مەرەكە اياسىندا ەلورداداعى 22 ەتنومادەني بىرلەستىكتىڭ وكىلدەرى وزدەرىنىڭ ۇلتتىق تاعامدارىن دايىنداپ, دوستىق داستارقانىن جايدى. اتالعان مەرەكەلىك داستارقاننىڭ ۇزىندىعى 50 مەتردەن اسىپ تۇسكەنىن ايرىقشا اتاپ وتكەن ءجون. سونداي-اق, وزگە ەتنوس وكىلدەرى قولدانبالى ونەر كورمەسىن وتكىزىپ, ۇلتتىق قۇندىلىقتارىن ناسيحاتتادى. سونىمەن قاتار, «بايتەرەك» مونۋمەنتى ماڭىندا دا مەرەكەلىك كونتسەرتتەر ۇيىمداستىرىلىپ, وتاندىق ەسترادا جۇلدىزدارى جينالعان قاۋىمعا كوتەرىڭكى كوڭىلكۇي سىيلادى. ودان بولەك, «اتامەكەن» قازاقستان كارتاسى» ەتنو-مەموريالدىق كەشەنىندە وتكەن «تاتۋلىقتىڭ تال بەسىگىن تەربەتكەن» اتتى كونتسەرتتىك باعدارلاما مەرەكەنىڭ مەرەيىن اسىرىپ, اجارىن ايشىقتاي ءتۇستى. ءوز كەزەگىندە استانا قالاسىنىڭ اكىمى ادىلبەك جاقسىبەكوۆ شاھار تۇرعىندارى مەن قوناقتارىن اتالعان مەرەكەمەن قۇتتىقتاپ: «1 مامىر – جالپى قازاقستاندىقتار بولىپ تويلايتىن مەرەيلى كۇن. حالقىمىزدا «جەڭىس ءتۇبى – ەرلىك, بەرەكە ءتۇبى – بىرلىك» دەگەن قاناتتى ءسوز بار. قوعامنىڭ تۇتاستىعى قاي كەزدە دە ىشكى تاتۋلىق پەن بەرەكەدەن باستاۋ العان. ىنتىماعى جاراسىپ, ءتۇرلى ۇلىستىڭ باسىن قوسقان قاستەرلى قازاق توپىراعى تىنىشتىق پەن بەيبىتشىلىكتىڭ قاراشاڭىراعىنا اينالدى. ءاردايىم ىشكى تاتۋلىعىمىز بەرىك بولىپ, ەلىمىز وركەندەي بەرسىن», – دەدى. جالپى, بۇل كۇنى ەلوردالىقتار 450-گە جۋىق ونەر ادامى مەن شىعارماشىلىق ۇجىم وكىلىنىڭ ونەرىن تاماشالادى. بىرلىك پەن تاتۋلىقتىڭ جارشىسى بولعان مەرەكەلىك شارالار «استانا وپەرا» مەملەكەتتىك وپەرا جانە بالەت تەاترىندا, م.گوركي اتىنداعى ورىس دراما تەاترىندا, «قۋىرشاق تەاترىندا», «ستۋدەنتتىك» ساياباعىندا جانە تاعى باسقا ورىنداردا لايىقتى جالعاسىن تاپتى. ەسىل وزەنىنىڭ سول جاعالاۋىندا بەيبىتشىلىك پەن بىرلىكتىڭ بەلگىسى رەتىندە اۋەگە اق شارلار ۇشىرىلدى. مەرەكەگە وراي وتكەن ءىس-شارالار ساپىندا بەلگىلى ءانشى سايات مەدەۋوۆتىڭ «وتانىم مەنىڭ» اتتى شىعارماشىلىق كەشى مەن استانالىق تەاتر ونەرپازدارىنىڭ ۇيىمداستىرۋىمەن جۇزەگە اسقان ء«بىر شاڭىراق استىندا!» اتتى ارنايى جوبا دا حالىقتى شات-شادىمان كۇيگە بولەدى. وسىلايشا, ساعات 23:00-گە دەيىن جالعاسقان اتالعان مادەني ءىس-شارالار استانا جۇرتىن ايرىقشا اسەرگە بولەپ, كوڭىلدەرىنە قۋانىش سىيلادى.
ەلامان قوڭىر, «ەگەمەن قازاقستان»
اقتاۋ. اقتاۋ قالاسىندا قازاقستان حالقىنىڭ بىرلىگى كۇنى مەرەكەسىندە «استانا» الاڭىندا ەتنومادەني بىرلەستىكتەر وكىلدەرىنىڭ قولونەر بۇيىمدارىنىڭ كورمەسى ۇيىمداستىرىلدى. ءتورت جارتىلاي كيىز ءۇي سىندى ورىندا ءار ۇلت وكىلدەرى وزدەرىنىڭ قولدارىنان تۋعان شەبەرلىكتەرىنىڭ بەينەسىن جالپاق جۇرتتىڭ نازارىنا ۇسىندى. الاڭنىڭ ورتاسىنا تىگىلگەن كيىز ۇيدە قازاقستان حالقى ماڭعىستاۋ وبلىستىق اسسامبلەياسى حاتشىلىعىنىڭ ۇيىمداستىرۋىمەن ۇلتتىق قۋىرشاقتار مەن ۇلتتىق كيىمدەردىڭ كورمەسى وتكىزىلدى. «اقبوتا» الاڭىندا تاۋار وندىرۋشىلەردىڭ كورمەسى ءجۇرىپ جاتتى. بىرلىك مەرەكەسىنە وراي «قوعامدىق كەلىسىم» مەملەكەتتىك مەكەمەسىندە «حالىق كەلىسىمى» قوعامدىق بىرلەستىگىنىڭ تۇڭعىش توراعاسى جازدىرحان سەيداليەۆكە ارنالعان بۇرىش اشىلدى. سونداي-اق, ماڭعىستاۋ تۋريزم كوللەدجىندە ءار ۇلت وكىلدەرى مەن كوللەدج ستۋدەنتتەرىنىڭ اتسالىسۋىمەن ء«بىز بىرگەمىز جانە بۇل – ءبىزدىڭ جەتىستىگىمىز» اتتى فەستيۆال ۇيىمداستىرىلدى. كوللەدج باسشىلىعى وقۋ ورنىنىڭ اۋلاسىندا ەتنواۋىل اشتى. بۇل اۋىلدا ءار ۇلتتىڭ ءبىر بەلگىسى نەمەسە ەرەكشەلىگى كورىنىس تاپقان. ۇيىمداستىرۋشىلار بولسا, ەتنواۋىلدى ودان ءارى دامىتا تۇسەمىز دەپ وتىر.
