بەيبىتشىلىك قۇسىنىڭ ۇياسى

ۇلتتىق مۋزەيدە ۆەنگرياداعى حالىقارالىق حولوكوست قۇرباندارىن ەسكە الۋ كۇنىنە وراي «حح عاسىردىڭ ۇمىتىلماعان تاعدىرلارى» اتتى شارا ءوتتى. ۇلتتىق مۋزەي ديرەكتورىنىڭ ورىنباسارى جازيرا كۇلباەۆا كوپشىلىك بىلە بەرمەيتىن بۇل كۇننىڭ ەرەكشەلىكتەرىنە توقتالا كەلىپ, حالىقتاردىڭ ءبىر-ءبىرىنىڭ مادەنيەتى مەن تاريحىن ەتەنە تانىپ-ءبىلۋى ءۇشىن, الەمدەگى بەيبىتشىلىك پەن تاتۋلىققا قۇ­رىلعان مۇنداي شارالاردىڭ اي­تارلىقتاي ءرول اتقاراتىندىعىن ايتتى. – 31 مامىر ەلىمىزدەگى ساياسي قۋعىن-سۇرگىن قۇرباندارىن ەسكە الۋ كۇنى بولىپ سانالادى. ال ۆەنگريا مەملەكەتىندە, سول سياقتى, ءساۋىردىڭ 16-سى كۇنى حو­لوكوست قۇرباندارىن ەسكە الۋ داستۇرگە اينالعان. ارينە, ونىڭ ءبارى دە ورنى تولماس قاسىرەتتەر. قالاي دەسەك تە بەيبىت زامانعا ەشتەڭە جەتپەيدى. الەمدە ۇلت ارازدىعى, قانتوگىس بولماسىن. ادامزات تىنىشتىق پەن ءوزارا كەلىسىمدە ءومىر سۇرسە ەكەن دەيمىز. سەبەبى, بۇل بارلىعىمىزدىڭ باعا جەتپەس اسىل قۇندىلىعىمىز بولىپ تابىلادى, – دەدى ج.كۇلباەۆا. جيىنعا قاتىسىپ ءسوز سويلەگەن ۆەنگريانىڭ قازاقستانداعى  ەل­شىسى اندراش باراني جازىقسىز ايداۋعا تۇسكەن ەۆرەي ۇلتىنىڭ حولوكوست قالاسىنداعى قازىرگى ءومىرى تۋرالى اڭگىمەلەي كەلە, تاريحي قۇربانداردى ەسكە الۋ شاراسىن وتكىزۋگە جاعداي جاساعان ۇلتتىق مۋزەيگە العىسىن جەتكىزدى. – قازىرگى ۋاقىتتا ۆەنگرياداعى ەۆرەي ۇلتى بەيبىت تىرلىك كەشىپ جاتىر. ولاردىڭ جايلى ءومىر ءسۇرۋى ءۇشىن مەملەكەت تاراپىنان بارلىق جاعدايلار جاسالعان. ءبىز ەكىنشى  دۇنيەجۇزىلىك سو­عىس جىلدارى ەۆرەيلەردىڭ  كو­زىن جاپپاي جويماق بولعان   نا­تسيستەردىڭ قىلمىستارىن ايىپتايمىز ءارى جازىقسىز قۋدالاۋعا ۇشىراعانداردى ماڭگى جادىمىزدا ساقتايمىز. بۇگىنگى ءىس-شارانى وتكىزۋگە مۇمكىندىك تۋ­عىزعاندارىڭىز ءۇشىن ۇلتتىق مۋزەي باسشىلىعىنا راحمەت ايتامىز, – دەدى ا.باراني. رەسەي ەۆرەي كونگرەسى مۋزەيى قورىنىڭ باس قور ساقتاۋشىسى ناتاليا انيسينا ەشكىمدى بەيجاي قالدىرمايتىن كورمە تۋرالى ويىن ورتاعا سالا كەلە, حولوكوست وقيعاسىنىڭ سالدارىنا توقتالدى. – بۇعان دەيىن اتالمىش كورمە ماسكەۋدە, ەكاتەرينبۋرگتە, كالي­نينگرادتا ءوتتى. البەتتە, مۇنداي قورقىنىشتى جىلدار ارتتا قالسا دا ول ءبىزدىڭ جادىمىزدا. تالاي جازىقسىز جاننىڭ قانى توگىلدى. ونىڭ ىشىندە بالالار دا, قارتتار دا بار. ولاردىڭ ۇرپاقتارىنىڭ تاعدىرى نە بولدى؟ بۇل – وتە اۋىر سۇراق. الەمدە بەيبىتشىلىك سالتانات قۇرسىن. سوعىس, ب ۇلىك بولماسىن, – دەدى ن.انيسينا. ەسكە سالا كەتەيىك, كورمەگە 30-40-جىلدارعى وقيعالارعا وراي تاعدىرلارى كۇرت ءوز­گە­رىس­كە ۇشىراعان ۆەنگرلىك عالىم­داردىڭ, جازۋشىلاردىڭ, اك­تەر­لەردىڭ, سپورتشىلاردىڭ, مۋ­زىكانتتاردىڭ ءومىربايانىنان حابار بەرەتىن سۋرەتتەر قويىلدى. قارشىعا كۇلەن