۇستى. سول وقيعا بىلاي ءوربىپ ەدى. م.ءوربىسىنوۆ اسكەري قىزمەتىنەن ورالعان كەشقۇرىم مەزگىلدە ساۋدا ورنىنا كىرەدى. سۋپەرماركەتكە ءبىرى كىرىپ, ەندى ءبىرى شىعىپ جاتقان جۇرتتىڭ ەشتەڭەگە نازار اۋدارار شاماسى دا جوق. ەسىكتەن ىشكە بەتتەگەن سەرجانتتىڭ كوزى ەدەندە جاتقان قىزىن قۇتقارۋعا ۇمتىلعان ەر ادامعا تۇسەدى. ونىڭ ارەكەتىنەن جانتالاسۋدى بايقاعان ول تانىماسا دا كومەكتەسۋگە بەل بۋادى. ءالى دە وڭ-سولىن تانىپ ۇلگەرمەگەن بوبەكتىڭ دەنە قىزۋى 40,5 گرادۋسقا كوتەرىلىپتى. بالكىم, سۋىق تيگەن بولۋى كەرەك. دەنە قىزۋىنىڭ وسىن­شالىقتى كوتەرىلۋى بوبەكتىڭ ءاپ-ساتتە ەسىنەن تانا قۇلاۋىنا سەبەپشى بولعان. بارلىق ءمان-جايعا قانىققان م.ءوربىسىنوۆ بىردەن «جەدەل ءجار­دەمگە» تەلەفون شالىپ, ساۋدا ورنىنداعى احۋالدى باياندايدى. دارىگەرلەر بريگاداسى كەلگەنشە, ساۋدا ورنى جانىنداعى ۇيىنەن زايىبىنىڭ شۇعىل جەتۋىن وتىنەدى. ويتكەنى, ونىڭ ماماندىعى – فەلدشەر, مۇنداي قيىن ساتتە باستاپقى مەديتسينالىق كومەك كورسەتۋدىڭ جولىن بىلەدى. ءسويتىپ, ەكەۋى دارىگەرلەر كەلگەنشە بوبەككە العاشقى مە­ديتسينالىق كومەك كورسەتۋگە كى­رىسەدى. ونىڭ قول, ايا­عىن ىسقىلاپ, دەنە قىزۋىنىڭ تومەندەۋىنە, وسىلايشا, 1,5 جاسار ءمادينانىڭ ەس جيۋىنا قولۇشىن سوزادى. ەرلى-زايىپتى مۇحتار مەن سا­مال وربىسىنوۆتەردىڭ قيىندىققا تاپ بولعان جانعا كومەك بەرگەن ادام­گەرشىلىك قاسيەتى ساۋدا ورنىندا بولعانداردىڭ ءبارىن تاڭداندىرادى. اسىرەسە, بوبەكتىڭ اكەسى ەرلان ءداۋ­لەتقاليەۆ قاس-قا­عىم ساتكە سوزىل­عان سول قيىن­دىقتى استە ۇمىتا المايدى. «قى­زىم ەسىنەن تانىپ قۇلاعاندا نە ىستەرىمدى بىلمەي, ءاب­دەن ابدىرادىم دا قالدى. جان-جاعىمداعى ادامداردان «جەدەل جاردەم» شاقىرۋىن ءوتىنىپ, كومەك سۇرادىم. ولاردىڭ نە ويلاعانىن بىلمەدىم, ءوزىم مۇلدە تانىمايتىن جاس جىگىتتىڭ كومەككە كەلگەنىن كور­دىم. سول جىگىت «جەدەل جاردەمدى» دە, ءوزىنىڭ ايەلىن دە شاقىردى. سول ساتتە ايەلىن نەگە شاقىرعانىن ويلاپ ۇلگەرمەدىم. سويتسەم, ونىڭ سامال ەسىمدى جارىنىڭ فەلدشەرلىك ما­ماندىعى بار ەكەن. دارىگەرلەر كەلگەنگە دەيىن مۇحتار مەن سامال­دىڭ مەديتسينالىق كومەك بەرۋدىڭ جولدارىن بىلگەنىنە ءتانتى بولدىم», – دەيدى ە.داۋلەتقاليەۆ. «جەدەل جاردەم» دارىگەرلەرى دە مەديتسينالىق كومەكتىڭ دۇرىس جاسالعانىنا وڭ باعاسىن بەرىپتى. دارىگەرلەر پىكىرىنشە, سىرقاتتىڭ دەنە قىزۋى 40,5 گرادۋسقا كوتە­رىلۋىنىڭ زاردابى اۋىر بولۋى ءمۇم­كىن. سونداي ساتتە كورسەتىلەتىن ال­عاشقى مەديتسينالىق كومەكتىڭ وراسان زور پايداسى بار. دەگەنمەن, №5546 اسكەري ءبولىمىنىڭ سەرجانتى م.