گۇلايىم شىنتەمىرقىزى, «ەگەمەن قازاقستان»
اقتوبە اقتوبە وڭىرىندە بيىلعى كوكتەم جاۋىندى-شاشىندى بولىپ تۇر. مامىردىڭ العاشقى تاڭى دا اق جاۋىنمەن اتتى. كوكتەمگى جاۋىننان كەيىنگى ساۋمال سامال كوكىرەگىڭدى كەرنەيدى. اعاشتار ءبۇر جارىپ, قالا كوشەلەرى جاسارىپ قالعانداي اسەرگە بولەيدى. كوشەلەردەگى قيمىل-قوزعالىس تا ادەتتەگىدەن ەرتە باستالعانداي. ونىڭ دا سەبەبى بار, قالالىقتار قازاقستان حالقىنىڭ بىرلىگى كۇنىن مەرەكەلەۋگە اسىعۋلى. مەرەكەنىڭ باستى شاراسى «دوستىعىمنىڭ ايناسى – تاۋەلسىز قازاقستان» حالىقتىق جيىنى وتەتىن تۇڭعىش پرەزيدەنت ن.نازارباەۆ اتىنداعى ورتالىق ساياباق سالتاناتى بارىنەن وزگەشە. قىزىلدى-جاسىلدى جالاۋلار جەلبىرەيدى. ادەمى بەزەندىرىلگەن ساحنادان ەلدىكتى جانە بىرلىكتى دارىپتەگەن اسقاق اۋەندەر توگىلۋدە. ترانسپارانتتار مەن ۇندەۋلەر, تۋلار كوتەرگەن قالالىقتار وسىندا اعىلۋدا. ءاپ ساتتە-اق الاڭعا قالالىقتار مول جينالدى. مەرەكەلىك سالتانات شىمىلدىعى وبلىس ورتالىعىنداعى 19 ەتنومادەني بىرلەستىكتىڭ بي انسامبلدەرىنىڭ قويىلىمىمەن اشىلدى. ساحنا تورىنە وبلىس اكىمى بەردىبەك ساپارباەۆ كوتەرىلىپ, مەرەكەگە جينالعان قالالىقتار مەن قالا قوناقتارىنا قۇتتىقتاۋ ءسوز ارنادى. – بۇل مەرەكە – قازاقستاندىقتار ءۇشىن ايرىقشا ماڭىزدى ۇلىق مەيرام. كوپۇلتتى مەملەكەتىمىز 25 جىلدا زور جەتىستىكتەرگە جەتتى. بۇل – ەلىمىزدەگى ۇلتتار مەن ۇلىستاردىڭ دوستىعى مەن تاتۋلىعىنىڭ ارقاسى. ەلباسى ن.نازارباەۆ وسى بىرلىگىمىزدى, تۇراقتىلىعىمىزدى كوزدىڭ قاراشىعانداي ساقتاۋدى ۇدايى ايتىپ كەلەدى. «بىرلىك بار جەردە تىرلىك بار» دەگەندەي, ءبىز وسى سۇتتەي ۇيىعان تاتۋلىعىمىزدى ساقتاۋ جولىندا ەڭبەك ەتىپ, ءومىر ءسۇرۋىمىز كەرەك, – دەدى ءوڭىر باسشىسى. مەرەكە سالتاناتى 19 ەتنومادەني بىرلەستىك كوركەمونەرپازدارىنىڭ گالا- كونتسەرتىنە ۇلاستى. بي بيلەنىپ, كۇي كۇمبىرلەدى, الۋان تىلدە شىرقالعان اسەم اندەر كوك اسپانداعى كەمپىرقوساقتاي كەلىسىم تاۋىپ جاتتى. مەرەكەلىك شارالار وتكىزىلگەن جەرلەردە ساۋدا ۇيىمداستىرىلدى. قالاداعى سپورت الاڭدارى مەن گۇلزارلاردا ءتۇرلى سپورتتىق ويىندار قىزدى.
