سلەتكە قاتىسۋشىلار ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ وكىلەتتىگىن 2020 جىلعا دەيىن ۇزارتۋ ماقساتىندا جالپىحالىقتىق رەفەرەندۋم وتكىزۋ يدەياسىنا قولداۋ ءبىلدىردى. جاستار جيىنىندا ستۋدەنتتىك قۇرىلىس وتريادتارى مەن «جاسىل ەل» جاساقتارىنىڭ بەس جىلدىق جۇمىستارى قورىتىندىلانىپ, بيىلعى مەدەجەلەر بەلگىلەندى. «اتامەكەن» قوعامدىق بىرلەستىگىنىڭ توراعاسى جانبولات تۇرتاەۆتىڭ مالىمدەۋىنشە, وبلىستا قۇرىلىس وتريادتارى قۇرىلعان العاشقى جىلى ولاردىڭ قۇرامىندا 600 جاس بولسا, بەس جىلدا جاساق مۇشەلەرىنىڭ سانى 10 ەسەگە دەيىن ارتقان.
ساتىبالدى ءساۋىرباي, اقتوبە وبلىسى.
بىرلەسكەن جوبالار جاساۋعا كەلىستى. وبلىستىڭ الەۋمەتتىك-ەكونوميكالىق باعدارلامالارىن جۇزەگە اسىرۋ ءۇشىن ستراتەگيالىق سەرىكتەستىكتەر كەرەك. وتكەن اپتادا وبلىس اكىمىنىڭ ورىنباسارى ە.ايتاحانوۆ پەن “جيناق بانكى” اق ەنشىلەس بانكىنىڭ باسقارما توراعاسى و.سميرنوۆ ءوزارا ىنتىماقتاستىق مەموراندۋمىنا قول قويدى. ەكى تاراپ اگروونەركاسىپ سەكتورى, قايتا وڭدەۋ, شاعىن جانە ورتا بيزنەس, ماڭىزدى ونەركاسىپتەردى نەسيەلەندىرۋ, اقپاراتتىق تەحنولوگيالار مەن يننوۆاتسيالىق تەحنولوگيالاردى بىرلەسە دامىتۋ جونىندە جوبالار جاساۋعا ۋاعدا بايلاستى. شىمكەنت قالاسىنان فيليالىن اشىپ وتىرعان بانك ءتۇرلى سالالاردى دامىتۋعا ۇلكەن قولداۋ كورسەتەدى دەپ كۇتىلۋدە.
باقتيار تايجان, وڭتۇستىك قازاقستان وبلىسى.
«ازيادا ەلشىلەرى» كەلىپ كەتتى. قازاقستان «كS marketing» اگەنتتىگى قىسقى ازيادا ديرەكتسياسىمەن بىرلەسە وتىرىپ, «ازيادا ەلشىلەرى» دەگەن شارانى قولعا العان بولاتىن. قۇرامىندا بەلگىلى ەسترادا, كينو مەن سپورت جۇلدىزدارى بار توپ جۋىردا العاشقى ساپارىن سەمەيدەن باستادى. ولارمەن كەزدەسۋگە حالىق كوپ جينالدى. كەزدەسۋدە ەل ومىرىندەگى ماڭىزدى سپورت وقيعاسى تۋرالى بايىپتى اڭگىمە قوزعالىپ, ونىڭ سوڭى تاماشا ويىن-ساۋىققا ۇلاستى. «ازيادا ەلشىلەرى» ەلىمىزدىڭ باستى قالالارىمەن بىرگە, شالعايداعى ەلدى مەكەندەردە دە بولماق. ال قورىتىندى كەزدەسۋ استانادا وتكىزىلەتىن بولادى.
داۋلەت سەيسەن ۇلى, سەمەي.
سۋديالار جۇمىسى سارالاندى. اتىراۋ وبلىسىنىڭ سوتتارىندا بىلتىر ەسىرتكى, ادام ءولتىرۋ, زورلاۋ, بوپسالاۋ باعىتىنداعى قىلمىستىق ىستەر ازايىپتى. الايدا, ۇرلاۋ, توناۋ جانە تابيعاتقا زيان كەلتىرۋگە بايلانىستى ىستەر كوبەيىپتى. ءبىر جىلدا جەرگىلىكتى سوتتاردا 1261 ادام سوتتالعان. بۇل تۋرالى اتىراۋ وبلىستىق سوتىندا وتكەن جىلدىڭ قورىتىندىسىنا ارنالعان كەڭەيتىلگەن ماجىلىستە جان-جاقتى ايتىلدى. جوعارعى سوتتىڭ سۋدياسى م. قامنازاروۆ اتىراۋ سوتتارىندا ءادىلسوت تورەلىگىن ىسكە اسىرۋدىڭ ماڭىزىنا توقتالدى. وبلىستىق سوت توراعاسى ج.الانوۆ جاڭادان انت قابىلداعان سۋديالار ز.تىپىلوۆا مەن ب.مەڭسەيىتوۆانىڭ جۇمىسىنا ساتتىلىك تىلەدى.
