وتكەنى – ورنەكتى, ەرتەڭى – ايشىقتى

قازاقستان حالقى­نىڭ بىرلىگى كۇنى مەيرامىنا وراي  جانە  ورتاق وتانىمىز – قازاقستان رەسپۋبليكاسى تاۋەل­سىزدىگىنىڭ 25 جىلدىعى مەرەكەسى قارساڭىندا استانا قالاسىندا ءوت­كەن قازاقستان حال­قى اسسامبلەياسى سەس­سياسىنىڭ «تاۋەل­سىزدىك. كەلىسىم. بولاشاعى ءبىرتۇتاس ۇلت» اتتى تاقىرىپتى تۋ ەتۋى دە اسا ايرىقشا ماڭىزعا يە. سەس­سيادا مەملەكەت باسشىسى ن.نازارباەۆ اسسامبلەيا تاريحىنىڭ تاۋەلسىزدىكپەن بىتە قايناسقان ۇعىم ەكەندىگىن, ونىڭ تاۋەلسىزدىكتىڭ ناقتى جەمىسى ەكەندىگىن ايتتى. راسىندا, بۇدان 25 جىل بۇرىن ءوز ەگەمەندىگىن جاريالاعان ەلدىڭ ىرگەسى بەرىك بولىپ, شاڭىراعىن بيىك كوتەرۋىنە وسى ەلدە تۇراتىن بارلىق ۇلتتاردىڭ وكىلدەرى اتسالىسقان بولاتىن. وسى اۋىزبىرشىلىك, ىنتىماق ىرگەسى ەش سوگىلگەن جوق, اسسامبلەيا حالىقتىڭ بىرلىگىنە قالاي قىزمەت ەتسە, وسى شيرەك عاسىر ۋاقىت  اسسامبلەيانىڭ, ۇلى دوستىقتىڭ بەكي تۇسۋىنە مۇمكىندىك بەردى. بۇگىندە ءبىز – قازاقستاندى مەكەن ەتكەن بىرنەشە ۇلت وكىلدەرى قازاق حالقىمەن بىرگە ءبىراۋىزدان ەڭ باستى قۇندىلىق رەتىندە تاۋەلسىزدىكتى, ەڭ قاجەتتى سيپات  رەتىندە كەلىسىمدى, ەڭ سەنىمدى قامال رەتىندە ءبىرتۇتاس بولاشاقتى ايتامىز. سەسسيادا مەملەكەت باسشىسى مەملەكەتتىك قىزمەتتەگى ەتنوس الۋاندىلىعى ماسەلەسىن قوز­عادى – مۇنى دا قازاقستانداعى ءارتۇرلى ۇلت وكىلدەرىن «وزگە» دەپ وزەكتەن تەپپەي, ورتاعا تارتا بىلگەن اشىقتىقتىڭ بەلگىسى رەتىندە قابىلدادىم. سونداي-اق, ەكسپو-2017 كورمەسىن وتكىزۋ, ۇشتىلدىلىكتى تۇسىندىرە وتىرىپ دامىتۋ, ءبىلىم بەرۋ سالاسىنداعى وزگەرىستەردى, تيىمدىلىگىن ەسكەرە وتىرىپ, قولعا الۋ قاجەتتىگى, ەسەپ بەرەتىن مەملەكەتتى قالىپتاستىرۋ باعىتىنداعى قول جەتكىزىلگەن جۇمىستار ناتيجەسى تۋرالى ايتتى. بۇل اڭگىمەلەر تەكتەن-تەككە ايتىلعان جوق, ول تاۋەلسىز ەلىمىزدىڭ بۇدان ءارى دامۋىنىڭ كەپىلى جانە قا­زاق­ستان­دىقتاردىڭ ءبىر­لەسە وتىرىپ ءمىنسىز اتقارۋى ءتيىس جۇمىستار. قازىر رەسپۋبليكا­مىزدىڭ بارلىق ءوڭىر­لەرىندە, اسىرەسە, الەۋ­­­مەتتىك جەلىلەر قول­دانۋشىلارى اراسىندا جەر ماسەلەسى باستى نازاردا تۇر. جەر ءاربىر ۇلتتىڭ, ءاربىر مەملەكەتتىڭ ەڭ باستى بايلىعى, تىرەك-تۇراعى. قازاقستان ءۇشىن دە سولاي, ونىڭ ماڭىزدىلىعى سونشالىقتى – بىرنەشە عاسىرلار بويى قازاق دالا­سىنىڭ قايراتتى ۇلدارى – كەشەگى اتا-بابالار ونى قارۋدىڭ ۇشىمەن قورعاپ وتكەنى بەلگىلى. ال جاڭا زامانداعى تاۋەلسىز قازاقستاننىڭ پرەزيدەنتى ن.نازارباەۆ  شەكارالاس كورشى ەلدەرمەن 8 جىل بويى تىنىمسىز كەلىسسوزدەر جۇرگىزىپ, شەكارا سىزىعىن بەكىتتى. ەلباسى  سەسسيادا وسى ماسەلەگە ارنايى توقتالىپ, اۋىلشارۋاشىلىعى جەرلەرىنىڭ شەتەلدىك ازاماتتارعا جانە شەتەلدىك كومپانيالارعا ساتىلمايتىندىعىن, جەردىڭ تەك اۋىلشارۋاشىلىعىمەن اينالىسۋ ءۇشىن وتاندىق كاسىپكەرلەرگە جەكەمەنشىككە بەرىلەتىندىگىن ءتۇسىندىردى. ن.نازارباەۆ بىرلىك پەن ءبىر­تەكتىلىك ۇعىمىنىڭ ماڭىزى مەن ءبىزدىڭ ومىرىمىزدەگى باستى سيپاتىن ايرىقشا باعالاپ, اسسامبلەيانىڭ ارالاسۋىمەن جۇزەگە اسىرىلعان ىستەرگە توقتالدى. بۇعان دەيىن مەتسەناتتار قاۋىمداستىعىنىڭ باستى ۇيلەستىرۋشىسى, سوتقا دەيىن-اق داۋلى ماسەلەلەردى شەشۋشى مەدياتور سىندى ماڭىزدى شارۋالاردىڭ ءىس باسىنان تابىلعان اسسامبلەيا الداعى كەزەڭدەردە دە «ماڭگىلىك ەل» پاتريوتتىق اكتىسىن جۇزەگە اسىرۋشى بەلسەندى كۇشتەردىڭ, نەگىزگى تەتىكتەردىڭ ءبىرى بولىپ, قازاقستانداعى بەرەكە-بىرلىكتىڭ, كەلىسىم مەن دامۋدىڭ ۇيىتقىسى بولا بەرمەك. سەرگەي مارتىن, «ۆيدەرگەبۋرت» نەمىس ەتنومادەني بىرلەستىگىنىڭ توراعاسى اقتاۋ