ساتىبالدى ءساۋىرباي, «ەگەمەن قازاقستان»
اتىراۋ. تاۋەلسىز ەلىمىزدىڭ باستى قۇندىلىعىنىڭ قاتارىنداعى بىرلىك پەن دوستىقتى, تاتۋلىق پەن كەلىسىمدى ساقتاۋعا ءار ازاماتتىڭ مۇددەلى ەكەنىن اتىراۋلىقتار دا اركەز ەستەن شىعارمايدى. مۇنىڭ ايقىن كورىنىسى جىل سايىن كەڭ كولەمدە اتالىپ وتىلەتىن قازاقستان حالقىنىڭ بىرلىگى كۇنى مەرەكەسىندە عانا ەمەس, ۇدايى بەكەمدىگىمەن دالەلدەنىپ كەلەدى. ماسەلەن, «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆانىڭ ايتۋىنشا, ەلىمىزدى باقىتتى مەكەنىنە بالاپ, ءوسىپ-ءونىپ جاتقان سان الۋان ەتنوستار ءۇشىن بىرلىكتىڭ تۋى بيىك بولۋىنان اسقان قۇندىلىق بولمايدى. ەل ەكونوميكاسىنىڭ وركەندەۋى دە ىشكى تۇراقتىلىق پەن تاتۋلىقتان باستاۋ الادى. ءيا, بۇل – تەك ءبىر عانا ەتنومادەني بىرلەستىك جەتەكشىسىنىڭ عانا پىكىرى ەمەس, ەلىمىزدىڭ كوك بايراعىنىڭ كوكتە ماڭگى جەلبىرەگەنىن قالاعان بارشانىڭ كوكەيىندە مازداعان اسىل مۇرات. بۇل پىكىرىمىزدىڭ دۇرىستىعىن كەشە اتىراۋداعى «يساتاي-ماحامبەت» الاڭىندا مىڭداعان تۇرعىندارعا مەرەكەلىك كوڭىل كۇي سىيلاعان «ەل قۋاتى – بىرلىك پەن تاتۋلىق!» اتتى تەاترلاندىرىلعان دۋماندى-سازدى باعدارلامادان انىق اڭعارا الدىق. ءارى دۋماندى, ءارى سازدى باعدارلاماعا ارقاۋ ەتىلگەن تەاترلاندىرىلعان كورىنىستەر ءار ەتنوستىڭ وكىلدەرىنىڭ تاۋەلسىز قازاقستاندى قاراشاڭىراعىنا بالايتىندىعىمەن, ەڭ باستىسى – ەلدەگى بىرلىك پەن تاتۋلىقتى تۋ ەتەتىندىگىمەن ەرەكشەلەنىپ تۇردى.
جولداسبەك شوپەعۇل, «ەگەمەن قازاقستان»
كوكشەتاۋ. جىل سايىن ماعىناسى تولىعىپ وتىراتىن مەيرامداردىڭ قۇندىلىعى كوپ ەكەندىگىن سەزىنىپ وتىرمىز. ماسەلەن, كوكشەتاۋداعى قازاقستان حالقىنىڭ بىرلىگى مەرەكەسى جۇرەك تەبىرەنتەرلىك دارەجەدە ءوتتى دەسەك, جاراساتىنداي. حالىق «ماڭگىلىك ەل» يدەياسىنىڭ جارقىن جەتەگىندە بولدى. تاۋەلسىزدىك الاڭىندا وبلىس اكىمى سەرگەي كۋلاگين كوركەيىپ كەلە جاتقان قالا تۇرعىندارى مەن قوناقتارىن ۇلىق مەرەكەمەن قۇتتىقتادى. الاشاداي اۋقىمدى الاتىن ەكراننان ءوڭىر تىرشىلىگى تىزبەلەنىپ جاتتى. ەتنومادەني بىرلەستىكتەر بۇگىن بار جاساۋىن تاعىنىپ, ۇلتتىق ۇستانىمداعى قۇندىلىقتارىن كورسەتىپ جاتىر. ورتالىق ساياباقتا ءوز-وزىنەن «دوستىق داڭعىلى» پايدا بولا قالىپتى. شىندىعىندا سولاي بولدى. مەرەكە «دوستىعىمىز جاراسقان ەلمىز» ۇرانىن كوتەرىپ تۇردى. وبلىستاعى 128 ۇلت پەن ۇلىس وكىلدەرى ۇلىق ۇستانىمدارىمەن كوڭىلدى كوككە ورلەتتى. جۇرتشىلىقتىڭ جاپپاي قول سوعۋى ەل ىرىسى مەن بەرەكەسىنىڭ ورتايمايتىنىن ايعاقتاعانىن ايتقىمىز كەلەدى.
باقبەرگەن امالبەك, «ەگەمەن قازاقستان»
قاراعاندى. كەنشىلەر استاناسى 1 مامىر – قازاقستان حالقىنىڭ بىرلىگى كۇنى مەرەكەسىن كەڭىنەن اتاپ ءوتتى. مەرەكەنىڭ نەگىزگى شارالارى قالاداعى ورتالىق ساياباقتا بولدى. مۇندا وبلىستىق قازاقستان حالقى اسسامبلەياسى فيليالىنىڭ ۇيىمداستىرۋىمەن ەتنومادەني بىرلەستىكتەردىڭ فەستيۆالى ءوتتى. بۇل شارادا وڭىردەگى دوستىقتىڭ دانەكەرى بولىپ جۇرگەن ۇجىمدار كورەرمەندەر الدىندا ونەر كورسەتىپ, ەلىمىزدەگى تاتۋلىق پەن تىنىشتىقتى دارىپتەدى. مەرەكەلىك ورتاعا ارنايى كەلگەن وبلىس اكىمى نۇرمۇحامبەت ابدىبەكوۆ جيىلعان قاۋىمدى قازاقستان حالقىنىڭ بىرلىگى كۇنى مەرەكەسىمەن قۇتتىقتادى. سونىمەن قاتار, ءوڭىر باسشىسى ەتنومادەني بىرلەستىكتەرگە ارنايى گرانتتار تابىس ەتتى. جالپى, بۇل كۇنى قاراعاندىنىڭ ورتالىق ساياباعى قۋانىش پەن شاتتىقتىڭ ورداسىنا اينالدى. اۋقىمدى شارانى وتكىزۋشىلەر قالا تۇرعىندارى مەن قوناقتارىنا ارناپ ءتۇرلى شارالاردى ۇيىمداستىردى. مۇندا سانداعان ۇلت پەن ۇلىس بالالارىنىڭ ءان-بيىنەن بولەك, باسقا دا مادەني شارالار, كورمەلەر مەن سپورت جارىستارى وتكىزىلدى. تاعى ءبىر ايتا كەتەتىن وقيعا, مەرەكە قارساڭىندا وبلىس اكىمى نۇرمۇحامبەت ابدىبەكوۆ «وڭىرلەردى 2020 جىلعا دەيىن دامىتۋ» باعدارلاماسى بويىنشا وبلىس ورتالىعىندا سالىنعان كوپقاباتتى تۇرعىن ءۇيدىڭ تۇساۋكەسەرىندە بولىپ, باسپانالى بولعان 30 وتباسىنا پاتەرلەردىڭ كىلتىن سالتاناتتى جاعدايدا تاپسىردى. «مەرەكەدەگى ەڭ باستى سىي – باسپانالى بولۋ. ءبىزدىڭ ازاماتتارعا جاقسى جاعداي جاساۋ, ونىڭ ىشىندە باسپانامەن قامتاماسىز ەتۋ – مەملەكەت باسشىسى نۇرسۇلتان نازارباەۆتىڭ جەرگىلىكتى بيلىك ورگاندارىنىڭ الدىنا قويعان باستى مىندەتتەرىنىڭ ءبىرى», – دەگەن ءوڭىر باسشىسى قۋانىشى قوينىنا سىيماي تۇرعان اعايىندى بىرلىك كۇنى مەرەكەسىمەن جانە دە قونىس تويلارىمەن قۇتتىقتادى.
