قوستاناي حالقى 151-ءشى اتقىشتار بريگاداسى ەرلىگىنە تاعزىم ەتتى (فوتو)

قوستاناي. 27 ءساۋىر. قوستانايداعى التىنسارين كوشەسىندە ونالاسقان بالالار شىعارماشىلىعى ءۇيىنىڭ قاسىندا 74 جىل بۇرىن ءدال وسى جەردەن مايدانعا اتتانعان №151 اتقىشتار بريگاداسىن ەسكە الۋ ميتينگىسى بولدى. وندا قوستانايلىقتار ەرلىككە تاعزىم ەتتى. بۇل تۋرالى egemen.kz ءتىلشىسى حابارلادى. ميتينگىگە دەيىن وسى شارا قۇرمەتىنە ۆەلوشاباندوزدار قوستاناي قالاسى كوشەلەرىمەن ءجۇرىپ وتىرىپ, قالا سىرتىنداعى كەڭەس وداعىنىڭ باتىرى يليا سيانوۆتىڭ بەيتىنىە گۇل شوقتارىن قويدى. وندا سوعىس جانە تىل, ەڭبەك ارداگەرلەرى دە بولدى. قوستانايلىق ۇلكەن-كىشى جينالعان وسى الاڭنان 1942 جىلى 26 ساۋىردە 151-ءشى ارنايى اتقىشتار بريگاداسى ۇلى وتان سوعىسىنا اتتانعان بولاتىن. كەيىن اتقىشتار بريگاداسى 150-ءشى اتقىشتار ديۆيزياسى قۇرامىنا ەنەدى. 1945 جىلى 8 مامىردا بەرليندەگى رەيستاحقا تۋ تىككەن جاۋىنگەرلەردىڭ اراسىندا قوستانايدا نەگىزى قالانعان151-ءشى اتقىشتار بريگاداسىنىڭ جاۋىنگەرلەرى دە بولدى. سونداعى ءبىر روتانى  قوستانايلىق يليا سيانوۆ باسقارعان بولاتىن. ال رەيستاحقا تۋ تىككەن قازاق راقىمجان قوشقارباەۆ 150-ءشى اتقىشتار ديۆيزياسىنىڭ قۇرامىندا بولعانى ايان. ميتينگىدە الدىمەن  سوعىس ارداگەرى, 90-نان اسقان ميحايل يۆانوۆيچ پودولياكوۆ ءسوز الدى. ول: «وبلىستىق جانە قالالىق ارداگەرلەر كەڭەسى جەرگىلىكتى بيلىكتىڭ قولداۋىمەن بيىل 9-شى رەت وسى قوستانايدا قۇرىلىپ, مايدانعا اتتانعان  151-ءشى ارنايى اتقىشتار بريگاداسى ەرلىگىنە تاعزىم ءۇشىن ۆەلوجارىس ۇيىمداستىرىپ وتىرمىز. اتالار ەرلىگىن بىلمەي, جاستاردى پاتريوتتىق سەزىمدە, وتاندى سۇيۋگە تاربيەلەي المايمىز. ۇلى وتان سوعىسى جىلدارى قوستانايلىقتار دا وققا كەۋدەسىن توستى. رەيستاحقا تۋ تىككەن 150-ءشى اتقىشتار ديۆيزياسىنىڭ سۇيەگى قوستانايدا قالانعان ەدى. ەرلىكتىڭ تاريحىن بىلىڭدەر, تاريحقا دا, ەرلىككە دە تاعزىم ەتىڭدەر», – دەدى. مۇنان كەيىن قوستانايلىق جاستار, وبلىستىق ارداگەرلەر كەڭەسىنىڭ توراعاسى كەنجەبەك ۇكين ءسوز الىپ, جاستاردى ەرلىككە تاعزىم ەتۋگە شاقىردى. پاتريوتتىق اندەر شىرقالدى. ەرلىككە تاعزىم جاستار جۇرەگىندە وتانعا دەگەن پاتريوتتىق سەزىمدى وياتقانى ايان. ءنازيرا جارىمبەتوۆا. دەرەك, فوتو: egemen.kz.