«التىن ادام سۇيەگىنىڭ جۇقاناسى

دانياعا زەرتتەۋگە جىبەرىلگەنى داقپىرت» تاياۋ كۇندەرى عانا Tengrinews.kz تىلشىلەرى ەسىك قورعانىنان تابىلعان التىن ادامنىڭ سۇيەك قالدىقتارىنىڭ ۇلگىلەرى عىلىمي ساراپتاما جاساۋ ءۇشىن دانيا ەلىنە جىبەرىلگەنى تۋرالى اقپارات تاراتقان بولاتىن. بۇل مالىمدەمەنىڭ ءوزى عالامتوردا قيعاش كوزقاراستارعا تۇرتكى بولعاندىقتان, وسى جاڭالىقتىڭ انىق-قانىعىن تولىعىراق ءبىلۋ ماقساتىندا «ەسىك تاريحي-مادەني قورىق مۇراجايىنىڭ» ديرەكتورى گۇلميرا مۇحتاروۆاعا حابارلاسقان ەدىك. التىن ادامنىڭ جاسى مەن جىنىسى تۋ­رالى ءالى كۇنگە دەيىن ناقتى دايەكتەمە بولماعاندىقتان عىلىمي قاۋىمداستىقتا ءتۇرلى پىكىر تۋعىزىپ كەلە جاتقانى بەلگىلى. ەگەر الماتى وبلىسىنداعى ەسىك قالاسىنىڭ سول­تۇستىگىندەگى ەسىك وزەنىنىڭ سول جاق جاعا­لاۋىنداعى تەمىر داۋىرىنەن ساقتالعان, ساق وباسىنان تابىلعان التىن كيىمدى ادامنىڭ جىنىسىن ناقتى انىقتاۋ كەرەك بولسا, وندا نەگە تاڭداۋ دانيا ساراپشىلارىنا ءتۇستى دەگەن ساۋالعا تاريح عىلىمدارىنىڭ كانديداتى گۇلميرا  مۇحتاروۆا بۇل اقپارات­تىڭ ناقتى ەمەس ەكەندىگىن ايتىپ وتىر. ەسىك تاريحي-مادەني قورىق مۇراجايىنىنا ديرەكتورى اتالمىش سايت جازىپ وتىرعان­داي دانيانىڭ ماماندارى قازاقستانعا كەلىپ, زەرتتەۋلەر جاساۋ ءۇشىن التىن ادام سۇيەكتەرىنىڭ قالدىقتارى مەن دنك اناليزدەرى وسى ەلگە الىپ كەتكەندىگى تۋرالى اقپاراتتى راستاعان جوق. – شىن مانىندە بۇل ناقتى اقپارات ەمەس. كەزىندە ءبىر ءباسپاسوز ءماسليحاتى دانيا ماماندارى دا التىن ادامعا ساراپتاما جاساۋعا قىزىعۋشىلىق تانىتىپ وتىرعانى عانا ايتىلعان بولاتىن. قازىر الىپ-ۇشىپ, اسىعىس اقپاراتتار تاراتاتىن سايتتار وقىرمان تارتۋ ءۇشىن اقيقاتقا تولىق نەگىزدەلمەگەن جاڭا­لىقتار تاراتۋعا ءماجبۇر. Tengrinews.kz ءتىلشىسى حابارلاسقان كەزىندە, ءدال وسى ماسەلەگە قاتىستى اسىعىستىق تانىتپاۋىن سۇراعان بولاتىنبىز. بىراق, ولار ءبىز­دىڭ بۇل وتىنىشىمىزگە قاراماستان, دابىرايعان دار­­داي تاقىرىپ قويىپ, جاريالاپ وتىر. ال التىن ادامنىڭ جىنىسى مەن جاسىن, باسقا دا جاعداياتتارىن انىقتاۋعا ءوزىمىزدىڭ عالىمدار تارتىلا ما, الدە شەتەلدە ساراپتاما جاسالا ما, بۇل ءالى تولىق شەشىلگەن جوق. بۇل ماسەلە بويىنشا الداعى 1-1,5 اي كولەمىندە مامىلە جاسالىنادى, – دەدى «ەسىك تاريحي-مادەني قورىق-مۇراجايىنىڭ» ديرەكتورى گ.مۇحتاروۆا. قازىرگى تاڭدا اتالعان مۇراجايدا 2 مىڭ­نان استام تاريحي جادىگەر ساقتاۋلى. 1969 جىلى  ساق قورعاندارىنان  «التىن ادام» تابىلعان سوڭ وسى وڭىرگە دەگەن ارحەلوگتاردىڭ قىزىعۋشىلىعى ارتا تۇسكەن. قازىرگى كەزدە دە قورعانداردا قازبا جۇمىستارى ءجۇرىپ تۇرادى. ايناش ەسالي, «ەگەمەن قازاقستان»