قايرات ءابىلدينوۆ, «ەگەمەن قازاقستان»
قوستاناي. – ۇلتتىق بىرلىك, حالىق دوستىعى بىزدە تەك اۋىزبەن ايتىلا سالعان اسىرەقىزىل ءسوز ەمەس, بۇل – ءبىزدىڭ كۇندەلىكتى ءومىرىمىزدىڭ شىنايى كورىنىسى. كىتاپحانادا ارداگەرلەر, ءتۇرلى ۇلتتىق-مادەني ورتالىقتار, مەكتەپ وقۋشىلارى قىزىقتى جۇمىستار جۇرگىزەدى. بىلتىردان بەرى شارالاردىڭ بارلىعى ءۇش تىلدە وتەدى. مەكتەپ وقۋشىلارى مۇنى داستۇرگە اينالدىرىپ, ۇيرەنىپ كەلەدى. بۇگىن كورمەگە تاۋەلسىزدىكتىڭ 25 جىلدىعىنا وراي تاريحىمىزدان سىر شەرتەتىن كىتاپتار, بىرلىگىمىزدى پاش ەتەتىن فوتوالبومدار اكەلدىك. ونىڭ سىرتىندا برايلەر كىتاپتارىمىز تاعى بار. جىل بويى كوزى كورمەيتىن كىسىلەرگە وسىنداي كىتاپتار جەتكىزىپ بەرىپ وتىرامىز, ولاردىڭ ءوزى ءتۇرلى ۇلت وكىلدەرى عوي. العىسىن جاۋدىرىپ قالادى, – دەيدى قوستاناي قالالىق ورتالىقتاندىرىلعان كىتاپحانالار جەلىسى مەكەمەسىنىڭ ديرەكتورى ايگۇل سەيداحمەتوۆا. ايشىقتى مەرەكەدە قوستانايلىقتار مەن قالا قوناقتارى ءۇشىن ءان مەن كۇيدەن شاشۋ شاشىلدى. وبلىس اكىمى ارحيمەد مۇحامبەتوۆ باستاعان وبلىس جانە قالا باسشىلارى تۇرعىنداردى قازاقستان حالقىنىڭ بىرلىگى كۇنى مەرەكەسىمەن قۇتتىقتادى. – ەلباسى نۇرسۇلتان نازارباەۆتىڭ كەمەل ساياساتى ارقاسىندا قازاقستاندا ەلدىڭ بىرلىگى, حالىقتىڭ تاتۋ-ءتاتتى تىرلىگى ساقتالىپ وتىر. حالىق دوستىعىنىڭ قازاقستاندىق ۇلگىسىن الەم جۇرتى مويىندادى. ءبىزدىڭ ەلىمىزدە ءار ۇلتتىڭ, ۇلىستىڭ ءداستۇرىن, سالتىن ساقتاۋعا, دامىتۋعا تولىق جاعداي بار. ماڭگىلىك ەل – ءبىزدىڭ بولاشاعىمىزدىڭ, دوستىعىمىزدىڭ, بىرلىگىمىزدىڭ نەگىزى, – دەدى وبلىس اكىمى ارحيمەد بەگەجان ۇلى. وبلىس اكىمى وڭىردەگى دوستىققا, ۇلت پەن ۇلىستار اراسىنداعى تاتۋلىق پەن بەيبىتومىردىڭ سالتانات قۇرۋىنا ۇلەس قوسىپ جۇرگەن ۇلتتىق-مادەني بىرلەستىكتەر جەتەكشىلەرىن قازاقستان حالقىنىڭ بىرلىگى كۇنى مەرەكەسىمەن قۇتتىقتاپ, ماقتاۋ قاعازدارىن تابىس ەتتى.
ءنازيرا جارىمبەتوۆا, «ەگەمەن قازاقستان»
قىزىلوردا. قىزىلوردادا بىرلىك مەرەكەسى «گۇلدەنگەن قازاقستان» انىنمەن باستالدى. 150 بالادان قۇرالعان حور ءان شىرقاپ تۇرعاندا «تاۋەلسىزدىككە – 25 جىل» دەگەن جازۋى بار بۋما شار مەن 25 اق كوگەرشىن ۇشىرىلدى. مەرەكەگە جينالعان جۇرتشىلىقتى ايماق باسشىسى قىرىمبەك كوشەرباەۆ قۇتتىقتادى. – اسقاق ەلدىك مۇراتتارىمىز ورىندالىپ, ورەلى ىستەرىمىز جالعاسىن تاپسىن. الاشتىڭ اناسى, قازاقتىڭ كيەلى مەكەنى – سىر توپىراعىندا بىرلىكتىڭ بەسىگىن بىرگە تەربەتكەن ۇلتتار مەن ۇلىستاردىڭ تاتۋلىعى ءار شاڭىراققا بەرەكە سىيلاپ, بارشا قازاقستاندىقتارعا التىن تۇعىر بولسىن, – دەدى اكىم. بۇل مەرەكە بىرلىك پەن دوستىقتىڭ سيمۆولى عانا ەمەس, قازاقستاندى وتانىم دەپ سانايتىن بارشا ءتۇرلى ۇلت وكىلدەرىنىڭ مادەنيەتىنە, تىلىنە دەگەن ۇلكەن قۇرمەتتى كورسەتەدى. مۇنداي بىرلىك پەن ۇيلەسىمدىلىك ماڭگى بولسىن. سونداي-اق, ورتالىق الاڭدا ۇلتتىق سپورت تۇرلەرىنەن جارىستار ۇيىمداستىرىلدى. مەرەكەگە وراي قىزىلوردا قالاسىندا 5 كوپقاباتتى ءۇي پايدالانۋعا بەرىلىپ, تۇرعىندارعا كىلتتەرى تاپسىرىلدى. «مەن بۇگىنگى قۋانىشىمدى ايتىپ جەتكىزە الار ەمەسپىن. پاتەر الۋ قاشاننان ارمانىمىز بولاتىن. بىرلىك مەرەكەسى كۇنى ءوز باسپانامىزعا قول جەتكىزگەنىمىزگە قۋانىشتىمىز», – دەيدى جاڭا پاتەر يەسى باقىت ناسىروۆا. سولايشا, سىر ەلى حالىق دوستىعى مەرەكەسىن ءوز دارەجەسىندە اتاپ ءوتتى.