ءور­بىسىنوۆ ءوزىنىڭ بۇل ارەكەتىن قا­لىپتى جاعداي دەپ تۇسىندىرەدى. «مەنىڭ ورنىمدا وزگە ادام بولسا دا ءدال سولاي ارەكەت ەتكەن بولار ەدى. قينالعان جانعا قولۇشىن سوزۋ اركىمنىڭ ازاماتتىق پارىزى عوي» دەپ جىميادى. باستاپقىدا وربىسىنوۆتەردىڭ, كەيىننەن دارىگەرلەردىڭ كاسىبيلىك تۇرعىسىنان كورسەتكەن كومەگىنىڭ ناتيجەسىندە دەنساۋلىعى قال­پىنا كەلىپ, قىزىنىڭ وتباسىنا امان ورالعانىنا قۋانعان ە.ءداۋ­لەتقاليەۆ اسكەري ءبولىم باس­شى­لىعىنا بول­عان جايدى بايانداپ, حات جولداۋدى ۇمىتپاپتى. ول ءوز حاتىندا اسكەري قىزمەتكەر م.ءور­بىسىنوۆتىڭ ازاماتتىق, ناعىز اسكە­ريلەرگە ءتان شۇعىل شەشىم قا­بىلداي الاتىن جەدەلدىگىنە ري­زاشىلىعىن ءبىل­دىرىپتى. بۇل حاتتى №5546 اسكەري ءبولىمىنىڭ كومانديرى بەگايدار كۇر­­تىباەۆ جۇمىس ۇستە­لىنىڭ تارتپاسىندا قالدىرماي, جۇرتشىلىققا جاريا ەتتى. الدىمەن, اسكەري ءبو­لىم قۇرامىنىڭ الدىندا وقىپ, كەلى­سىمشارت نەگىزىندە قىزمەت ات­قاراتىن سەرجانت م.ءوربىسىنوۆتى ۇلگى ەتتى. سونان سوڭ بۇل حاتتى ۇلت­تىق گۆارديانىڭ «باتىس» ءوڭىر­لىك قول­باس­شىلىعىنا جولداپ, مۇحتار ءوربىسىنوۆتى ماراپاتتاۋعا ۇسىنىس جاسادى. ۇلتتىق گۆارديانىڭ «باتىس» وڭىرلىك قولباسشىلىعىنىڭ قول­باس­شىسى, گەنەرال-مايور ق.اق­تا­نوۆتىڭ بۇيرىعىمەن كەلىسىم­شارت قىزمەتىنىڭ سەرجانتى م.ءوربىسىنوۆ «قوعامدىق ءتارتىپتى قورعاعانى ءۇشىن» توسبەلگىسىمەن ماراپاتتالدى. توسبەلگىنى ارنايى وتكىزىلگەن سالتاناتتى شارادا №5546 اسكەري ءبولىمى كومانديرىنىڭ مىندەتىن ات­قارۋشى ە.يۋدين تاپسىردى. سول ساتتە مۇحتار ءۇشىن اسكەري ءبولىم ءتۇ­گەلىمەن قۋاندى. ءبارى دە ونى ماقتان تۇتىپ تۇردى. – بالا كەزىمنەن اسكەري قىز­مەتكەر بولۋ ارمانىم ەدى. بىراق, باستاپقىدا ەڭبەك جولىمدى وتا­نىمىزدىڭ قارۋلى كۇشتەرى قا­تارىندا باستاۋدىڭ ءساتى بولمادى. قاي سالادا جۇمىس جاساسام دا ءبارىبىر اڭسارىم اسكەري قىزمەتكەر بولۋعا اۋدى دا تۇردى. ويتكەنى, مەن ءوزىمنىڭ تاۋەلسىز وتانىمنىڭ قورعانى بولعىم كەلدى. بۇدان 4 جىلداي بۇرىن اسكەري بولىمگە كەلىسىمشارتپەن قىزمەتكە الىنىپ, اسكەري كيىم كيگەن ساتتە ەرەكشە قۋاندىم. بۇل – مە­نىڭ بالا كۇننەن ويىمدا جۇرگەن ارمانىمنىڭ ىسكە اسا باستاۋى. قا­زىر اسكەري قىزمەتىمدى ابىرويلى ات­قارۋعا تىرىسىپ ءجۇرمىن, – دەيدى سەرجانت مۇحتار ءوربىسىنوۆ. ءيا, بەيبىت كۇندە دە وتاندى قورعايتىن م.وربىسىنوۆتەي ءوز ءىسىن سۇيگەن, قينالعان جانعا قولۇشىن سوزۋعا دايار تۇراتىن وتانشىل ازاماتتار باردا ەل اسكەريلەرىنىڭ ابىرويى دا بيىك, مارتەبەسى جوعارى بولا تۇسەدى. كۇندەلىكتى كۇيبەڭ تىرلىكتىڭ يلەۋىندە جۇرگەن قاراپايىم حا­لىق­تىڭ دا سەنىمى ارتا بەرەدى. جولداسبەك شوپەعۇل, «ەگەمەن قازاقستان» اتىراۋ سۋرەتتى تۇسىرگەن راحىم قويلىباەۆ