پاتريوتتىق اكت – ۇلەس قوسار ۇلكەن باستاما

قازاقستان حالقى اس­سام­بلەياسىنىڭ ءار سەسسياسىن وتان­داستارىمىزدىڭ قۋانىشپەن كورىپ, تاماشالايدى, ماتەريالدارىن زەردەلەپ وقىپ تانىسادى. ويتكەنى, مۇنىڭ بارلىعى مىسقالداي جاسان­دىلىعى جوق, ءومىر­دىڭ وزىندەي شىنايى بو­لۋىنان دەپ بىلەمىن. ءبىزدىڭ ەلدەگى ۇلت پەن ۇلىستار تا­تۋلىعىنىڭ, بىرلىگىنىڭ وزگە جەردە بالاماسى جوقتاي كورىنەدى ماعان. شىندىعىندا دا سولاي شىعار, بالكىم. ەلباسى ايتقانداي, ماڭگىلىك ەل ۇعىمى عاسىرلار تەرەڭىنەن تار­تىلعانداي, ونىڭ اياسىنا كوپ ماعىنا سىيادى. ماڭگىلىك ەلدىڭ باستى ماعىناسى – تاۋەلسىزدىك! تەرەكتىڭ تامىرى تەرەڭگە كەتپەسە داۋىلعا شىدامايدى. تاۋەلسىزدىك تە سونداي, ەلدىڭ ءداس­تۇرىن, تاريحىن, ءتىلىن, ءدىنىن, ءدىلىن ساقتاماساق, تاۋەلسىزدىكتىڭ مازمۇنى سولعىن تارتادى. ءبىزدىڭ حالقىمىزدىڭ جادى ەش نارسەنى ۇمىتتىرعان جوق. اتالارىمىز بىزگە جەتكىزگەن مۇرالاردى العا اپارۋ, سونىمەن ۇرپاق ساباقتاستىعىن ۇزبەۋ قاسيەتتى پارىزىمىز بولۋى ءتيىس. قاسيەتتى شاڭىراق, وتباسى, قوناقجايلىلىق, ەڭبەكسۇيگىشتىك پەن بىرلىك اتادان قالعان باستى مۇرالار بولىپ تابىلادى. بۇل بۇگىندە ءبىزدىڭ قوعامنىڭ سيپاتىنا اينالىپ كەتكەن. بىرلىگىمىزگە شۇكىرشىلىك ەتە­مىز. ول – قازاقستان حالقى اس­سامبلەياسىنىڭ ءححىV سەسسياسى تۇجىرىمداعان پاتريوتتىق اكتىنىڭ نەگىزى بولىپ تابىلادى دەپ ويلايمىن. جانە وسى بىرلىكتىڭ تالدىڭ شىبىعىن كۇشتەپ يگەندەي, جوعارىدان تەلىپ جۇرگىزىپ وتىرعان ساياسات ەمەس, كۇندەلىكتى تىرلىگىمىزدىڭ شىنايى كورىنىسى ەكەنىنە كۇندە كوزىمىز جەتەدى. ادامداردىڭ تۇسىنە, تىلىنە قاراماي, ءبىر-بىرىنە دەگەن مەيىرىمدىلىگىن مەن كۇن سايىن ومىردە كەزدەستىرىپ وتىرامىن. ءوزىمىزدىڭ قۇربىلارىمىز دا, كورشى-كولەمىمىز دە سان ۇلتتىڭ وكىلدەرى. ءومىردىڭ قۋانىشى مەن قيىندىقتارىن بارلىعىمىز دا ءبىر قالادا, ءبىر كوشەدە بىرگە كورىپ كەلەمىز. قازىر ءبىر قازاق­ستان­­دىقتىڭ قۋا­نىشى – بار قازاقستاندىقتىڭ قۋانىشىنا, ورتاق ماق­تانىشىمىزعا اي­نالعان. مىسالى, گەننادي گو­لوۆ­كيننىڭ امە­ريكالىق دومينيك ۋەيدپەن جەك­پە-جەگى بولاتىن كۇنى قوستانايلىقتار جەكسەنبى ەكەنىنە قاراماي, ادەت­تەگىدەن ەرتە تۇردى. قارسىلاسىن بەس مينۋتتىڭ ىشىندە تەحنيكالىق نوكاۋتقا جىبەرگەن گەنانىڭ كەزەكتى جەڭىسى بارلىق قازاقستاندىقتاردىڭ رياسىز قۋا­­نىشىنا اينالعانى اقيقات شىندىق. قازىر جۇزىنەن يمانى توگىلىپ, بويىنان قايسارلىق پەن ەڭبەكسۇيگىشتىك, ادامگەرشىلىك, اسا دارىندىلىق اتويلاپ تۇراتىن گەننادي گولوۆكيندى, سونداي-اق, ەكى دۇركىن وليمپيادا چەمپيونى, زىلتەمىرشى يليا ءيليندى ۇلكەندەر جاعى ءوز ۇلىنداي اينالىپ-تولعانىپ وتىرادى, ولار جاستاردىڭ كۋميرىنە اينالىپ ۇلگەردى. بىرلىك پەن تاتۋلىقتىڭ مۇن­داي جارقىن مىسالدارىن حال­قى­مىزدىڭ كۇندەلىكتى ومىرىنەن كوپتەپ كەزدەستىرۋگە بولادى. سون­دىق­تان ەلىمىزدىڭ, حالقىمىزدىڭ جالپىۇلتتىق بىرلىگى ماڭگىلىك ەلدىڭ جەتى تۇعىرىنان ويىپ ورىن الۋى زاڭدىلىق ەمەس پە؟ ال ماڭگىلىك ەلدىڭ مىزعىماس ءبىر تۇعىرى – زايىرلى مەملەكەت جانە جوعارى رۋحانيات. تاۋەلسىزدىگىمىزدى العان كۇننەن باستاپ قازاقستان ءوزىن زايىرلى مەملەكەت دەپ جاريالادى. ادامزات قوعامىندا ءدىننىڭ الار ورنى ەرەكشە. ول – رۋحانيات كوزىنىڭ ءبىرى, مادەنيەتتىڭ دە ءبىر بۇلاعى دىننەن باس­تاۋ الادى, يماندىلىقتىڭ, ادامگەرشىلىكتىڭ دە باستاۋى سوندا جاتىر. بىراق اينالامىزدان كورىپ وتىرعانىمىزداي, ءدىن ءتۇرلى كيكىلجىڭنىڭ, ۇلتتار اراسىنداعى ارازدىق پەن جەككورۋشىلىكتىڭ, مەملەكەتتەر اراسىنداعى تەكەتىرەستىڭ سەبەبىنە اينالماۋى ءتيىس. ءدىني تولەرانتتىلىقتىڭ, ءار­كىمنىڭ ءدىني سەنىمىنە ءوزارا قۇرمەتپەن قاراۋدىڭ دا ءبىزدىڭ ەلىمىزدە جاقسى قالىپتاسقانى قۋانتادى. مىنە, حريستيان ءدىنىن ۇستاۋشىلاردىڭ پاسحا مەرەكەسى كەلىپ قالدى. ونى تويلاعان حريستيان دىنىندەگى قوستانايلىقتاردى بارلىعى دا قۇتتىقتاپ, مەرەكەنى بىرگە تويلايدى. ۇجىمداردا حريستيان ءدىنىن ۇستاناتىن ارىپتەستەرىمىز پاسحا مەن بويالعان جۇمىرتقا قويىپ, ءشاي داستارقانىن جايۋدى ۇمىتپايدى. بارلىق ۇلتتىڭ وكىلى مەرەكەنى وسىلاي اتاپ وتەدى. قۇربان ايتتا دا مۇسىلمانداردى بارلىعى قۇتتىقتاپ جاتادى. داستارقانعا كەلەدى. قانداي جاراسىمدىلىق! تەك كوز تيمەسىن دەپ تىلەيمىز. جەتى تۇعىردىڭ ىشىندە ين­نو­ۆا­تسيا نەگىزىندەگى تۇراقتى ەكونو­ميكالىق ءوسىم, جالپىعا ورتاق ەڭبەك قوعامى, تاريحتىڭ, مادەنيەت پەن ءتىلدىڭ ورتاقتىعى, ۇلتتىق قاۋىپسىزدىك جانە قازاقستاننىڭ جالپى الەمدىك جانە وڭىرلىك پروبلەمالاردى شەشۋگە جاھاندىق تۇرعىدان قاتىسۋى سەكىلدى قاداۋ-قاداۋ, ابدەن ءيى قانعان تۇجىرىمدار ەنگەن. مۇنىڭ بارلىعى دا ءبىر جاعىنان بۇگىنگى ءومىرىمىز بولسا, ەكىنشىدەن, تاۋەلسىزدىك تۇعى­رىن بەكىتە ءتۇسۋ ءۇشىن الدا قولعا الاتىن كوپ جۇمىستىڭ جوباسىنداي دا كورىنەدى ماعان. مىسالى, بۇگىنگى جاستاردى ەڭبەككە باۋلۋ تاربيەسىن تەرەڭدەتە ءتۇسۋ كەرەكتىگى ايتىلىپ ءجۇر. بۇل – وتە ماڭىزدى ماسەلە. ەلباسى مۇنى وسىدان بىرنەشە جىل بۇرىن ءوزىنىڭ ماقالاسىندا تەرەڭدەتە ايتقان بولاتىن. قازىر وتە كوپ اڭگىمە بولىپ جاتقان ءۇش ءتىلدى مەڭگەرۋ دە ەڭبەككە تاۋەلدى. ەڭبەك ەتسە بارلىعىنا دا قول جەتكىزۋگە بولاتىنىن جاستارعا قۇر سوزبەن ەمەس, ىسپەن كورسەتكەن ءلازىم. ەڭبەكقور ادام ءوز وتانىنىڭ پاتريوتى دا بولادى. ال پاتريوتتار ەلىندە ۇلتتىق قاۋىپسىزدىك قامتاماسىز ەتىلەتىنى ايقىن. قازاقستان حالقى اسسام­بلەيا­سىنىڭ ءححىV كەزەكتى سەسسياسى وسىنداي ماعىنالى جۇمىستارىمەن قۋانتتى, تاريحي ميسسياسىن ورىندادى. ءمارزيا ەسقازينا, وبلىستىق تەمىرجول اۋرۋحاناسى باس دارىگەرىنىڭ ورىنباسارى قوستاناي