ەرجان بايتىلەس, «ەگەمەن قازاقستان»
ورال. بيىل ورال وڭىرىندەگى بىرقاتار ەتنومادەني بىرلەستىك وكىلدەرى مەرەكەنى وتكىزۋدىڭ بۇعان دەيىنگى ۇلگىلەرىنە وزگەرىستەر ەنگىزۋ جانە وعان جاڭاشا سيپات بەرۋ جونىندە باتىس قازاقستان وبلىستىق قازاقستان حالقى اسسامبلەياسى كەڭەسىنە بىرقاتار ۇسىنىستار بەردى. اتالعان كەڭەس ءوز وتىرىسىندا ولاردىڭ تالاپ-تىلەكتەرىن قاناعاتتاندىردى. سوعان سايكەس, قازاقستان حالقىنىڭ بىرلىگى كۇنى قۇرمەتىنە ورال قالاسى مەن بارلىق اۋدان ورتالىقتارىندا مازمۇنى تەرەڭ, شوقتىعى بيىك 27 ءىس-شارا وتكىزىلدى. سونىمەن بىرگە, وسى جوبا اياسىندا «قازاقستان حالقى – بولاشاعى ءبىرتۇتاس ەل» عىلىمي-تاجىريبەلىك كونفەرەنتسيا ۇيىمداستىرىلدى. بۇعان قوسا مەرەكە قارساڭىندا «بەيبىتشىلىك پەن كەلىسىمنىڭ جول كارتاسى» اتتى جارقىن دا جاسامپاز جوبانىڭ تۇساۋى كەسىلدى. ءارى وسى ورايدا وڭىردەگى ونەر ۇجىمدارى اراسىندا وبلىستىق فەستيۆال باستاۋ الدى. بۇل باعدارلاما جىل اياعىنا دەيىن سوزىلماق. باتىس قازاقستانداعى بيىلعى 1 مامىر مەرەكەسى تاۋەلسىزدىكتىڭ 25 جىلدىعىنا ارنالدى. وبلىس ورتالىعىنداعى 25 ورىندا 25 شارا وتكىزىلگەنى وسىعان تاعى ءبىر دالەل. ونىڭ وزەگىندە «ماڭگىلىك ەل» تاقىرىبىندا دارىستەر وقىلدى. كورمەلەر ۇيىمداستىرىلدى. «بىرلىگىمىز جاراسقان» اتتى كونتسەرتتىك باعدارلامالار مارەگە جەتتى. – ورال وڭىرىندەگى بيىلعى بىرلىك كۇنى وزگەشە سيپات الدى. ءارى بۇعان دەيىنگى ۇيىمداستىرىلعان مەرەكەلەرگە قاراعاندا الدەقايدا تارتىمدى, الدەقايدا قىزىقتى ءارى بارىنشا كەڭ اۋقىمدا وتكىزىلدى. بۇعان ءبارىمىز دە سۇيسىندىك. وبلىستىڭ ورتالىق الاڭىندا قۇرىلعان ەتنواۋىلداردا دا شەبەر قولداردىڭ ىزدەرى مەن شىعارماشىلىق ۇشقىر ويدىڭ جەمىسى اتويلاپ تۇردى. بيىلعى 1 مامىر مەرەكەسى ءبارىمىزدىڭ كوڭىلىمىزدەن شىقتى. بارىمىزگە ۇنادى. الداعى جىلداردا دا ونىڭ وسىنداي پىشىمدە وتكىزىلگەنىن قالايمىز, – دەدى گازەت تىلشىسىنە وڭىردەگى «دوس» قوعامدىق بىرلەستىگىنىڭ ءتورايىمى ۆ.شوحينا. باتىس قازاقستان وبلىسىنىڭ اكىمى التاي كولگىنوۆ: ء«بىزدىڭ ءبارىمىز ءۇشىن ەڭ كەرەگى وسىنداي تاتۋ-ءتاتتى قارىم-قاتىناستار», – دەدى.
