كۇندىز-ءتۇنى تىنىشتىق كۇزەتىندەمىز

مايور ايدار گاۋھاروۆ – ماسكەۋدە وتكەن حالىقارالىق «اۆيادارتس-2015» اسكەري ويىنىنا قاتىسقان قازاقستاندىق ءۇش ۇشقىشتىڭ ءبىرى. رەسەي, قىتاي, قازاقستان جانە بەلارۋس مەملەكەتتەرىنىڭ تاڭداۋلى ۇشقىشتارى قاتىسقان حالىقارالىق بايقاۋدا ايدار باستاعان جىگىتتەر رەسەيدەن كەيىنگى ەكىنشى ورىندى يەمدەندى. – ايدار تولەگەن ۇلى, ەكىنشى ورىن الدى دەگەن ايتۋعا عانا وڭاي. رەسەيدىڭ اۋە كۇشتەرى الەم­دە ەڭ ۇزدىكتەردىڭ قاتارىندا. قىتاي­دىڭ اسكەري تەحنيكاعا مول قار­جى سالىپ جاتقاندىعى بەلگىلى. وسىنداي جاعدايدا ءبىزدىڭ جىگىتتەردىڭ ەڭبەگىن قالاي باعالا­ساڭ دا جاراسادى. جارىس قالاي ءوتتى, ءبىر ەپيزودىن ايتىپ بەرشى؟ ءۇشىنشى ساناتتاعى شا­­بۋىل­داۋشى ۇشاقتىڭ كومان­ديرىمەن اڭگىمەمىز وسىلاي باس­تالعان. – راسىندا, قاتتى تولقىدىق. ءوزى­مىزدىڭ ۇشاعىمىزبەن ۇشىپ بارعانبىز. ال اۋەدەن اتقىلايتىن قارۋ تۇرلەرىنە رەسەي جاعى كو­مەكتەستى. ءبىر ءساتىن ايت دەدىڭىز عوي, ماسەلەن, مىناداي تاپسىرما بە­رىلەدى. توعاي ىشىندە جاۋدىڭ 3-4 تانكى, اشىق جەردە ۇشاقتارى بار. تاپسىرما بويىنشا ولاردىڭ جاسىرىلعان جەرىن ءدال تاۋىپ, اۋەدەن جويىپ جىبەرۋىڭ كەرەك. جوعارىدا جۇرسەڭ اتىپ تۇسىرەدى. سوندىقتان, ساعاتىنا 500-600 شاقىرىم جىلدامدىقپەن 200 مەتر­گە دەيىن تومەندەپ ۇشىپ, تانك, ۇشاقتاردىڭ جاسىرىلعان جەرىن تاۋىپ شابۋىل جاسادىق. – اتىپ جۇرگەندەرىڭ مۋلياج تانك, ۇشاق پا؟ زەڭبىرەكتەرىڭنىڭ سناريادتارى قانداي؟ – شىن تانك, شىن ۇشاقتار. بىراق, ەسكى, قولدانىستان الىنعان تەحنيكالار. ءبىز وسى تاپسىرمانى ورىنداۋدا كوزگە تۇستىك. – كوڭىلدەرىڭ مارقايعان شى­عار؟ – ارينە, قۋانىشقا كەنەلدىك. الەمدەگى مىقتى دەرجاۆالاردىڭ الدىندا مىقتى شىققانىمىزعا. قازاق­ستان بايراعىن كوكتە جەلبى­رەتكەنىمىز مارقايتتى. اللاعا شۇكىرشىلىك قىلدىق. ەلباسىمىز نۇرسۇلتان ءابىش ۇلى نازارباەۆقا راحمەت ايتتىق. ويتكەنى, مەملەكەت اۆياتسياعا جەتكىلىكتى قارجى سالماسا, قۇر ولەرمەندىك تابىسقا جەتكىزبەيدى. تەحنيكالارىمىز جاڭاردى. 2005 جىلعا دەيىن كەروسينمەن ۇشىپ كەلسەك, قازىر ۇشاقتارىمىز جوعارى ساپالى بەنزين تۇتىنادى. – قالا بالالارىن قايدام, اۋىل بالالارىنىڭ دەنى «كىم بو­لاسىڭ؟» – دەسەڭ, ويلانباس­تان «ۇشقىش بولامىن!» دەپ تاق ەتەر ەدى. ءوزىڭ كىم بولۋدى ارمانداپ ەدىڭ. تۇقىمدارىڭدا اسكەري ۇشقىش بولدى ما؟ – اكەمنىڭ اكەسى شابدان اتا­مىز ەكىنشى دۇنيەجۇزىلىك سوعىسقا ۇشقىش بولىپ قاتىستى. تاش­كەنتتەگى اۋە ۋچيليششەسىن بىتىرگەن دەسە-ءدى. حابار-وشارسىز كەتىپتى. 8-سىنىپقا دەيىن شىمكەنتتەگى اكادەميك ءو.جولداسبەكوۆ اتىن­داعى مەكتەپتە وقىدىم. ودان كەيىن استاناداعى «جاس ۇلان» اسكەري مەكتەبىندە 11 جىلدىقتى ءتامامدادىم. 2013 جىلى اقتو­بەدەگى اۋە قورعانىس كۇشتەرى ءاس­كەري ينستيتۋتىن ءبىتىرىپ ۇش­قىش-ينجەنەر ماماندىعىن الىپ شىقتىم. الماتى, بالقاش قا­لالارىندا, كەيىن شىمكەنتتە جۇ­مىس جاساپ جاتىرمىن. ميگ-29 ۇشاعىمەن ۇشامىن. وسىنىڭ ءبارى بالا كەزىمدەگى «ۇشقىش بولامىن» دەگەن ارمانىمدى ورىنداعانىم بولار. ونىڭ الدىندا ياك-80, ل-29 ۇشاقتارىن باسقاردىم. ءبىز – اسكەري ادامبىز. مەملە­كەتىمىز, حالقىمىز وتانىن قور­عايتىن ۇلىم بار دەپ بىزگە سە­نىپ وتىر. سول سەنىم بىزگە قا­نات بىتىرەدى. كۇندىز-ءتۇنى اۋە كە­زەك­شىلىگىندە بولىپ, ەل تى­نىش­تىعىن قورعايمىز. مايور گاۋھاروۆ وسىلاي دەگەن. 3-ءشى ساناتتاعى ۇشقىش, اۋەدە 380 ساعات ۇشۋ تاجىريبەسى بار, حالىقارالىق «ميرنوە نەبو», «ۆزايمودەيستۆيە», «بوەۆوە سودرۋجەستۆو» جانە «ستەپنوي ورەل» سياقتى اسكەري-جاتتىعۋ جيىندارىنا قاتىسقان ا.گاۋھاروۆ «وتان قورعاۋ – ەر جىگىتتىڭ ءىسى» دەگەندى ايتادى. اڭگىمەلەسكەن باقتيار تايجان, «ەگەمەن قازاقستان» وڭتۇستىك قازاقستان وبلىسى