وزگەنىڭ توزىعىنا وزەۋرەمەيىك

كەلەشەگىمىزدىڭ قاناتىن كەڭ جايدىراتىن, ەلى­مىز­دىڭ ەرتەڭىن قولىنا الاتىن, اتادان بالاعا دەگەن جاقسى ۇعىمنىڭ يەسى, ءبىزدىڭ بولاشاعىمىز – با­لالارىمىز. سول كەلەشەگىمىزدىڭ بۇگىنگى تاڭدا تاعى ءبىر جايسىز جاعدايدى باستاعانىنان كوڭىلىمىزگە قورقىنىش ۇيالاپ, كۇدىك تۋا باستادى. قايدان جەتكەن بالە ەكەنىن تازا تۇسىنبەسەك تە, وسى كەيىنگى 3-4 جىلدىڭ ىشىندە جايلاپ كەلىپ, بويىمىزدى الا باستاعان بالەكەتكە ەرۋدى, اسىرەسە, بيىل جاپپاي كوس­تيۋم ىزدەپ, شايتان مەن سابالاقتىڭ, مىس­تان­نىڭ, قۇبىجىقتىڭ, قارا كۇشتەردىڭ بەينەسىنە ەنگەندى ساندىك, قىزىق كورىپ, قۇبىجىق بولىپ كيىنىپ, كۇناكاردى ۇلىقتاۋدى ادەتكە ايلاندىرا باستادىق. سايتان سايران سالعان ءتۇن – ءار جىلدىڭ 30 قا­زا­نىن­دا قايداعى ءبىر جابايى تايپانىڭ مەي­را­مى­نىڭ ءبىزدىڭ ەلىمىزدە دە قانات جايىپ, كۇش الا باستاعانىن كوزىمىزبەن كورىپ, كۋا بولىپ وتىرمىز. الگى ەلىمىز كۇتكەن سالاماتتى ومىرىمىزگە بۇيتە بەرسەك, قولىمىزدى قانشا سوزساق تا, جەتۋىمىزدىڭ اۋىلى الىستاي بەرۋى انىق. بۇل اتى بەلگىسىز بالەگە, مەرەكە دەپ ايتۋعا اۋىز بارمايتىن شايتاننىڭ ساندىراعىنا «حەللوۋين» دەگەن ات بەرىلىپتى. اتا دىنىمىزگە دە جان-جاقتان شابۋىلداعان ءارتۇرلى قيتۇرقى ءدىني اعىمدار از دەگەندەي, ەڭ جامان جاعىنان كورىنگەن كورىنىستى شايتانعا تەڭەستىرۋشى ەدىك, ەندى سول بالە جاي كەلمەي, مەيرامىن سۇيرەتە كەلىپ, ەسىگىمىزدەن سىعالاي باستادى. وتكەن جىلدىڭ 30 قازانىنان 31-ىنە قاراعان ءتۇنى جىن-شايتاندار, قارا كۇشتەر بەينەسىنە كىرگەن نەشە ءتۇرلى بالەلەر باس قالالارىمىزدا تۇنىمەن ءورىپ ءجۇرىپتى. سول تۇنگى دەرەكتەرگە سەنسەك, ەلىمىزدىڭ ەڭ ءبىر ساعىنىپ كورىسەتىن الما­تىسىندا  سول ءتۇنى 17 تۇنگى كلۋبتا شاي­تان­نىڭ ارنايى تويى بولىپتى. باس قالامىز استانادا دا بىرنەشە تۇنگى كلۋب تۇنىمەن الەككە ءتۇسىپ, ءتىپتى كوپتەن كۇتىپ ماقتانىشپەن اشقان  «حان شاتىر», سول سياقتى  «كەرۋەن» ءىرى ويىن-ساۋىق ورتالىق­تا­رىندا دا استا-توك اتاپ ءوتىپتى. كوپشىلىك جاعاسىن ۇستاپ, توبە شاشىڭ تىك تۇراتىنداي كورىنىستەردى كوزدەرىمەن كورىپتى. كىرە بەرىستە قىپ-قىزىل قانعا بويالعان (قىزىل بوياۋ) جىندار تۇر, ارعى جاعىندا قانعا بويالىپ ولگەن ادامنىڭ مۇردەسى  (قۋىرشاق) جاتىر سۇلاپ, ال مۋزىكاسىن تىڭداساڭ,  قۇلاق تۇندىراتىن جايسىز ءۇن, اينالا تولعان وڭشەڭ شايتاندار, قاڭقالار, مىستاندار, قارا كۇشتەر قولدارىندا ۇستاعاندارى شيشا, جىندى بيمەن قوسىلعان ايقاي دەيدى. مىنە, شايتاننىڭ ناعىز تويى وسىلاي شايتانشا بولىپتى. ءبىزدىڭ شىققان «جاڭا بيىگىمىز» وسىلاي اياقتالىپتى. قارقىنى قورقىنىشتى, قادامى جامان ادەتكە بۇدان ارى تاعى كورمەگەندەي كوز جۇما بەرسەك, قاي­دا بارىپ تىرەلەرى بارىمىزگە تۇسىنىكتى. بۇل قا­زاق­قا جات, مۇسىلماندىعىمىزعا بوتەن, جالپى ال­عاندا, كىسىلىك قاسيەتىمىزگە تەرىس, قىزىعاتىن وزىق دۇنيە ەمەس, كىم كورىنگەننىڭ كەرەك ەتپەي تاستاعان توزىعىنا جاڭالىق اشقانداي باس ۇرعانىمىزعا ايتار ءسوز تاپپاي, اڭىرىپ وتىرمىز. شىنىن ايتساق, ءبىز كىمنىڭ تويىن تويلاپ جاتىرمىز, قايدا بارامىز, بۇدان وپا تابامىز با؟ الداعى 14 اقپاندا اتاپ ءوتۋدى جامان ادەتكە اينالدىرعان «اۋليە ۆالەنتين كۇنىمەن» ايتىسىپ جاتقاندا, مىنا بالە شايتان تاعى قايدان شىقتى؟ «جاۋ جاعادان العاندا, ءبورى ەتەكتەن تارتادى» دەگەندەي, نە ءبىر داستۇرگە سىيمايتىن «ساتانيستار مەيرامىن» تايراڭداتىپ, كوزدىڭ الدىندا تويلاتىپ قويىپ, بيلىك نەگە كوزىن جۇمىپ بايقاماي تىنىش وتىر. ءدىن باسىنداعىلار شايتان توبەسىندە ويناپ جاتسا دا, اۋزىنا قۇم تولتىرىپ, ولار وتىر مۇلگىپ. ارينە, وسى جەردە الگى قىلىشىڭدى كەش سەرمەسەڭ, تاسقا شاپتىڭ كەرى كەلىپ جۇرمەسە ەكەن دەيمىز. مىنا كۇشەيىپ كەلە جاتقان بالە قۇبىلىستان دەر كەزىندە قاتتى تالاپ قويىپ, جابىلىپ قارسى جۇمىس اتقارىلماسا, جالىنداپ كەلە جاتقان جاستارىمىزعا يە بولا الماي قالۋىمىز ابدەن مۇمكىن. تاۋەلسىزدىك الىپ, ەلىمىز بەن ءتىلىمىز, ءدىنىمىز بەن ءداستۇر-سالتىمىز جاڭعىرىپ جاتقاندا, جات ەلدىڭ جامان ادەتىنىڭ كەلۋىنە تاستاي توسقاۋىل قويماساق, كەلەشەگىمىزگە كەلەر زياندى توقتاتا الماي, كەشىگەمىز. مەرەكەلەرىمىزدى, قۇتتى مەيرامدارىمىزدى, زاڭمەن بەكىتىلگەن, ەلباسىمىز قول قويعان ۇلىستىڭ ۇلى كۇندەرىن ۇلىقتاۋدان اۋىتقىمايىق, قۇرمەتتى اعايىن. قۇرمانعالي ءۋالي, ءماجىلىس دەپۋتاتى.