تەمىر قۇسايىن, «ەگەمەن قازاقستان»
وسكەمەن. شىعىس وڭىرىندە بىرلىك كۇنى كەڭىنەن اتالىپ ءوتتى. ءىس-شارالار ەرتەڭگىلىك وبلىس ورتالىعىنىڭ قازاقستان كوشەسىندەگى جەرگىلىكتى كاسىپورىندار اۆتوكولىكتەرىنىڭ مەملەكەتتىك تۋلارمەن ايشىقتالعان كولونناسىنىڭ شەرۋىمەن باستالدى. «مەنىڭ تۋىم» شاراسى قالانىڭ نەگىزگى كوشەلەرىن ارالاپ شىققاننان كەيىن رەسپۋبليكا الاڭىندا «جاسامپازدىق پەن ىنتىماقتىڭ 25 جىلى» اتتى مەرەكەلىك ءىس-شارالار لەگى ءوتتى. بۇل باعدارلاما اياسىندا ەتنومادەني بىرلەستىكتەر مەن شىعارماشىلىق ۇجىمداردىڭ قاتىسۋىمەن كونتسەرت, سپورتتىق ويىندار, ساۋدا-ساتتىق جانە قولونەر شەبەرلەرىنىڭ كورمەسى ۇيىمداستىرىلدى. سونداي-اق, «مەتاللۋرگ» ساياباعى سالتاناتتى تۇردە اشىلىپ, شاھاردىڭ بارلىق ساياباقتارىندا مەرەكەلىك كونتسەرتتەر مەن بالالارعا ارنالعان ءتۇرلى ويىن-ساۋىقتىق شارالار ءوتتى. ءتۇس الەتىندە قالاداعى سۋبۇرقاقتار, ونىڭ ىشىندە ەرتىس وزەنى جاعالاۋىنداعى امفيتەاتر الاڭىندا, ء«ۇلبى» ورتالىق مادەنيەت ءۇيى, وبلىستىق مەشىت جانە گوركي مەن كيروۆ كوشەلەرى قيىلىسىنداعى الاڭدارداعى سۋبۇرقاقتار ىسكە قوسىلدى. تۇستەن كەيىن اباي ەسكەرتكىشى الدىندا «اۆتوەكزوتيكا-2016» اۆتوشوۋى ۇيىمداستىرىلىپ, «جاستار» ساياباعىندا پاسحا مەرەكەسىنە وراي بۇقارالىق سەيىل, دوستىق ءۇيى جانىندا وبلىستىق ونەر ۇجىمدارىنىڭ كونتسەرتى ءوتتى. فولكلورلىق انسامبلدەر ۇلتتىق سالت-داستۇرلەرمەن تانىستىردى. ال كەشكىلىك وبلىس ورتالىعىندا «ستۋدەنت كوكتەمى-2016» گالا-كونتسەرتى جاستاردىڭ بي كەشىمەن جالعاستى. ايتا كەتەلىك, بىرلىك كۇنى مەرەكەسى اياسىندا ءوڭىردىڭ بارلىق قالالارى مەن اۋداندارىندا مازمۇندى مەرەكەلىك ءىس-شارالار ۇيىمداستىرىلىپ, حالىقتىڭ تاتۋلىعى مەن ىنتىماعى تاعى دا پاش ەتىلدى.
دۋمان اناش, «ەگەمەن قازاقستان»
پاۆلودار. مەرەكەدەن ءبىر كۇن بۇرىن وبلىس ورتالىعىنداعى دوستىق ۇيىندە وبلىس اكىمى بولات باقاۋوۆ ءوڭىردىڭ ەتنومادەني بىرلەستىكتەرىنىڭ وكىلدەرىنە ارنايى گرانتتار تابىس ەتتى. بيىلعى قازاقستان حالقىنىڭ بىرلىگى كۇنى مەرەكەسى قارساڭىندا ەل تاۋەلسىزدىگىنىڭ 25 جىلدىعى, «ماڭگىلىك ەل» جالپىۇلتتىق پاتريوتتىق اكتىسى قابىلداندى. ەل بىرلىگى ارقاسىندا رەفورمالار جۇزەگە اسۋدا. وسى جاقسى جاڭالىقتاردىڭ سوڭىن بۇگىن قالا تۇرعىندارى, قوناقتار جاڭادان پايدالانۋعا بەرىلگەن يۋ.گاگارين اتىنداعى قالالىق مادەنيەت جانە دەمالىس ساياباعىندا جارقىن كوڭىل-كۇيمەن جالعاستىردى. قالاداعى حورەوگرافيالىق ونەر ۇجىمدارى «تاۋەلسىزدىك سالتاناتى» اتتى كوك جالاۋشالار جەلبىرەتىپ, ەرەكشە كومپوزيتسيالىق كورىنىستەر كورسەتتى. وبلىس باسشىلىعى, سوعىس جانە ەڭبەك ارداگەرلەرى, جاستار قۇتتىقتاۋ سوزدەرىن ارناۋدا. ءان شىرقاعان, بي بيلەگەن قۋانىشتى جاستار, قىزىل-جاسىل شارلار كوتەرگەن كىشكەنتاي بوبەكتەر اينالانىڭ ءسانىن كەلتىردى. ساياباقتان كومپوزيتسيالىق قويىلىم ارقىلى جاسالعان «دوستىق پيراميداسى» دا كورىندى. «ماڭگىلىك ەل» اتتى فلەش-موبتا «شەرنياز» حورەوگرافيالىق ۇجىمى, ەتنومادەني بىرلەستىكتەر قاتىستى. ساياباق ىشىندە «اۋەندەر بىرلىگى» دەگەن بولىمدە ايگىلى «دوس-مۇقاسان» ءانسامبلى ونەر كورسەتتى. ءدال وسى الاڭدا. «جاسمين» جانە «نادەجدا» بيشىلەرى قازاق بيلەرىن بيلەدى. قالالىق مادەنيەت ءبولىمىنىڭ باسشىسى ارداق رايىمبەكوۆتىڭ ايتۋىنشا, عاجايىپ بي فەستيۆالىنە جەرگىلىكتى حورەوگرافيالىق ۇجىمدارمەن بىرگە رەسەيدىڭ ماسكەۋ, بارناۋل, ومبى بيشىلەرى قاتىسىپ, ونەر كورسەتتى. جانە «باكە مەن ساكە» ساياباققا جينالعان جۇرتشىلىقتى كوڭىلدى ازىلدەرىمەن كۇلدىرىپ جاتتى. مەرەكە سوڭى «ۇلت بىرلىگى – ۇلى بايلىق» اتتى مەرەكەلىك كونتسەرتكە ۇلاستى.
