بۇرا تارتۋ تۇسىنبەستىكتەن تۋىندايدى

تاياۋدا قابىلدانادى دەپ كۇتىلىپ وتىرعان جەر كودەكسىنە بايلانىستى كەيبىر رەسپۋبليكا ازاماتتارى اراسىندا ءارتۇرلى تۇسىنىسپەۋشىلىكتەر تۋىنداپ ءجۇر. وسىعان بايلانىستى ەكى-ءۇش اۋىز وي-پىكىرىمدى ورتاعا سالعاندى ءجون كورىپ وتىرمىن. كودەكستە اۋىل­شارۋاشىلىق ماقساتىنداعى جەر­دىڭ شەتەلدىكتەرگە ساتىلاتىنى تۋرالى ەشتەڭە ايتىلماعان ەكەن. بۇعان مەن كودەكسپەن تانىسۋ ارقىلى كوزىمدى جەتكىزدىم. دۇرىس-اق. ويتكەنى, قازاقستان كونس­تيتۋتسياسى بويىنشا جەر جانە ونىڭ قويناۋى رەسپۋبليكا ازا­مات­تارىنىڭ ورتاق بايلىعى ەمەس پە؟! وسىنى ۇمىتپاساق ەكەن. تۇپتەپ كەلگەندە جەردىڭ حالىقتىڭ ورتاق يگىلىگىنە اينالۋىنا ءبارىمىز دە مۇددەلىمىز. جاڭا كودەكس جوبالارىنا كوز ءجۇ­گىرت­كەن كەزىمدە كيەسى بار جەردىڭ يەسى دە بولۋى كەرەكتىگىن اڭعارعانداي كۇي كەشتىم. ءبىر ەسەپتەن بۇل تالاپتى دا تۇسىنۋگە بولادى. تىڭدالماسا ءسوز جەتىم دەگەندەي, قۋراي باسىپ تاقىرلان­سا,  جەر جەتىم بولماسىنا كىم كە­پىل. سوندىقتان دا جەر تۋرالى جاڭا زاڭ­دىلىقتاردا قازاقستان ازا­مات­تارىنا جەردى جە­كە­شەلەن­دىرۋ مۇمكىندىگى قويى­لىپ وتىر­عانىن ابدەن تۇسىنۋگە بولادى. مەنىڭ ويىمشا, مۇنداي جاع­داي­دا ءبىرىنشى كەزەكتە جەردىڭ بابىن تابۋ ماسەلەلەرى العا قويى­لۋعا ءتيىستى. ەگەر جەردى جەكەشە­لەن­دىرۋگە قول جەتكىزگەندەر نە ىستە­سەم دە ءوز ەركىم دەپ, ونى بۇعان دەيىنگى قۇنارىنان ايىراتىنداي ءىس-ارەكەتتەرگە بارسا جانە جەكە باسىنىڭ بايۋى مۇددەسىن عانا كوزدەپ, تاپقان پايداسى وزىنەن ارتىلماسا جەردى قايتادان مەملەكەت مەنشىگىنە الۋ جونىندە شارالار بەلگىلەنگەنى دۇرىس-اۋ دەگەن ويعا قالىپ وتىرمىن. سوندىقتان, جەردى جەكەشە­لەن­دىرىپ العان مەنشىك يەلەرىنە مەملەكەت تاراپىنان ۇدايى باقىلاۋ بولعانى, ولاردىڭ ناقتى نەمەن اينالىسىپ جاتقانىنا پروكۋرورلىق قاداعالاۋلار جۇرگىزىلگەنى ورىندى بولماق. ال ەگەر جەردىڭ توزاڭىن شىعارىپ, ۋلى حيميكاتتار ءسىڭىرى­لەتىندەي ارەكەتتەر ورىن السا, جەر كەيىن پايداعا مۇلدەم اسپاي قالاتىنى كامىل. ايتەۋىر «ءىس ءبىتتى, قۋ كەتتى» دەگەن ارەكەتتەردەن اۋلاق بولساق ەكەن دەگىم كەلەدى. قايتكەندە دە مەن جاڭا جەر كودەكسىنىڭ باستى ماقساتى جەردى دۇرىس پايدالانۋ دەگەنگە سەنگىم كەلەدى. وسى شىندىقتى بۇرا تارتىپ جۇرگەندەردىڭ ءىس-ارەكەتى العا قويىلعان يگى ماقساتتى دۇرىس تۇسىنبەگەندىكتەن شىعار دەپ ويلايمىن. لايىم دا وسى ويىمنىڭ دۇرىسقا شىققانىن قالايمىن. بولاشاقتا جەر كودەكسى نورمالارىنا سايكەس اۋىلشارۋاشىلىق جەرىن جەكەشەلەندىرۋ مۇمكىندىگىن العان ەر-ازاماتتار جەر مەنىڭ عانا ەمەس, ەلىمىزدىڭ ورتاق يگىلىگى دەگەن بيىك ازاماتتىق جانە پاتريوتتىق كوزقاراس تانىتا السا, جەر ازبايدى دا, توزبايدى دا دەپ وي تۇيۋگە بولادى.  قىرىمگەرەي قاجىموۆ, قازاقستاننىڭ ەڭبەك سىڭىرگەن قايراتكەرى ورال