«استانا-بالەت» تەاترى» ءۇش كۇنگە جالعاساتىن گاسترولى اياسىندا الماتىلىقتار ءۇشىن, بالەت عالاماتىن پاش ەتپەك. اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ساحناسىندا مامىر ايىنىڭ ءتورتى مەن التىسى ارالىعىندا كورەرمەن قاۋىم جاس ۇجىمنىڭ تىڭ تۋىندىلارىن تاماشالاي الادى.
«ءبىرىنشى كۇنى «بي عالاماتى» باعدارلاماسى ۇسىنىلماق. ونىڭ ءبىرىنشى بولىمىندە «الەم», ەكىنشى بولىمىندە – 2016 جىلدىڭ 12 اقپانىندا پرەمەراسى وتكەن «Gaia» بالەتىنەن ءۇزىندى كورسەتىلمەك. اتالعان قويىلىمداردى تاماشالاي وتىرىپ, كورەرمەن قاۋىم ءبىزدىڭ ۇجىمنىڭ شىعارماشىلىق جولىن دا كوز الدارىنا ەلەستەتە الادى. ەكىنشى كۇنى «ءبىر اكتىلى بالەتتەر كەشى» وتەدى. كورەرمەن نازارىنا «GAIA» مەن «كارمەن» بالەتتەرى جول تارتپاق. «كارمەن» بالەتىن 2015 جىلى «استانا-بالەت» تەاترىنىڭ» سانكت-پەتەربۋرگتە وتكەن گاسترولى اياسىندا «اپپاق ءتۇن جۇلدىزدارى» فەستيۆالىندە جۇرتشىلىق زور ىقىلاسپەن قابىلداعان بولاتىن. تانىمال حورەوگراف بوريس ەيفمان, سونىمەن قاتار, پەتەربورلىق سىنشىلار قاۋىمى سپەكتاكلدى جوعارى باعالاپ, جاقسى پىكىر بىلدىرگەن ەدى. گاسترولدىڭ سوڭعى كۇنى الماتىلىقتار «استانا-بالەت GALA» باعدارلاماسىن تاماشالاي الادى. باعدارلاماعا ەنگەن بيلەردەن ۇلى دالا سامالى ەسىپ, تاياۋ شىعىس سارىندارى تانىلادى. بۇل ءبيدىڭ كوپشىلىگىنە ەۋروپا مەن امەريكا جۇرتشىلىعى ءتانتى بولعان ەدى», – دەدى «استانا-بالەت» تەاترىنىڭ ديرەكتورى ۆالەري كۇزەمباەۆ.
«استانا-بالەتتىڭ» عالامات گاسترولى تالعامپاز قاۋىمدى ەلەڭ ەتكىزبەي قويماس. بالەتسۇيەر قاۋىم بيشىلەردىڭ جاڭا بۋىنىن جىلى ىقىلاسپەن قابىلداپ, وسى گاسترول الماتىنىڭ مادەني تىنىسىنا تىڭ سەرپىن اكەلەر دەگەن ۇمىتتەمىز», – دەدى ول.
راۋان قايدار,
«ەگەمەن قازاقستان»