فاريدا بىقاي, «ەگەمەن قازاقستان»
پەتروپاۆل. وبلىس ورتالىعىنان باستاۋ العان مەرەكە بارلىق اۋدانداردا جوعارى كوڭىل-كۇيمەن جالعاسىپ, ءبىر شاڭىراق استىندا تۇراتىن حالىقتىڭ ۇلتتىق قۇندىلىقتارى مەن سالت-داستۇرلەرى پاش ەتىلدى. ورتالىق الاڭداعى «بولاشاعىمىز بىرلىكتە» اتتى سالتاناتتى مەرەكەنىڭ اشىلۋىندا سويلەگەن سوزىندە ايماق باسشىسى ەرىك سۇلتانوۆ تۇرعىنداردى تاۋەلسىزدىگىمىزدىڭ 25 جىلدىعى قارساڭىندا اتالىپ جاتقان ايتۋلى مەيراممەن قۇتتىقتاپ, ەلباسى نەگىزىن قالاپ بەرگەن بارلىق ەتنوستاردىڭ تەڭ قۇقىقتىعىنا نەگىزدەلگەن قازاقستاندىق دامۋ جولىن الەمدىك قوعامداستىق جوعارى باعالايتىنىن اتاپ ءوتتى. بۇدان كەيىن ەڭبەكتە, وتباسىندا تاماشا ونەگە-ۇلگى كورسەتىپ, جاس ۇرپاق تاربيەسىنە بەلسەنە اتسالىسىپ جۇرگەن ءبىر توپ تاڭداۋلىلار ماراپاتتالدى. ەتنومادەني بىرلەستىكتەردىڭ توراعالارىنا 100 مىڭ تەڭگەنىڭ سەرتيفيكاتى تابىس ەتىلدى. كونتسەرتتىك باعدارلاما اياسىندا ىنتىماق-بىرلىگى جاراسقان ەلدىڭ ونەرپازدارى ءار تىلدە اندەر شىرقاپ, مىڭ بۇرالعان بيلەرمەن تامساندىردى. «دوستىق» ءۇيى الدىندا ۇلتتىق مادەني فەستيۆال ۇيىمداستىرىلىپ, وزىق سالت-داستۇرلەر مەن ادەت-عۇرىپتار ۇلگى ەتىلدى. «قىزىلجار سۋ» كاسىپورنىندا «باۋىرساق جانە كۋليچ» كۇنى ۇيىمداستىرىلۋى, قازاقستان حالقى اسسامبلەياسىنىڭ قوعامدىق كەڭەسىنىڭ قۇرىلۋى ايشىقتى وقيعالاردىڭ ءبىرى بولدى. ۇلتتىق ۇلانعا قاراستى پەتروپاۆل اسكەري ينستيتۋتىندا حالىق دوستىعى فەستيۆالى ءوز جالاۋىن كوتەرىپ, ءتۇرلى كومپوزيتسيالىق قويىلىمدار كورسەتىلدى. ادام جانىن سەرگىتىپ, بويىندا ەلگە, جەرگە دەگەن جوعارى رۋح دارىتاتىن شاتتىق اۋەندەر جەر-جەرلەردە ەرەكشە جاراسىم تاپتى.
ءومىر ەسقالي, «ەگەمەن قازاقستان»
تاراز. تۇراقتىلىق نەگىزى – تاتۋلىق. ال تاتۋلىق كەز كەلگەن ەلدى, حالىقتى تەك جاقسىلىق پەن ىنتىماققا, كەلىسىمگە جەتەلەيدى. بەرەكە مەن بىرلىكتىڭ تۋى جەلبىرەپ, ەڭبەك پەن دوستىقتىڭ كۇيىن شەرتەتىن, تاتۋلىقتىڭ عاجاپ ۇلگىسىن كۇللى الەمگە پاش ەتەتىن وسىناۋ مەرەكەنى جامبىلدىقتار كەڭ كولەمدە اتاپ ءوتتى. بىرلىگى بەرەكەلى, تىرلىگى مەرەكەلى, ىنتىماعى جاراسقان ەلدىڭ عانا ىرىس-نەسىبەسى مول بولماق. ۇلتارالىق كەلىسىم مەن بەرەكەگە باستار بىرلىكتىڭ ارقاسىندا ەكونوميكامىز قارىشتاپ دامىپ, تۇرمىسىمىز جىلدان جىلعا جاقسارا تۇسۋدە. بۇل – بۇكىل قازاقستاندىقتاردىڭ ەڭبەكسۇيگىشتىگى مەن توپتاسقاندىعىنىڭ ناتيجەسى! مەرەكە كۇنى تارازدىڭ ورتالىق الاڭدارى مەن كوشەلەرىندە كونتسەرتتىك باعدارلامالار ۇيىمداستىرىلدى. قالا تۇرعىندارى «مامىر» ساياباعىندا ءار ءتۇرلى ۇلت وكىلدەرىنىڭ ونەرلەرىن تاماشالادى. سونداي-اق, جەرگىلىكتى جوعارى وقۋ ورىندارى عىلىمي-تاجىريبەلىك كونفەرەنتسيا وتكىزسە, وبلىستىق ەتنومادەني بىرلەستىكتەر «ۇلكەن ەل – ۇلكەن وتباسى» فەستيۆالىنە قاتىستى. ءبىر سوزبەن ايتقاندا, بارشا جامبىلدىقتار تۋعان ەلدىڭ تۋىنىڭ استىندا توپتاستى, تۋعان جەردىڭ تۇعىرىن بيىك ەتتى. ياعني, دامىعان ەلدەردىڭ قاتارىنا ەنۋدى مەجەلەگەن مەملەكەتىمىزدە بەيبىتشىلىكتى نىعايتىپ, ىنتىماق پەن بىرلىكتىڭ تۋىن بيىككە كوتەرۋ – ءبارىمىزدىڭ اسىل مۇراتىمىز. وسىناۋ ماقسات-مۇددەلەردىڭ ويداعىداي جۇزەگە اسۋى ەڭ الدىمەن ءاربىرىمىزدىڭ قاجىرلى دا قايراتتى ەڭبەگىمىزگە, ءوزارا تۇسىنىستىك پەن ىنتىماققا, ەلىمىزدەگى ىشكى ساياسي تۇراقتىلىققا, ۇلتارالىق جانە ۇلت ىشىندەگى پاراساتتىلىققا تىكەلەي بايلانىستى. ۇلتتىق بىرلىگىمىز نىعايىپ, تاتۋلىعىمىز باياندى بولسىن!
