حالىقارالىق كەلىسىم راتيفيكاتسيالاندى

كەشە پارلامەنت سەناتىنىڭ توراعاسى قاسىم-جومارت توقاەۆتىڭ توراعالىق ەتۋىمەن پالاتانىڭ كەزەكتى جالپى وتىرىسى بولدى. وتىرىستا ءبىرىنشى كەزەكتە قازاقستان رەسپۋبليكاسى پرەزيدەنتىنىڭ جارلىعىمەن باس پروكۋرور بولىپ تاعايىندالعان جاقىپ اسانوۆتىڭ كانديداتۋراسىنا پالاتا دەپۋتاتتارى كەلىسىمىن بەردى. ونىڭ ءومىربايانى تانىستىرىلعان سوڭ قازاقستان رەسپۋبليكاسى پرەزيدەنتىنىڭ ۇسىنۋىن قاراۋ ناتيجەسى بويىنشا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى قازاقستان رەسپۋبليكاسى پارلامەنتى سەناتى رەگلامەنتىنىڭ 71-تارماعىن باسشىلىققا الا وتىرىپ, مىناداي قورىتىندىعا كەلدى: قازاقستان رەسپۋبليكاسى پارلامەنتىنىڭ سەناتىنا قازاقستان رەسپۋبليكاسى كونستيتۋتسياسى 55-بابىنىڭ 2) تارماقشاسىنا, «پروكۋراتۋرا تۋرالى» قازاقستان رەسپۋبليكاسىنىڭ زاڭى 10-بابى 1-تارماعىنىڭ 1-تارماقشاسىنا سايكەس جانە قازاقستان رەسپۋبليكاسى پرەزيدەنتىنىڭ ۇسىنۋى نەگىزىندە قازاقستان رەسپۋبليكاسى پرەزيدەنتىنىڭ جاقىپ قاجمان ۇلى اسانوۆتى قازاقستان رەسپۋبليكاسىنىڭ باس پروكۋرورى قىزمەتىنە تاعايىنداۋىنا كەلىسىم بەرۋگە ۇسىنىس جاسالسىن, دەلىنگەن سەنات كوميتەتىنىڭ قورىتىندىسىندا. سونىمەن قاتار, جالپى وتىرىستا سەناتورلار قازاقستان مەن ماكەدونيا اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى ۇكىمەتارالىق كەلىسىمدى راتيفيكاتسيالادى. ماكەدونيا پرەزيدەنتىنىڭ قازاقستانعا مەملەكەتتىك ساپارى بارىسىندا 2012 جىلعى 2 شىلدەدە استانادا قول قويىلعان كەلىسىم ەلدەردىڭ ينۆەستيتسيالىق احۋالىن جاقسارتۋعا جانە ەكى ەلدىڭ ءوزارا ءتيىمدى ساۋدا-ەكونوميكالىق ىنتىماقتاستىعىن ودان ءارى دامىتۋعا جاعداي جاسايدى. كەلىسىمدە تاراپتار اراسىنداعى داۋلاردى شەشۋ ماقساتىندا ۇيىمداستىرىلعان حالىقارالىق تورەلىك سوتتى قالىپتاستىرۋ راسىمدەرىن جان-جاقتى رەتتەيتىن ەرەجەلەر بار. وتىرىس سوڭىندا وسكەمەندەگى قالالىق بالالار اۋرۋ­حاناسىنىڭ قۇرىلىسىن قارجىلاندىرۋ تۋرالى سەناتور سەرگەي پلوتنيكوۆتىڭ دەپۋتاتتىق ساۋالى جاريا ەتىلدى. جاقسىباي سامرات, «ەگەمەن قازاقستان»