جولداسبەك شوپەعۇل, اتىراۋ وبلىسى.
سوعىستىڭ تاعى ءبىر شەجىرەسى. وبلىستا «قوستاناي وبلىسى ۇلى وتان سوعىسىندا: مايدان مەن تىلدىڭ بىرلىگى» دەگەن كىتاپ جارىق كوردى. وعان سوعىس ارداگەرلەرىنىڭ وتكەن مەرەكەلى جىلى جاساعان باستاماسى تۇرتكى بولدى. قوستانايلىقتاردىڭ ۇلى وتان سوعىسىنداعى ەرلىك ىستەرى اڭگىمە بولاتىن بۇل كىتاپتىڭ تۇساۋكەسەرىنە مايدانگەرلەرمەن قاتار جالپى جۇرتشىلىق وكىلدەرى دە جينالدى. مۇراعاتتار مەن مۇراجايلاردا ساقتالعان قۇجاتتار, بوزداقتاردىڭ حاتتارى, ارداگەرلەردىڭ ەستەلىكتەرى قاھارلى كۇندەردى وقىرماننىڭ كوز الدىنا الىپ كەلەدى. سوعىس تۋرالى وبلىستا جارىق كورگەن بۇرىنعى كىتاپتاردان بۇل باسىلىمنىڭ نەگىزگى ەرەكشەلىگى دە وسىندا بولسا كەرەك. كىتاپ 2100 تارالىممەن شىقتى.
ءنازيرا جارىمبەتوۆا, قوستاناي.
ء«بىر تەرەزە» قىزمەتى اۋىلعا جەتتى. وتكەن اپتادا جامبىل اۋدانىنداعى گروديكوۆو اۋىلدىق وكرۋگىنەن وبلىستىق حالىققا قىزمەت كورسەتۋ ورتالىعىنىڭ جاڭا فيليالى اشىلدى. ء«بىر تەرەزە» جۇيەسى ارقىلى قىزمەت كورسەتەتىن فيليالدا تۇرعىندار وتىنگەن قۇجاتتار جەدەل دايىندالىپ, ال اقىل-كەڭەس كەرەكتەرىنە ول دا مۇقيات تۇسىندىرىلۋدە. جاڭا زامان سۇرانىسىمەن سالىنعان فيليالدا ۇلگىلى قىزمەت ءۇشىن قاجەتتى جاعدايلاردىڭ ءبارى جاسالعان. سونداي-اق, فيليال قىزمەتكەرلەرى قىزمەت كورسەتۋدى جەتىلدىرۋ ماقساتىندا حقكو-نىڭ اۋداندىق بولىمىمەن, مۇراعاتپەن جانە پروكۋراتۋرا سياقتى قۇقىق قورعاۋ ورگاندارىمەن جۇيەلى بايلانىستا جۇمىس ىستەيدى. بۇعان دەيىن وبلىس بويىنشا مۇنداي 14 جاڭا ورتالىق اشىلعان بولاتىن.
كوسەمالى ساتتىباي ۇلى, جامبىل وبلىسى.
اقىن-جازۋشىلار باس قوستى. وتكەن اپتادا وبلىس ورتالىعىندا بولعان بۇل باسقوسۋدى وبلىستىق مادەنيەت باسقارماسى, قالا اكىمدىگى, بۇقار جىراۋ اتىنداعى ادەبيەت جانە ونەر مۋزەيى ۇيىمداستىردى. بارلىعى بىرلەسىپ جەرگىلىكتى اقىن-جازۋشىلاردىڭ باسىن قوسىپ جاتقاندارىنا قاراعاندا, مادەنيەتكە, ادەبيەتكە, ونەرگە دە جاقىنىراق بولىپ, جىلى كوزقاراس تانىتايىق دەگەن جاقسى وي كەلگەن سياقتى. ال, جالپى وسى شارانىڭ وتۋىنە باستاماشى بولعان «نۇر وتاننىڭ» جەرگىلىكتى بولىمشەسى ەگەمەندىك, ەلدىك جايلى شىعارمالار جازعان اقىن-جازۋشىلاردى سىيلىقتارمەن, العىس حاتتارمەن ماراپاتتادى. الداعى ۋاقىتتا ادەبيەتشىلەردىڭ جاس بۋىنىن تاربيەلەۋ ءۇشىن شىعارماشىلىق كەزدەسۋلەر, بايقاۋلار وتكىزىپ تۇرۋ شەشىلدى.
فاريدا بىقاي, پاۆلودار.