ورالحان ءداۋىت, «ەگەمەن قازاقستان»
تالدىقورعان. تالدىقورعانداعى «جاستار» مادەني-دەمالىس ساياباعىندا قازاقستان حالقىنىڭ بىرلىگى كۇنى جالپىحالىقتىق تۇرعىدا مەرەكەلەندى. ەتنومادەني بىرلەستىكتەردىڭ ۇيىتقى بولۋىمەن وڭىردە تۇراتىن ءتۇرلى ەتنوس وكىلدەرى ۇلتتىق كيىمدەرىن جاراستىرا كيىپ, ءوز ۇلتتارىنىڭ قۇندىلىقتارىن جارىسا كورسەتتى. ۇلتتىق اسحانالار دا تىزىلە ەلگە قىزمەت جاسادى. ءدۇيىم جۇرتتىڭ الدىنا الماتى وبلىسىنىڭ اكىمى اماندىق باتالوۆ شىعىپ, ىنتىماق پەن بىرلىك, تاتۋلىق تۋرالى قۇتتىقتاۋ ءسوز سويلەدى. مەرەكەنىڭ ءسانىن مەكتەپ وقۋشىلارى ءتۇرلى ۇلت كيىمدەرىن كيىپ, سول ەلدەردىڭ ۇلتتىق بيلەرىن بيلەپ كىرگىزدى. اسىرەسە, «قارا جورعا» ءبيىن ناقىشىنا كەلتىرە بيلەگەندە رازى بولعان حالىق ءبىر سەرپىلىپ قالدى. سونداي-اق, قازاق, ۇيعىر, وزبەك جانە تاۋ حالىقتارىنىڭ بيلەرىن دە ءبىزدىڭ بۇلدىرشىندەرىمىز تاماشا تارتۋ رەتىندە پاش ەتە ءبىلدى. بۇل مەكتەپ وقۋشىلارىنىڭ جىلدار بويى تىنباي جاتتىققاندىقتارىن ايقىن كورسەتىپ تۇردى. ونى كورە دە, باعالاي دا بىلگەن ءلازىم. كونتسەرتتىك باعدارلاما ءسۇيىنباي اتىنداعى وبلىستىق فيلورمونيا ارتىستەرى, قازاقستاندىق ەسترادا جۇلدىزدارى مەن الماتى وبلىستىق قازاقستان حالقى اسسامبلەياسى فيليالى ۇيىمداستىرعان ءان شاشۋمەن جالعاستى.
نۇربول الدىباەۆ, «ەگەمەن قازاقستان»
شىمكەنت. Oبلىستىق ورىس دراما تەاترىندا 1 مامىر – قازاقستان حالقىنىڭ بىرلىگى كۇنىنە ارنالعان «بىرلىك. ىنتىماق. دوستىق» مەرەكەلىك شاراسى ءوتتى. قازاقستان تاۋەلسىزدىگىنىڭ 25 جىلدىعى اياسىندا وتكەن مەرەكەلىك شاراعا قاتىسقان ءوڭىر باسشىسى بەيبىت اتامقۇلوۆ جينالعانداردى جانە بارشا وڭتۇستىكقازاقستاندىقتاردى بىرلىك كۇنى مەرەكەسىمەن قۇتتىقتادى. سالتاناتتى جيىندا وبلىس باسشىسى ەلدەگى ەتنوسارالىق تاتۋلىق پەن قوعامدىق-ساياسي تۇراقتىلىقتى ساقتاۋعا سۇبەلى ۇلەس قوسقان بىرقاتار ازاماتتارعا ەلباسىنىڭ اتىنان العىس حات پەن «بىرلىك» التىن مەدالىن تابىستادى. سونىمەن قاتار, ءوڭىردىڭ الەۋمەتتىك-ەكونوميكالىق دامۋىنا جانە قوعامدىق-ساياسي ومىرىنە بەلسەنە قاتىسقانى ءۇشىن 20 ازامات «وبلىس اكىمىنىڭ العىس حاتىمەن» ماراپاتتالدى. ءتۇرلى ۇلت وكىلدەرىنىڭ قاتىسۋىمەن وتكەن مەرەكەلىك شارا «بايتەرەك» كومپوزيتسياسى مەن «سارجايلاۋ» حورەوگرافيالىق قويىلىمىمەن باستاۋ السا, ىنتىماعى جاراسقان ءتۇرلى ەتنوس وكىلدەرىنىڭ ونەرپازدارى ءان شىرقاپ, ونەر كورسەتتى. وڭتۇستىك قازاقستاندا بۇگىنگى تاڭدا 100-دەن استام ەتنوس پەن 11 ءدىني كونفەسسيا وكىلدەرى تاتۋ-ءتاتتى ءومىر ءسۇرىپ, بىرلەسە ەڭبەك ەتىپ كەلەدى. ايتا كەتەيىك, بيىل وبلىس اكىمدىگىنىڭ باستاماسىمەن وڭىرىمىزدە العاش رەت بىرلىك مەرەكەسىن تويلاۋ شەڭبەرىندە «دوستىق سىيى» شاراسى ءوتتى. يگى شارا اياسىندا ايماقتاعى ەتنومادەني بىرلەستىكتەردىڭ مۇشەلەرى ءبىر-بىرىنە سىي جاساپ, ءوزارا تاتۋلىعىن نىعايتا ءتۇستى.
باقتيار تايجان, «ەگەمەن قازاقستان»
