استاناداعى «قازاقستان» ورتالىق كونتسەرت زالىندا كەڭەس وداعىنىڭ حالىق ءارتىسى, سوتسياليستىك ەڭبەك ەرى, بيبىگۇل تولەگەنوۆانىڭ تاۋەلسىزدىكتىڭ 20 جىلدىعىنا ارنالعان «گاۋھارتاس» اتتى شىعارماشىلىق كەشى ءوتتى.
ەسىمى اڭىزعا اينالعان ءانشى ءوزىنىڭ شىعارماشىلىق كەشىندە “قازاق ءۆالسى”, “بۇلبۇل”, “قاراتورعاي”, “گاۋھارتاس”, “القوڭىر” سياقتى تاماشا اندەردى شىرقادى. سونداي-اق ول دج. ءپۋچچينيدىڭ «جانني سكيككي» وپەراسىنان لاۋرەتتىڭ, ع.جۇبانوۆانىڭ «ەڭلىك-كەبەك» وپەراسىنان ەڭلىكتىڭ اريالارىن ناقىشىنا كەلتىرە ورىندادى.
قازاق ساحناسىنىڭ جارىق جۇلدىزى اتانعان ونەر ساڭلاعىنىڭ كەشىندە بيبىگۇل تولەگەنوۆامەن قوسا ءبىر توپ ءىزباسارلارى دا ونەر كورسەتتى. اتاپ ايتقاندا, گۇلجانات ساپاقوۆا, مارجان ءتورەحانوۆا, ەلەنا نيزامۋتدينوۆا مەن ەلەنا ياروسلاۆتسەۆا, سونداي-اق, تولقىن زابيروۆا ورىنداعان اندەردى ەلوردا حالقى زور ىقىلاسپەن تىڭداپ, قوشەمەت كورسەتتى. سونىمەن قاتار, كەشتە استانا قالاسى مەملەكەتتىك فيلارمونياسىنىڭ سيمفونيالىق وركەسترى باس ديريجەرى ابزال مۇحيتدينوۆ پەن استانا قالاسى مەملەكەتتىك فيلارمونياسىنىڭ قازاق ۇلت اسپاپتار وركەسترى باس ديريجەرى ايتقالي جايىموۆ ءوز ونەرلەرىمەن ءبولىستى.
ۇلكەن-كىشى قاشاندا ءسۇيىپ تىڭدايتىن, ءاردايىم جۇزىنەن نۇرى توگىلىپ تۇراتىن بيبىگۇل احمەتقىزى بۇل كەشتە دە حالقىنىڭ ەرەكشە ءىلتيپاتىنا بولەندى.
جۇلدىز ءبايدىلدا.
سۋرەتتەردى تۇسىرگەن ورىنباي بالمۇرات.
